تايلاند كورولدىگى مەن قازاقستان رەسپۋبليكاسى اراسىنداعى ديپلوماتيالىق قاتىناستاردىڭ 30 جىلدىعىنا وراي وتكەن كورمەنىڭ اشىلۋ سالتاناتىنا استانا قالاسى اكىمىنىڭ ورىنباسارى ەرلان بەكمۋرزاەۆ پەن تايلاند كورولدىگى ەلشىلىگىنىڭ وكىلدەرى قاتىستى.
– بۇگىنگى تاڭدا ەكى ەل اراسىنداعى تاۋار اينالىمى 260 ملن دوللاردان اسادى. ونىڭ ىشىندە نەگىزگى باعىتتارى: اۋىل شارۋاشىلىعى تەحنيكاسى, ماشينا جاساۋ, اۋىل شارۋاشىلىعى ونىمدەرى, اۆتوموبيل, قۇرىلىس تەحنيكاسى جانە ت. ب. سونىمەن قاتار ەكى مەملەكەت تۋريزم سالاسىندا وتە بەلسەندى تۇردە ىنتىماقتاستىق ورناتۋدا. ونىڭ بارلىعى تىكەلەي رەيستىڭ قايتا جاندانۋىنىڭ ارقاسىندا بولىپ وتىر. ەگەر پاندەمياعا دەيىنگى كەزەڭدە تۋريستەر اعىنى 50 مىڭ ادامدى قۇراسا, بۇگىندە بۇل كورسەتكىش ارتىپ جاتىر, – دەدى ەرلان بەكمۋرزاەۆ كورمەنىڭ اشىلۋ سالتاناتىندا.
– وسى ءىس-شارانىڭ ارقاسىندا ەكى ەل ازاماتتارى تايلاند پەن قازاقستاننىڭ مادەنيەتى مەن ءومىرىن زەرتتەۋگە كوبىرەك مۇمكىندىك الادى. اتالعان كورمە ەكى ەل اراسىنداعى مادەني بايلانىستى ودان ءارى نىعايتۋعا قىزمەت ەتەتىنىنە سەنىمدىمىن, – دەپ استانا قالاسى اكىمىنىڭ ورىنباسارى وسى كورمەنىڭ ءمان-ماڭىزىنا دا توقتالىپ ءوتتى.
كورمە بارىسىندا بانگكوك قالاسىنان ەكى ەل ەلشىلىگىنىڭ وكىلدەرى مەن استانا قالاسى اكىمىنىڭ ءبىرىنشى ورىنباسارى نۇرلان نۇركەنوۆ تەلەكوپىر ارقىلى تىكەلەي بايلانىسقا قوسىلدى. وسىلايشا كورمە سالتاناتتى تۇردە اشىلدى.
تايلاند قازاقستاننىڭ وڭتۇستىك-شىعىس ازياداعى سەنىمدى سەرىكتەسىنە اينالدى. تايلاند استاناسى – بانگكوك پەن قازاقستاننىڭ باس قالاسى – استانا «باۋىرلاس قالالار» اتاندى.
كورمە 12 اقپانعا دەيىن وتەدى. كورمە قوناقتارى جۇمباق سىرعا تولى مىڭداعان عيباداتحانالار مەن تايلاند تۋرلارى تۋرالى مالىمەتتەرمەن تانىسا الادى.
اياۋلىم سەرىكقىزى
