قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتى استانا قالاسى بويىنشا باسقارماسىنىڭ مالىمەتتەرىنە سۇيەنسەك, ەلوردادا قىلمىستىڭ دەڭگەيى ايتارلىقتاي تومەندەگەن.
ءبارى – بەينەباقىلاۋدا
قالاداعى ماڭىزدى ساياسي نىسانداردى ايتپاعاندا, رەسپۋبليكالىق جانە حالىقارالىق ماڭىزى بار قوعامدىق-ساياسي ءىس-شارالاردىڭ ءجيى ءوتۋى ەلوردالىق پوليتسەيلەردىڭ كۇشى مەن قۋاتىن قاجەت ەتەدى. ودان بولەك قالا تۇرعىندارىنىڭ تىنىشتىعى ءۇشىن ۇرلىق, توناۋ, الاياقتىق, قاراقشىلىق, كىسى ءولتىرۋ, وزگە دە قىلمىستاردىڭ جولىنا توسقاۋىل بولادى.
قوعامدىق ءتارتىپ پەن قاۋىپسىزدىكتى قاداعالاۋدا استانا قالاسى ىشكى ىستەر دەپارتامەنتى قوعامدىق قاۋىپسىزدىك ءبولىمى قىزمەتكەرلەرىنىڭ كوتەرەر جۇگى اۋىر. بۇگىندە ءتارتىپ ساقشىلارى باس قالاداعى جاعدايدى تۇراقتى قاداعالاپ كەلەدى. كۇن بولسىن, ءتۇن بولسىن, ەلوردالىقتاردىڭ تىنىشتىعىن كۇزەتەدى. ءار اۋدان, ءار كوشە بويىنشا بولىنگەن ۋچاسكەلىك ينسپەكتورلاردىڭ مىندەتى جىلدان جىلعا ارتۋدا, ويتكەنى, قالا حالقىنىڭ تەز قارقىنمەن ءوسۋى قاۋىپسىزدىك سالاسىنا سالماق تۇسىرۋدە.
مامانداردىڭ ايتۋىنشا, قالا تىنىشتىعى قالىپتى, ءومىر سۇرۋگە جايلى. تەحنولوگيانىڭ تاپ دامىعان زامانى, قاۋىپسىزدىك سالاسىنىڭ جۇمىسىن الدەقايدا جەڭىلدەتتى. ماسەلەن, سوڭعى ۋاقىتتا كولىك ۇرلاۋ نەمەسە كوشە قۋىستارىندا ورىن الاتىن ۇساق قىلمىستىق وقيعالاردىڭ ارتى ءبىر ساعاتقا جەتپەي اشىلۋدا. سەبەبى, ءبارى – بەينەباقىلاۋدا. وسى ۋاقىتقا دەيىن بەينەكامەرالاردىڭ كومەگىمەن بىرنەشە مىڭ قۇقىقبۇزۋشىلىقتىڭ ءىزى سۋىماي اشىلعان.
ايتا كەتۋ كەرەك, جىل سايىن بەينەباقىلاۋ جۇيەلەرى جەتىلىپ كەلەدى. ونىڭ ىشىندە ينتەللەكتۋالدى بەينە جاساي الاتىن قۇرالدى ەرەكشە اتاپ ايتقان ءجون. شەتەلدىك مامانداردىڭ كومەگىمەن «Smart Astana» جوباسى اياسىندا, الداعى ۋاقىتتا ون مىڭعا جۋىق ينتەللەكتۋالدى بەينەكامەرالاردى ورناتۋ كوزدەلۋدە. وسىلايشا قالا ءجۇز پايىز باقىلاۋدا بولماق.
كوشە قيىلىستارىندا مۇنداي باقىلاۋ كامەرالارىنىڭ ماڭىزدىلىعىن تۇسىنگەن تۇرعىندار ءوز ۇيلەرىنە دە ورناتۋدى مىقتاپ قولعا العان. ماسەلەن, الماتى اۋدانىندا «قاۋىپسىز قالا» باعدارلاماسى شەڭبەرىندە بىلتىردان بەرى بەينەكامەرا ورناتۋدىڭ وڭ تاجىريبەسى حالىققا ءتۇسىندىرىلىپ كەلەدى.
بۇل رەتتە «سكيف», «كامەننىي», «ەدەم پالاس», «ناش دوم نس», «گراند استانا», «سەزام» تۇرعىن ءۇي كەشەندەرىندە جالپى سانى – 47 بەينەباقىلاۋ جۇيەسى جۇمىس ىستەيدى. بيىل «گۇلدەر» جانە «ءال فارابي استانا-2008» پاتەر يەلەرىنىڭ كووپەراتيۆىنە تيەسىلى ءۇيدىڭ تۇرعىندارى 19 بەينەباقىلاۋ جۇيەسىن قوستى. 30 كۇنگە دەيىن ساقتالاتىن جازبادا مونيتور ارقىلى قىلمىستىڭ الدىن الىپ, كىرەبەرىستەر مەن ىرگەلەس اۋماقتاردى تازالايتىن مەكەمەلەردىڭ جۇمىسىن باقىلاۋعا بولادى. اۋلانى لاستاۋ نەمەسە تىيىم سالىنعان اۋماقتا تەمەكى شەگۋشىلەردى اشكەرەلەۋدە اتالمىش كامەرالار تىندىرىمدى تىرلىك اتقارىپ تۇر.
تەمىرجولدا – تەمىردەي ءتارتىپ
توعىز جولدىڭ تورابى تەمىرجول ارقىلى كۇنىنە سان مىڭداعان حالىق كەلىپ كەتىپ جاتادى. باس قالاعا كەلەتىن رەسپۋبليكالىق پويىزداردى قوسپاعاندا, كۇنىنە ونعا جۋىق شەتەلدىك پويىزدار قابىلدانىپ, شىعارىپ سالىنادى.
سىرتتان كەلگەندەردىڭ قۇجاتىن تەكسەرۋ, كوشى-قون ەرەجەسىن بۇزعانداردى ۇستاۋ, حالىقارالىق ىزدەۋدە جۇرگەن قىلمىسكەرلەردى قۇرىقتاۋ استانا قالاسىنىڭ كولىكتەگى ىشكى ىستەر دەپارتامەنتىنىڭ موينىنا جۇكتەلگەن. ساپارجاي مەن اۋەجايدىڭ قاۋىپسىزدىگىن قامتاماسىز ەتۋدە ارنايى جاساقتالعان پاترۋلدىك توپتان بولەك, ەسىرتكى زاتىن تابۋعا كومەكتەسەتىن مامانداندىرىلعان ءيىسشىل يتتەر ءار رەيس سايىن انىقتاۋ- ىزدەستىرۋ جۇمىستارىن جۇرگىزەدى.
دەپارتامەنتتىڭ مالىمەتىنە سەنسەك, مۇنداي ورىنداردا باقىلاۋ كۇشەيتىلگەن رەجيمدە بولعاندىقتان, ازىرگە اۋىر قىلمىستىق وقيعالار تىركەلمەگەن.
ەلوردا – ەلەكتروندى كارتادا
استانا قالاسى ىشكى ىستەر دەپارتامەنتىنىڭ اۋداندىق باسقارمالارىندا كەشەندى پوليتسيا كۇشتەرى جۇمىس ىستەيدى. ءاربىر اۋداندا كۇنىنە 30-عا جۋىق اۆتوپاترۋل جۇمىلدىرىلادى. تاۋلىگىنە 1100 پوليتسيا قىزمەتكەرى تىنىشتىقتى قاداعالايدى.
ءار ايماقتى باقىلاۋعا ءتيىستى 25 ستاتسيونارلىق بەكەت جۇمىس ىستەيدى. ەڭ باستىسى, قالا – ەلەكتروندى كارتادا. بۇل بويىنشا كەزەكشى ءبولىمنىڭ قىزمەتكەرلەرى ەلەكتروندى كارتاعا قاراپ, قالانىڭ بارلىق بولىگىن ءبىر مەزەتتە باقىلايدى. تەحنولوگيانىڭ جەتىستىگى بۇكىل شاھاردى ءبىر كارتاعا سىيدىرىپ تۇر. قالا كوشەلەرىنىڭ قيىلىستارىنا ورناتىلعان بەينەكامەرالار جول كولىك وقيعالارى مەن قوسا ءاربىر پوليتسەيدىڭ قىزمەتىن ءجىتى انىقتايدى. ەلەكتروندى كارتا ءاربىر ساقشىنىڭ قاي اۋداندا, قاي كوشەدە جۇرگەنىن دەمدە ءبىلىپ بەرەدى. بۇل دەگەنىمىز, پوليتسيا ينسپەكتورىنىڭ ءوز مىندەتىن تياناقتى اتقارۋىن مىندەتتەيدى. ورتالىقتاندىرىلعان ارنايى بازا ارقىلى كەرەك مالىمەتىڭدى تابۋ – ءبىر مينۋتتىڭ ەنشىسىندە.
بۇگىندە وزگە وڭىرلەرگە ۇلگى بولاتىن قالادا پوليتسەيلەردىڭ ماتەريالدىق بازاسى دا قالىپتاسقان. قىلمىستىڭ الدىن الۋ شاراسى كەزىندە 2007 جىلى قولدانىسقا ەنگەن «Robinson R-44» تىكۇشاعى, جولسىز جانە ورماندى جەرلەردە اتتى اسكەر جاساقتارى جەدەل ارەكەت ەتۋگە دايىن. جاقىندا عانا دەپارتامەنت قىزمەتكەرلەرى پوليتسەيلەردىڭ ءتول مەرەكەسى قارساڭىندا قالا اكىمدىگىنىڭ قولداۋىمەن سۋ جاڭا 25 كولىككە يە بولدى. مۇنىڭ ءبارى استانانىڭ تىنىشتىعىنا, ەلدىڭ تىنىس-تىرلىگىنىڭ جايلى بولۋىنا وزىندىك سەپتىگىن تيگىزبەك.
گۇلميرا ايماعانبەت
