ەلوردادا «اناما قاراپ بوي تۇزەيمىن» اتتى ۇلتتىق بايقاۋ ءوتتى, دەپ حابارلايدى astana-akshamy.kz
جوبانىڭ باستى ماقساتى – ۇرپاق تاربيەسىن ۇلاعاتتاۋ. تالانتتى, يبالى, يناباتتى قىزدار مەن ولارعا ونەگەلى تاربيە بەرىپ وتىرعان انالاردى ناسيحاتتاۋ.
جۋرناليست باعداگۇل راحمەتقىزىنىڭ اۆتورلىق جوباسى 2022 جىلى – بالالار جىلىنا وراي وتباسىلىق قۇندىلىقتاردى دارىپتەۋ, اناسى مەن قىزى اراسىنداعى ادەمى ادەپتى كورسەتۋ ماقساتىندا باستاۋ العان.
بيىل بايقاۋعا 7 ۇمىتكەر قاتىستى. ولار استانا قالاسى, اقمولا, قاراعاندى جانە جامبىل وبلىسىنان كەلدى.
بايقاۋ 4 كەزەڭنەن تۇرادى. ولار: تانىستىرۋ جانە ونەر كورسەتۋ ءبولىمى; سالت-داستۇرىمىزدەن كورىنىس; سالت-داستۇرگە بايلانىستى سۇراق-جاۋاپ, ماقال-ماتەلدەردىڭ جالعاسىن تابۋ, ۇلتتىق تاعام ازىرلەۋ جانە قولونەر تۋىندىلارىن تانىستىرۋ.
ال بايقاۋعا, بەلگىلى ءانشى مايرا ءىلياسوۆا, قوعام قايراتكەرى ورازگۇل اسانقازى, ۇلتتىق ونەر ديزاينەرى ىرزا تۇرسىنزادا, جۋرناليست باعداگۇل راحمەتوۆا ت.ب. قازىلىق ەتتى.
«بۇل باعدارلامانىڭ ۇلتىمىزعا بەرەرى مول. قازاق دەگەن حالقىمىزدىڭ, ۇلتتىق قۇندىلىعىن عاسىرلاردان-عاسىرلارعا جەتكىزەمىز دەيتىن بولساق, اۋەلى انالارعا كوڭىل ءبولۋىمىز كەرەك. سوندىقتان وسىنداي جوبالاردىڭ ماڭىزى زور دەپ بىلەمىن», – دەيدى بەلگىلى قوعام قايراتكەرى ورازگۇل اسانعازىقىزى.
ادىلقازىلار شەشىمىمەن باس جۇلدە جامبىل وبلىسىنان كەلگەن شاكيزات مىڭبوسىنوۆاعا بۇيىردى.
باس جۇلدە يەگەرلەرى كاتار مەملەكەتىنە 1 اپتاعا تەگىن دەمالىس ۇتىپ الدى.
«ۇلتتىق سالت-داستۇرلەرىمىزدى جاڭعىرتاتىن جوبانىڭ جاناشىرى رەتىندە باس دەمەۋشى بولۋعا شەشىم قابىلدادىق. وسىمەن 3-ءشى جىل قاتارىنان بايقاۋعا سىي دايىنداپ كەلەمىز. بيىل دا باس جۇلدەگە كاتارعا جولدامانى تىكتىك. جەڭىمپاز اناسى مەن قىزى قوناقۇيى, تاماعى, جولى تەگىن جولدامامەن شەتەلدە ءبىر اپتا دەمالىپ كەلەتىن بولادى», – دەيدى تۋريستىك اگەنتتىكتىڭ ديرەكتورى دينارا اسانوۆا.
سونداي-اق ەكى 1-ءشى ورىندى شىنار باتتالوۆا مەن مايرا جايتىنبەكقىزى ءبولىستى. سونىمەن قاتار, 2-ءشى ورىن مەن 3-ءشى ورىن قوس-قوس جۇلدەگەرگە بۇيىردى.
ايتا كەتەيىك, اتالعان جوبا رەسپۋبليكالىق «ارۋ انا» ۇزدىك ايەلدەر جوبالارى كونكۋرسىندا استانا قالاسى بويىنشا 2024 جىلدىڭ ۇزدىك جوباسى دەپ تانىلدى.
