بەسىنشى شاقىرىلىم بەلەستەرى
پارلامەنت دەپۋتاتتارى ەكى سەسسيا جۇمىسىندا قانداي زاڭدار قابىلدادى؟
ەلىمىزدىڭ باستى قۇجاتى كونستيتۋتسيا بولسا, ودان كەيىنگى سۇيەنەرىمىز – قوس پالاتالى پارلامەنت ازىرلەگەن زاڭدار ءارى ەلىمىزدىڭ اتا زاڭىندا پارلامەنتكە بيلىكتىڭ ءبىر تارماعى رەتىندە ايرىقشا ءمان بەرىلەدى.
جازعى دەمالىستان سوڭ 2 قىركۇيەك كۇنى پارلامەنت ءوز جۇمىسىن قايتا باستايدى. قازىردە ونىڭ قاراۋىندا 35 زاڭ جوباسى جاتىر. ال بۇدان بۇرىن, ءبىرىنشى جانە ەكىنشى سەسسيا وتىرىستارىن قوسقاندا دەپۋتاتتار كەيبىر زاڭدارعا وزگەرىستەر مەن تولىقتىرۋلار ەنگىزدى, كەيبىر زاڭداردى جاڭادان جازدى. جالپى العاندا 132 زاڭدى تالقىلارىنان وتكىزدى. وسى V شاقىرىلىم دەپۋتاتتارى قابىلداعان ماڭىزدى-ماڭىزدى دەگەن زاڭدار قانداي؟ ولار قوعام ومىرىنە نەندەي وزگەرىس اكەلدى؟ از-كەم شولۋ جاساپ كورەلىك.
رامىزدەردى قورلاما
2007 جىلدىڭ 4 ماۋسىمىندا «قازاقستان رەسپۋبليكاسىنىڭ مەملەكەتتىك رامىزدەرى تۋرالى» زاڭى قابىلداندى. سودان بەرى جىل سايىن وسى كۇنى مەملەكەتتىك رامىزدەر كۇنىن اتاپ ءوتىپ كەلەمىز. رامىزدەرىمىزبەن تىكەلەي بايلانىستى ۇلت پاتريوتتارىنىڭ اشۋىن تۋعىزعان كەلەڭسىز فاكتىلەر دە كەزدەستى. سول كەزدە ولار «رامىزدەرىمىزدى قورلاعانداردىڭ جازاسى جوق پا؟» دەپ ويلاعاندارى دا داۋ تۋدىرمايدى. جازا بار ەكەن. وتكەن جىلدىڭ 28 ماۋسىمىندا قابىلدانعان «قازاقستان رەسپۋبليكاسىنىڭ كەيبiر زاڭنامالىق اكتiلەرiنە مەملەكەتتiك رامiزدەر ماسەلەلەرi بويىنشا وزگەرiستەر مەن تولىقتىرۋلار ەنگiزۋ تۋرالى» زاڭىنىڭ 317-بابىن قاراساڭىز, وندا مەملەكەتتىك رامىزدەردى قورلاعاندارعا ءبىر مىڭنان ەكى مىڭعا دەيىن ايلىق ەسەپتىك كورسەتكىش كولەمىندە ايىپپۇل سالىناتىنى نەمەسە ءبىر جىلعا دەيiنگi مەرزiمگە باس بوستاندىعى شەكتەلەتىنى, ايتپەسە, ناق سول مەرزiمگە باس بوستاندىعىنان ايىرىلاتىنى ايتىلعان. ەسەپكە سالساق, رامىزدەرىمىزدى قورلاعاندار ەڭ كەمى 1 ميلليون 730 مىڭ تەڭگە ايىپپۇل تولەۋلەرى كەرەك. بىزدىڭشە, وتە ءادىل.
ۇرلىق ءتۇبى – تۇتىلۋ,
تۇتىلۋ ءتۇبى – ۇتىلۋ
ءسىز ەلەكتر قۋاتىن ۇرلاپ كوردىڭىز بە؟ مۇنداي سۇراقتى وسىنداي وقيعالار قوعامدا ءالى دە كەزدەسەتىندىكتەن قويىپ وتىرمىز. ارينە, كوپ ادامدار ونداي ارەكەتكە ساراڭدىقتان ەمەس, ماجبۇرلىكتەن بارىپ جاتادى. ايلىعى شايلىعىنا جەتپەيتىن بولعاسىن نەمەسە مۇلدە جۇمىسسىز قالعاندىقتان كوممۋنالدىق تولەمدەردى تولەۋگە شاماسى كەلمەيدى. سول كەزدە ۇيگە كەلەتىن توق كوزدەرىن ەنەرگيا تاراتاتىن مەكەمەلەر قيىپ كەتەدى. وندايدا ەلەكتر ەنەرگياسىن زاڭسىز قوسىپ الاسىز. بىراق, زاڭسىزدىقتىڭ اتى – زاڭسىزدىق, ول ءۇشىن جاۋاپكەرشىلىككە تارتىلاسىز. جىلۋ ەنەرگياسى مەن سۋدى ۇرلايتىن بولساڭىز دا سولاي. بىلتىر 4 شىلدەدە قابىلدانعان «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ەلەكتر ەنەرگەتيكاسى, تابيعي مونوپوليالار مەن رەتتەلەتىن نارىق سۋبەكتىلەرىنىڭ ينۆەستيتسيالىق قىزمەتى ءماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭىنىڭ 127-بابى وسىلاي دەيدى. وقىپ كورىڭىز: «1. ەلەكتر جانە (نەمەسە) جىلۋ ەنەرگياسىن پايداكۇنەمدiك ماقساتتا زاڭسىز قوسۋ, پايدالانۋ – جەكە تۇلعالارعا – ەلۋ, لاۋازىمدى ادامدارعا, دارا كاسiپكەرلەرگە – ءجۇز, شاعىن نەمەسە ورتا كاسiپكەرلiك سۋبەكتiلەرi نەمەسە كوممەرتسيالىق ەمەس ۇيىمدار بولىپ تابىلاتىن زاڭدى تۇلعالارعا – ەكى ءجۇز, iرi كاسiپكەرلiك سۋبەكتiلەرi بولىپ تابىلاتىن زاڭدى تۇلعالارعا بەس ءجۇز ايلىق ەسەپتىك كورسەتكىش مولشەرiندە ايىپپۇل سالۋعا اكەپ سوعادى.
2. سۋ قۇبىرلارى جەلiلەرiنەن سۋدى پايداكۇنەمدiك ماقساتتا زاڭسىز قوسۋ, پايدالانۋ, سول سياقتى كارiزدiك جەلiلەرگە زاڭسىز قوسۋ – جەكە تۇلعالارعا – وتىز, لاۋازىمدى ادامدارعا, جەكە كاسiپكەرلەرگە – الپىس, شاعىن نەمەسە ورتا كاسiپكەرلiك سۋبەكتiلەرi نەمەسە كوممەرتسيالىق ەمەس ۇيىمدار بولىپ تابىلاتىن زاڭدى تۇلعالارعا – ءجۇز ەلۋ, iرi كاسiپكەرلiك سۋبەكتiلەرi بولىپ تابىلاتىن زاڭدى تۇلعالارعا ءۇش ءجۇز ايلىق ەسەپتىك كورسەتكىش مولشەرiندە ايىپپۇل سالۋعا اكەپ سوعادى». سوندا جەكە تۇلعا رەتىندە ەلەكتر نەمەسە جىلۋ ەنەرگيالارىن ۇرلاپ ۇستالساڭىز, 90 مىڭ تەڭگەگە جۋىق, سۋدى ۇرلاساڭىز, 50 مىڭنان اسا تەڭگە ايىپپۇل تولەيسىز. ول سىزگە كەرەك پە؟
ونوماستيكالىق اتاۋلار بىرىزدەندىرىلدى
اعىمداعى جىلدىڭ 21 قاڭتارىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ونوماستيكا ماسەلەلەرى بويىنشا ءوزگەرىستەر مەن تولىقتىرۋلار ەنگىزۋ تۋرالى» زاڭى قابىلداندى. زاڭ قابىلدانعاننان كەيىن ونوماستيكالىق اتاۋ بەرۋدىڭ ءتارتىبى وزگەرتىلدى. ەندى كوشەگە اتاۋ جەرگىلىكتى اتقارۋشى بيلىكتىڭ شەشىمىمەن بەرىلە سالمايدى. ۇسىنىلعان اتاۋ ۇكىمەت جانىنداعى ونوماستيكا كوميسسياسى قاراپ, ماقۇلداعان جاعدايدا عانا بەرىلەدى نەمەسە وزگەرتىلەدى. وسىنداي تالاپتان كەيىن ونوماستيكالىق اتاۋلارداعى بەيبەرەكەتتىك جويىلۋى ءتيىس.
ەلباسى وشىرگەن «ءورت»
وسى جازدا ءبىراز داۋ تۋدىرىپ بارىپ قابىلدانعان «قازاقستان رەسپۋبليكاسىندا زەينەتاقىمەن قامسىزداندىرۋ تۋرالى» زاڭ وسى ماسەلەنى رەتتەيدى. زاڭ قابىلدانباي تۇرعاندا حالىقتىڭ ەداۋىر بولىگى ايەلدەردىڭ زەينەتكەرلىككە شىعۋ جاسى ەر ادامدارمەن تەڭەستىرىلگەنىنە نارازى بولاتىن. ەلباسىنىڭ ءوزى ارالاسىپ, مالىمدەمە جاساعاننان كەيىن تۇتانىپ بارا جاتقان ءورت ءوشتى. نۇرسۇلتان ءابىشۇلى ءبارىن ءوز ورنىنا قويدى. ياعني, الداعى 4,5 جىل كولەمىندە ايەلدەر بۇرىنعىداي 58 جاسىندا زەينەتكەرلىككە شىعا بەرەدى. تەك 2018 جىلدىڭ 1 قاڭتارىنان باستاپ قانا وعان جارتى جىل قوسىلادى. ءسويتىپ ءار جىل سايىن جارتى جىلدان قوسىلىپ وتىرىپ, 2027 جىلى عانا ايەلدەر زەينەتكەرلىككە 63 جاسىندا شىعا باستايدى. سونداي-اق, وسى زاڭ بىرىڭعاي زەينەتاقى جيناقتاۋشى قورىنىڭ قۇرىلۋىنا نەگىز بەردى.
كوپتەن بەرگى كۇرمەۋدىڭ شەشىمدەرى
«قازاقستان رەسپۋبليكاسىنداعى زەينەتاقىمەن قامسىزداندىرۋ تۋرالى» زاڭى سەكىلدى پارلامەنتتىڭ V شاقىرىلىم دەپۋتاتتارى تاعى بىرنەشە جاڭا زاڭداردىڭ قابىلدانۋىنا مۇرىندىق بولدى. اتاپ ايتاتىن بولساق, «قازاقستان رەسپۋبليكاسىنىڭ مەملەكەتتىك شەكاراسى تۋرالى», «جەكە باستى كۋالاندىراتىن قۇجاتتار تۋرالى», «قازاقستان رەسپۋبليكاسىنىڭ ۇلتتىق كاسىپكەرلەر پالاتاسى تۋرالى» سىندى زاڭدار كوپتەن بەرگى كۇرمەۋلى ءماسەلەلەردىڭ ءتۇيىنىن شەشەرى انىق.
ەلىمىزدە ۇلى وتان سوعىسىنىڭ ارداگەرلەرىمەن قاتار اۋعان سوعىسىنىڭ جانە چەرنوبىل ارداگەرلەرى بار. ال وسى كەيىنگى اتالعانداردىڭ ستاتۋسى ايقىندالماعان. ولاردىڭ ستاتۋسىن پارلامەنتتە ءبىراز جىل قابىلدانباي جاتىپ قالعان«ارداگەرلەر تۋرالى» زاڭ ايقىندايدى دەپ ەستيمىز. كىم بىلەدى, V شاقىرىلىم دەپۋتاتتارى مۇنى بىرجاقتى قىلار.
امانعالي قالجانوۆ