2013 جىلدىڭ 1 قاڭتارىنان باستاپ قازاقستان ۇكىمەتى تابىس دەكلاراتسياسىن جاپپاي رەسمي جاريالاۋدى ەنگىزبەكشى.
وسىعان وراي, جىل باسىنان بەرى 3194 ادام تابىس سالىعىن جاريالاپ تا ۇلگەرىپتى. ولاردىڭ 3035-ءى ايماقتاردا, 99-ى ورتالىق بيلىكتىڭ وكىلدەرى ەكەن. بۇل تۋرالى مالىمەت وسى اپتادا رەسپۋبليكالىق باسىلىم بەتتەرىندە جاريالاندى.
ۇكىمەت باسشىسى كارىم ءماسىموۆتىڭ كوپشىلىككە وسىدان ءۇش جىل بۇرىنعى تابىسى عانا بەلگىلى, ازىرگە. مينيسترلەر كابينەتى باسشىسىنىڭ 2009 جىلعى ايلىق جالاقىسى شامامەن 700 مىڭ تەڭگەنى قۇراعان.
قر قارجى ءمينيسترى بولات جامىشەۆتىڭ 2009 جىلعى تابىسى – 10 ملن 863 مىڭ 976 تەڭگە. ءمينيستردىڭ اتىندا الماتى, استانا قالالارىندا 4 بولمەلى پاتەر, الماتىدا باۋ-باقشاعا ارنالعان 6 سوتىق جەر تەلىمى بار ەكەن.
وقو اكىمى اسقار مىرزاحمەتوۆ 2008 جىلى 5 ملن 356 مىڭ 965 تەڭگە تابىس تاپقان. بانك دەپوزيتىندە 6 ميلليون 883 مىڭ 902 تەڭگە قارجىسى ساقتاۋلى. استانا قالاسىندا پاتەرى, جەر تەلىمى جانە الماتى قالاسىندا ساياجايى بار.
پارلامەنت سەناتىنىڭ دەپۋتاتى ورالباي ابدىكارىموۆتىڭ 2010 جىلعى تابىسى 8 ملن 459 مىڭ 138 تەڭگەنى قۇراپتى. استانا قالاسىندا جەكە پاتەرى, بانكتەگى دەپوزيتىندە 4 ميلليون 840 مىڭ 206 تەڭگە, بانكومات كارتوچكاسىندا 3 ميلليون 949 مىڭ 227 تەڭگە قارجىسى بار.
ماجىلىسمەن مۇرات ابەنوۆتىڭ 2011 جىلعى تازا تابىسى 8 ملن 990 مىڭ 703 تەڭگەنى قۇراعان. ونىڭ ىشىندە تازا جالاقىسى 8 ملن 973 مىڭ 063 تەڭگە.
اقتوبە وبلىسىنىڭ اكىمى ارحيمەد مۇحامبەتوۆتىڭ 2011 جىلعى تابىسى 3,5 ميلليون تەڭگە. ونىڭ يەلىگىندە قالادان ءبىر پاتەر مەن جەر تەلىمى, 2007 جىلى شىققان «تويوتا لەند كرۋزەر» كولىگى بار.
پاۆلودار وبلىسىنىڭ اكىمى ەرلان ارىننىڭ ايلىق ورتاشا جالاقىسى – 443 مىڭ تەڭگە. يەلىگىندە پاۆلودار مەن استانا قالالارىندا 4 بولمەلى پاتەرى بار.
2012 جىلى مەملەكەتتىك قىزمەتكەرلەر, بيۋدجەت سالاسىنىڭ جۇمىسشىلارى, ۇلتتىق كومپانيا مەن مەملەكەتتىك كاسىپورىندار, ال 2013 جىلى بارلىق جەكە تۇلعا ءوزىنىڭ مەنشىگى مەن تابىسى تۋرالى دەكلاراتسياسىن جاريالايتىن كورىنەدى. ءبىز مۇنى ۇدايى نازاردا ۇستاپ وتىراتىن بولامىز.
