كەشە «حان شاتىردى» جاعالاي قونعان ەتنواۋىلدا «مىڭجىلدىقتار توعىسىنداعى استانا» كوشپەندىلەر وركەنيەتى فەستيۆالى اشىلدى. ونىڭ اشىلۋىنا كۋا بولعان ساۋىقشىل جۇرت ەجەلگى تىرشىلىگى قىزۋ قايناعان قازاق تۇرمىسىنىڭ زامانىنا تاپ كەلگەندەي اسەر الدى. وسىدان التى عاسىر بۇرىن قۇرىلعان قازاق حاندىعى كەزەڭىندەگى ءومىردى, اتاعى الىسقا كەتكەن قاراوتكەل جارمەڭكەسىن جاڭعىرتقان فەستيۆال اتموسفەراسىمەن استانا اكىمى ادىلبەك جاقسىبەكوۆ تانىسىپ شىقتى. الدا ءالى بىرنەشە كۇنگە سوزىلىپ, 6 شىلدە كۇنى «كوشپەندىلەر ءتۇنى» شاراسىمەن جابىلاتىن ۇلى دالا وركەنيەتى مەرەكەسىنىڭ باعدارلاماسى سان قىزىققا كەڭەلتەدى. العاشقى كۇننىڭ وزىنە جوسپارلانعان ون بەس شاقتى شارانىڭ تۇسكە دەيىن وتكەندەرىن تاماشالادىق.
اتشاپتىرىم اۋماقتى الىپ جاتقان ەتنواۋىل قاپتالدارىنا بىرنەشە اقشاڭقان كيىز ءۇي تىگىلدى. ورتاداعى حاننىڭ سارايىنداي ۇلكەن شاتىردا ءداستۇرلى مۋزىكا شالقىدى. ەلىمىزدىڭ تۇكپىر-تۇكپىرىنەن كەلگەن ونەرپازدار – «سازگەن سازى» فولكلورلىق-ەتنوگرافيالىق ءانسامبلى, سەرىك ساريەۆتىڭ «جورعا» بي مەكتەبى, «ناز» مەملەكەتتىك بي تەاترى, ارقا انشىلىك ونەرىنىڭ بەلدى وكىلدەرىنىڭ قاتارىنان ورىن العان ەرلان رىسقالي مەن ارداق يساتاەۆا ءبىرجاننىڭ, اسەتتىڭ شوقتىعى بيىك تۋىندىلارى مەن حالىق اندەرىن ناشىنە كەلتىرىپ ورىندادى.
اۋىلعا كىرە بەرىستىڭ سول قاپتالىندا ورنالاسقان «كيىز قالاشىقتاعى» بالالار الاڭقايىندا بالدىرعاندار ءبىراز قىزىققا باتتى. اسىرەسە, «اسفالتتا ءوسىپ كەلە جاتقان» قالانىڭ بالالارى جاساندى جىلقى مەن تۇيەلەرگە ءمىنىپ تەربەلدى. اسىق ويناپ, كيىز ءۇيدى كۇراستىرۋدىڭ قىر-سىرىنا بويلادى. نە كەرەك, ايتەۋىر «حان شاتىردىڭ» اۋماعىنا كەلىپ, قازاقتىڭ قاراشاڭىراعى – اۋىلعا بارىپ كەلگەندەي بولدى.
قولونەرشىلەر ءوز قولدارىنان شىققان اسىل جانە تۇرمىستىق بۇيىمداردىڭ ساۋداسىن قىزدىردى.
كوپشىلىكتى, اسىرەسە «ازيا جاڭعىرىعى – 2013» حالىقارالىق تسيرك ونەرى فەستيۆالىنىڭ جەڭىمپازدارى, ەلورداعا ارنايى كەلگەن وزبەك اكروباتتارى, اعايىندى بەكزوت جانە شامشەيت تاشكەنباەۆتاردىڭ ونەرى ءتانتى قىلدى.
«ات جالىندا» اتاۋىن العان شاباندوزدار دۋمانى كادىمگىدەي ساحنالىق قويىلىممەن باستالدى. وعان قاتىسقاندار تۇيەلى كوشتى, جورىقتان جەڭىسپەن ورالعان حاندى قارسى الۋ ءراسىمىن كورسەتتى. «نوماد» كاسكادەرلىق توبى قازاقتىڭ اتتىڭ ۇستىندە وتەتىن اۋدارىسپاق, قىز قۋ, تەڭگە ءىلۋ سىندى ۇلتتىق ويىندارىن كورسەتىپ, سەمسەرلەسۋ, جەبە مەن نايزا قاداۋ سەكىلدى جاۋىنگەرلىك ونەردەن حابار بەردى.
ەتنواۋىل جايعاسقان الاڭدا ابايدىڭ جانە مۇحيتتىڭ تۋىندىلارى شالقىدى. «تۋعاندا دۇنيە ەسىگىن اشادى ولەڭ» دەمەكشى, عۇرىپتىق اندەرگە دە ورىن تابىلدى. سول كۇنگى فەستيۆال باعدارلاماسى ۇلتىمىزدىڭ تاعى ءبىر حالىقتىق جورالعىسى – «ەرۋلىك» اتتى سازدى-ەتنوگرافيالىق شارامەن جابىلدى.
امانعالي قالجانوۆ
