-سايلاۋعا قاتىسۋ مەن تاڭداۋىڭدى جاساۋ – ازاماتتىق بورىشىمىز! بۇگىن الاتاڭنان تۇرىپ, سايلاۋ ۋچاسكەسىنە اعىلعان حالىقتىڭ قاراسىن كورىپ, وسى ءسوز بىردەن ءتىلىمنىڭ ۇشىنا ورالا كەتتى! ءاربىر سايلاۋشىنىڭ تاۋەلسىز قازاقستاننىڭ ەرتەڭى ءۇشىن ءوز تاڭداۋىن جاساۋى – ءبىزدىڭ سايلاۋ مادەنيەتىمىزدىڭ وسكەنىن كورسەتەدى. داۋىس بەرۋگە كەلىپ جاتقان ادامداردىڭ اراسىنان كوپ جاستاردى كورگەندە كەۋدەمدى قۋانىش, ءسۇيىنىش سەزىمى بيلەپ الدى! – دەپ استانا قالاسىنداعى سارىارقا اۋدانىنداعى №147 سايلاۋ ۋچاسكەسىنىڭ توراعاسى ايتبەك كارىبجانوۆ ءوزىنىڭ وي-پىكىرىمەن ءبولىستى.
ونىڭ ايتۋىنشا, ساعات 10.00-دەگى مالىمەت بويىنشا سايلاۋشىلار تىزىمىندەگى 2618 ادامنىڭ 218-ءى داۋىس بەرگەن. بۇعان دەيىنگى سايلاۋ ناۋقاندارىندا دا قىزمەت ەتكەن ايتبەك انۋاربەكۇلىنىڭ ءوزى دە ەلدىڭ ەرتەڭىنە زور سەنىممەن قارايدى. «ءاربىر سايلاۋ – قوعام, ەل ءۇشىن وزگەرىستىڭ, جاڭا ءومىردىڭ باستالاتىن ۋاقىتى. مىنە, وسى وزگەرىستى قالايتىن, ءوز ەلىنىڭ بۇگىنى مەن ەرتەڭىنە نەمقۇرايدى قارامايتىن ءاربىر ازامات ءوز تاڭداۋىن جاساپ, قالاعان ۇمىتكەرىنە داۋىس بەرۋى كەرەك. جاڭا قازاقستاننىڭ جاڭا تاريحىنىڭ پاراعىن ءبارىمىز بىرگە جازايىق!» دەيدى ول.
