اقپارات جانە قوعامدىق دامۋ ءمينيسترى دارحان قىدىرالى مەن وقۋ-اعارتۋ ءمينيسترى اسحات ايماعامبەتوۆ استانا قالاسىنداعى «قازپوچتا» اق بولىمشەسىنە بارىپ, بىرقاتار باسىلىمعا جازىلدى.
– وزدەرىڭىزگە بەلگىلى, بيىل پرەزيدەنت تاپسىرماسىنا وراي بالالار جىلى بولىپ جاريالاندى. وسكەلەڭ ۇرپاقتىڭ بولاشاعىنا باسا ءمان بەرۋ – مەملەكەتتىڭ باسىم باعىتىنىڭ ءبىرى.
مەملەكەت باسشىسى قاسىم-جومارت توقاەۆ جاڭا پرەزيدەنتتىك مەرزىمدەگى ءبىرىنشى جارلىعىن اۋىلداردى دامىتۋ ماسەلەسىنە ارناعانى بەلگىلى. سوندىقتان اۋىلداردىڭ باسپاسوزبەن قامتىلۋى, ولارعا باسىلىمداردىڭ ۋاقىتىلى جەتۋى اسا ماڭىزدى. بۇگىنگى جاسالىپ جاتقان ناقتى ىستەر ءوز ناتيجەسىن بەرەدى دەپ ويلايمىن.
«قازپوچتا» اق-پەن اقپارات سالاسىن دامىتۋ بويىنشا ىنتىماقتاستىق تۋرالى مەموراندۋمعا قول قويدىق. ونىڭ اياسىندا رەسپۋبليكالىق جانە وڭىرلىك باسپا باسىلىمدارىن ۋاقىتىلى جەتكىزۋدى جۇزەگە اسىرۋ جونىندە كەلىسىم دە بار. ەندى «post.kz» قوسىمشاسى ارقىلى ونلاين جازىلۋعا دا بولادى. سونىمەن بىرگە Kaspi Bank ارقىلى جازىلۋ دا پىسىقتالۋدا. جالپى باسپا باسىلىمدارىنا ونلاين جازىلۋ ءۇشىن مينيسترلىك تاراپىنان قولداۋ جۇمىسى جاسالىپ جاتىر. بۇل تۋرالى جاڭالىقتى, بۇيىرسا, الداعى ۋاقىتتا تاعى حابارلايمىز. وسى رەتتە اۋقىمدى جۇمىستاردى قولعا العان «قازپوچتا» اق باسقارما توراعاسى اسەل جاناسوۆاعا ريزاشىلىق بىلدىرەمىن, – دەدى دارحان قۋاندىقۇلى.
قوس مينيستر «قازپوچتانىڭ» بولىمشەسىندە بالالار باسىلىمى «ۇلان», «بالدىرعان», «درۋجنىە رەبياتا», رەسپۋبليكالىق باسىلىمدار «قازاق ادەبيەتى», «انا ءتىلى», «تۇركىستان», «ەگەمەن قازاقستان», «كازاحستانسكايا پراۆدا» گازەتىنە جازىلدى. ءبىزدى قۋانتقانى, مينيسترلەر ەلوردانىڭ ايناسىنا اينالعان, باس قالانىڭ باستى باسىلىمى – «استانا اقشامى», «ۆەچەرنيايا استاناعا» جازىلدى. ءسويتىپ, اقپارات جانە قوعامدىق دامۋ ءمينيسترى دارحان قىدىرالى ءبىر كۇندە ەلوردالىق جۋرناليستەرگە قوس قۋانىش سىيلادى.
