بيىلعى «Astana Marathon-2022» حالىقارالىق جارىسىنا اقش, انگليا, يسپانيا, يتاليا, گوللانديا, وڭتۇستىك كورەيا, وزبەكستان, موڭعوليا جانە قازاقستان سپورتشىلارى قاتىستى. جارىس جولىنا 2,5 مىڭ ادام شىقتى.
مارافونعا, نەگىزىنەن, اۋەسقوي سپورتشىلار, سونىمەن قاتار ەل چەمپيوندارى مەن شەت ەلدەردەن كەلگەن اتلەتتەر قاتىستى.
حالىقارالىق مارافونعا جۇگىرۋشىلەر اراسىندا استانا قالاسىنىڭ اكىمى التاي كولگىنوۆ تە بولدى.
جارىس الدىندا ەلوردا اكىمى قاتىسۋشىلارعا ريزاشىلىعىن ءبىلدىرىپ, ساتتىلىك تىلەدى.
«مەملەكەت باسشىسىنىڭ تاپسىرماسى بويىنشا بۇقارالىق سپورتقا ەرەكشە كوڭىل بولۋدەمىز. قالا تۇرعىندارىنىڭ ءتۇرلى سپورتپەن شۇعىلدانۋى ءۇشىن ءتيىستى سپورتتىق ينفراقۇرىلىمدار اشىپ, بالالار مەن جاسوسپىرىمدەر سپورت مەكتەپتەرىنە قولداۋ كورسەتىپ جاتىرمىز. ەلوردانى سپورتتىق كلاستەرى جاقسى دامىعان قالا دەپ اتاۋعا بولادى. شىنايى پەيىلدەرىڭىزبەن بۇگىنگى جەكسەنبىنىڭ تاڭىندا ۇيىمداستىرىلعان شاراعا قاتىسۋعا بەلسەندىلىك تانىتقاندارىڭىزعا العىسىمدى ايتامىن. قالا كوشەلەرىنىڭ بويىمەن جوڭكىگەن بۇلتتارمەن جارىسا مەجەگە جەڭىل جەتۋلەرىڭىزگە ساتتىلىك تىلەيمىن!» دەدى ەلوردا اكىمى ا.كولگىنوۆ.
كۇن جاڭبىرلى بولعانمەن, جارىسقا كەلگەن سپورتشىلاردىڭ جۇزىنەن ەشقانداي قوبالجۋ بايقالمادى, كەرىسىنشە, جۇگىرۋگە دەگەن قۇلشىنىستى بىلدىرگەن كوڭىلدى كۇي اڭعارىلدى.
ال جارىستىڭ وزىنە كەلەر بولساق, 42,2 شاقىرىمدىق كلاسسيكالىق مارافوندا مارە سىزىعىن ءبىرىنشى بولىپ امان نۇركەلدى كەسىپ, حالىقارالىق جارىستىڭ التىن مەدالىن يەلەندى. ال ەكىنشى ورىندى اكىم ەركەباي ەنشىلەسە, قولا جۇلدەگە دارحان ىسكەندىر قول سوزدى. ايەلدەر اراسىندا ءبىرىنشى ورىندى اسەل قابىلبەكوۆا, ەكىنشى ورىندى اناستاسيا ماجانسكايا يەلەندى. ال ءۇشىنشى ورىندى تاتيانا مولچانوۆا ولجالادى.
جارىستىڭ ەكىنشى ءتۇرى – 10 شاقىرىمدىق جارىستا ەرلەر اراسىندا ءبىرىنشى ورىندى ۆاديم لەۆچەنكوۆ, ەكىنشى ورىندى دميتري ششەگلوۆ يەلەنسە, ۇزدىك ۇشتىكتى ءالىمجان بالتابەك ءتۇيىندەدى. ال ايەلدەر باسەكەسىندە ءبىرىنشى ورىندى ايگۇل ارجانيكوۆا, كۇمىس جۇلدەنى گۇلميرا امەنوۆا يەلەنسە, پولينا گلۋششەنكو ءۇشىنشى ورىننان كورىندى.
بيىلعى «Astana Marathon 2022» اياسىندا ەڭ جىلدام 10 قازاقستاندىق جۇگىرۋ كلۋبى ەنەتىن «كوشباسشىلار تاقتاسى» رەيتينگىسى ىسكە قوسىلدى.
ءداستۇرلى «Astana Marathon»-عا قاتىسۋشىلاردىڭ قاتارى جىلدان-جىلعا ارتىپ كەلە جاتقانى بايقالدى. بۇل جارىسقا شەتەلدىك اتلەتتەردىڭ دە قىزىعۋشىلىعى ارتىپ كەلەدى.
