بۇگىن ەلوردا تورىندە زاماناۋي ونەر تۋىندىلارىنىڭ ناسيحاتتاۋعا ارنالعان سۋرەتشىلەردىڭ حالىقارالىق بيەننالە سايىسى سالتاناتتى تۇردە شىمىلدىعىن اشتى. ايتۋلى شاراعا ەلىمىزدىڭ تانىمال سۋرەتشىلەرى مەن شەتەلدەن كەلگەن بەينەلەۋ ونەرىنىڭ شاباندوزدارى قاتىستى.
شەتەلدىك قوناقتار قاتارىندا لەونيد گومونوۆ (بەلارۋسسيا), Marin Giuliano (يتاليا), Fordin Isabelle (فرانتسيا), Ferrazzo Monia (اقش), Podlaska Dorota (پولشا), رافاەل اليەۆ (ازەربايجان) جانە باسقالارى بار.
-الەمدەگى ەڭ اتاقتى ۆەنەتسياندىق بيەننالە – 1895 جىلدان بەرى ءوتىپ كەلەدى. ول ەۋروپالىق ونەر مەكتەبىن قالىپتاستىرىپ, ولاردىڭ تۋىندىلارىن دۇنيە جۇزىنە تارالۋىنا ىقپال ەتكەن. بۇل ءداستۇر حح عاسىردا دا جالعاسىن تاۋىپ, ۇزدىك تۋىندىلاردىڭ كورمەسىنە اينالدى. بۇگىن تۇساۋى كەسىلگەن استانالىق بيەننالە – رەسپۋبليكا دەڭگەيىندەگى وقيعا دەپ باعالاۋعا بولادى. سونىمەن قاتار, باس قالامىزدىڭ كەلبەتىن كەسكىندەيتىن اتاقتى سۋرەتشىلەردىڭ تۋىندىلارىنىڭ جازىلۋىنا مۇمكىندىك جاساۋ دا وسى شارانىڭ ماقساتى – دەدى استانا قالاسى سۋرەتشىلەر وداعىنىڭ باسقارما توراعاسى, قر مادەنيەت قايراتكەرى توقتار ەرمەكوۆ.
الداعى جەتى كۇنگە جوسپارلانىپ وتىرعان بيىك ونەر ءداستۇرى بىرنەشە شارالار دى قامتيدى. شەبەرلىك سىنىپتارىن وتكىزۋ جوسپارلانعان. ال قادىرلى قوناقتاردىڭ تاڭداۋى – استانانىڭ ورتالىق باعى, ەسىل وزەنى جاعالاۋى جانە سۋلى جاسىل جەلەكتىڭ بويىنا ءتۇسىپ وتىر. ولار وسى جەرلەردى شىعارماشىلىق الاڭعا اينالدىرماق. شارا سوڭىندا قالا تۇرعىندارى مەن قوناقتارى قىلقالام يەلەرىنىڭ قيالىنداعى ارمان قالانىڭ بەينەسىن تاماشالاي الاتىن بولادى. الەمدىك ونەر كەڭىستىگىنە باستايىن بۇل شارا قالا اكىمدىگىنىڭ قولداۋىمەن جۇزەگە اسىرىلۋدا.
ايگۇل ۋايسوۆا
