جاڭا ماۋسىمىندا نە ۇسىنادى؟
كەشە ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى XXXII جاڭا ماۋسىمىن ءداستۇر بويىنشا م.اۋەزوۆتىڭ «اباي» قويىلىمىمەن اشتى. بۇل داستۇرگە بيىل – 13 جىل. وعان بىردەن-ءبىر سەبەپ, ونەر ۇجىمى ەسىمىن ەنشىلەگەن ساحنا ساڭلاعى قاليبەك قۋانىشباەۆ سومداعان شوقتىعى بيىك ءدال وسى اباي ءرولى بولدى.
قازاقستاننىڭ ەڭبەك سىڭىرگەن قايراتكەرى الىمبەك ورازبەكوۆ ساحنالاعان «اباي» تراگەدياسىندا قوس ابايدىڭ بەينەسى كورسەتىلەدى. اعا اباي بەينەسىن – قازاقستاننىڭ حالىق ءارتىسى تىلەكتەس مەيراموۆ, اباي ءرولىن – قازاقستاننىڭ ەڭبەك سىڭىرگەن قايراتكەرى نۇركەن وتەۋىل سومدايدى. قويىلىمعا جالپى 65 اكتەر قاتىسادى. قويۋشى سۋرەتشى – قانات ماقسۇتوۆ. حورمەيستەر – قازاقستاننىڭ ەڭبەك سىڭىرگەن قايراتكەرى امانتاي جۇماشەۆ. ارتىنشا قاللەكي تەاترى 29 قىركۇيەك پەن 2 قازان كۇندەرى ارالىعىندا اباي وبلىسىنىڭ ورتالىعى سەمەي قالاسىندا گاسترولدىك ساپارىن وتكىزەدى.
18-23 قازان ارالىعىندا تەاتردا كورنەكتى تەاتر جانە كينو اكتريساسى, قاز كسر مەملەكەتتىك سىيلىعىنىڭ لاۋرەاتى, كسرو جانە قاز كسر حالىق ءارتىسى شولپان جانداربەكوۆانىڭ 100 جىلدىعىنا ارنالعان ءXXVIIى رەسپۋبليكالىق تەاتر فەستيۆالى وتەدى. فەستيۆال اياسىندا قازاقستاننىڭ حالىق ءارتىسى قادىر جەتپىسباەۆتىڭ 80 جىلدىعىنا ارنالعان ءىس-شارالار دا جوسپارلانعان. ونەر ۇجىمى اتالمىش فەستيۆالدە ح.التاي, ح.ورالتايدىڭ «التايدان اۋعان ەل» (رەجيسسەرى – فارحات مولداعالي) قويىلىمىن ۇسىنادى.
تەاتر رەپەرتۋارىنداعى ايگىلى رەجيسسەر, حالىق قاھارمانى ءازىربايجان مامبەتوۆ ساحنالاعان
«عاسىردان دا ۇزاق كۇن» (2003 ج.) دراماسى قازان ايىندا ءا.مامبەتوۆتىڭ 90 جىلدىعىنا ارنالعان «TEATRALL» ءىى حالىقارالىق تەاتر فەستيۆالى اياسىندا ارنايى كورسەتىلىپ, فەستيۆال شىمىلدىعىن تۇرەدى. ال اتالمىش فەستيۆال ساراپشىلارىنىڭ نازارىنا 2022 جىلى ساحنالانعان ع.مۇسىرەپوۆتىڭ «بايان سۇلۋ – قوزى كورپەش» (رەجيسسەرى – گۇلناز بالپەيىسوۆا) مۋزىكالىق دراماسى ۇسىنىلادى.
شىعارماشىلىق ۇجىم م.سەرۆانتەستىڭ «دون كيحوت» قويىلىمىمەن (رەجيسسەرى – الىبەك ومىربەكۇلى) الماتى قالاسىندا وتەتىن XVII ورتالىق ازيا تەاتر فەستيۆالىنە قاتىسادى.
قىركۇيەك ايىندا ەلوردانىڭ تىنىس-تىرشىلىگىنە ارنالعان «01» كومەدياسىنىڭ پرەمەراسى ۇسىنىلادى. جاڭا قويىلىمدى ساحنالاۋ ءۇشىن اكتريسا, رەجيسسەر, الماتى قالاسىنداعى ارتيشوك تاۋەلسىز تاجىريبەلىك تەاترىن قۇرۋشىلاردىڭ ءبىرى ءارى كوركەمدىك جەتەكشىسى گالينا پيانوۆا شاقىرىلدى. قازان ايىندا ق.جەتپىسباەۆتىڭ «بالا مەرگەن» ەرتەگىسىنىڭ پرەمەراسى وتەدى.