بۇگىن استانادا «Ipek Kagit Central Asia» اتتى تۇرىك كومپانياسىنىڭ قاعازدان جاسالعان گيگيەنالىق ونىمدەردى شىعاراتىن زاۋىتى اشىلدى. وسىدان ون جىل بۇرىن الماتى قالاسىندا جۇمىسىن باستاعان كاسىپورىن ەندىگى ءىسىن ەلوردادا ورىستەتپەك. «استانا – جاڭا قالا» ارنايى ەكونوميكالىق ايماعىندا ورىن تەپكەن زاۋىت «Selpak» برەندىمەن قاعاز سۇلگىلەردى, مايلىقتاردى, دارەتحانا قاعازىن شىعارادى.
زاۋىت اتشاپتىرىم اۋماقتى (50 مىڭ شارشى مەتر) الىپ جاتىر. ونىڭ وندىرىستىك قۋاتى جىلىنا 17 مىڭ توننا ءونىم بولماق. وندىرىستىك قىزمەتتەردىڭ مامانى انۋاربەك ءنۇسىپتىڭ ايتۋىنشا, مينۋتىنا 650 دانا دارەتحانا قاعازى, 450 دانا قاعاز سۇلگى جانە 1500 دانا مايلىق شىعارىلادى. كاسىپورىن قۇرىلىسىنا 14 ملن دوللار ينۆەستيتسيا قۇيىلدى. جوبا «دامۋ» كاسىپكەرلىكتى دامىتۋ قورىنىڭ شاعىن جانە ورتا بيزنەس سۋبەكتىلەرىن قولداۋعا ارنالعان باعدارلاما اياسىندا جۇزەگە استى.
زاۋىتتىڭ اشىلۋ سالتاناتىنا قاتىسقان تۇركيانىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى نەۆزات ۋيانىك جانە «Eczacibasi Holding Co» كومپانياسىنىڭ ۆيتسە-پرەزيدەنتى حاكان ۋيانىك باۋىرلاس تۇرىك ەلى قازاقستاندا جۇمىس ىستەۋگە اسا ىقىلىستى ەكەنىن اتاپ ءوتتى.
«Ipek Kagit Central Asia» كومپانياسىنىڭ وسىنداي ەكى زاۋىتى تۇركيانىڭ وزىندە جۇمىس ىستەپ وتىر. ەندى جاڭا كاسىپورىندى استانادا اشىپ وتىرعان كومپانيا باسشىلىعى جاڭا نارىققا شىقپاق. اتاپ ايتساق, ءوز ونىمدەرىن قىرعىزستان, تاجىكىستان سىندى ورتا ازيا ەلدەرى مەن رەسەيگە ەكسپورتتاماق. ال, ەلورداداعى زاۋىتقا 80 ادام جۇمىسقا الىندى.
امانعالي قالجانوۆ
