استانا كۇنىنە وراي اباي ەسكەرتكىشىنىڭ جانىندا كىتاپ جانە پوەزيا فەستيۆالى ۇيىمداستىرىلدى. «استانا – باعى بيىك اسقارىمسىڭ» اتتى مەرەكەلىك شاراعا ەلوردالىق زيالى قاۋىم مەن مەكتەپ وقۋشىلارى قاتىستى. حالىقارالىق «الاش» ادەبي سىيلىعىنىڭ لاۋرەاتى, اقىن سەرىك تۇرعىنبەكۇلى باستاعان كوپشىلىك الدىمەن ەسكەرتكىشكە گۇل شوقتارىن قويدى. انالار تاتتىدەن شاشۋ شاشتى.
باسقوسۋدا استانا قالاسى تىلدەردى دامىتۋ باسقارماسىنىڭ باسشىسى ەربول تىلەشوۆ سويلەپ, قاتىسۋشىلاردى ەلوردا مەرەكەسىمەن قۇتتىقتادى. «بۇل توي – ءبىلىمنىڭ, عىلىمنىڭ, ءتىلدىڭ, مادەنيەتتىڭ, جاقسىلىقتىڭ مەرەكەسى. باس شاھارىمىزدىڭ سالتاناتى جاراسىپ, وركەندەي بەرسىن!» دەدى ەربول ەردەمبەكۇلى.
فەستيۆال «مەن – ەلىمنىڭ تىرەگى» جانە «استانانىڭ ءار كەلبەتى ولەڭمەنەن ورىلگەن…» اتتى جىر سايىستارىمەن جالعاستى. مۇندا استانالىق جەتكىنشەكتەر تۋعان قالالارى جايىنداعى جۇرەكجاردى لەبىزدەرىن جىرعا سىيدىردى. جاس اقىنداردىڭ ولەڭدەرى ورتالىقتاندىرىلعان كىتاپحانالار جۇيەسىنىڭ استانا كۇنىنە ارنالعان باسىلىمىندا جاريالاناتىنىن ايتادى ۇيىمداستىرۋشىلار. ەلوردا تويىمەن ورايلاسقان «بالدىرعان» جۋرنالىنىڭ 55 جىلدىق مەرەيتويى دا وسى شارادان تىس قالعان جوق. باستاۋىش سىنىپ وقۋشىلارى اقىن مۇزافار الىمباەۆتىڭ ولەڭدەرىن مانەرلەپ وقۋدان سىنعا ءتۇستى. جەڭىمپازدار باعالى سىيلىقتارمەن, ديپلومدارمەن ماراپاتتالدى.
شارا سوڭىندا «جاڭارعان دالام, جاسارعان قالام, شارىقتا, مەنىڭ استانام» اتتى كوركەم سۋرەتتى كىتاپ كورمەسى مەن جارمەڭكەسى ۇيىمداستىرىلدى.
شاحناز اسحاتقىزى
