استانا قالاسىنىڭ اكىمى التاي كولگىنوۆ مەكتەپ جانە كوللەدج مۇعالىمدەرىمەن كەزدەسىپ, ءبىلىم بەرۋ سالاسىن ودان ءارى دامىتۋ, وقۋ ورىندارىن سالۋ, ينكليۋزيا كابينەتتەرىن اشۋ, گرانت ءبولۋ سەكىلدى وزەكتى ماسەلەلەردى تالقىلادى.
«وقۋ ورىندارىنىڭ قۇرىلىسىن جۇرگىزۋگە, ءبىلىم بەرۋ ساپاسىن ارتتىرۋعا, جۇمىس ىستەۋ ءۇشىن قولايلى جاعداي جاساۋعا بىردەي كوڭىل بولەمىز. ەڭ الدىمەن, جاس مامانداردى قىزىقتىرۋ ماقساتىندا جىل سايىن ءبىلىم گرانتىن بولەمىز. ماسەلەن, 3 جىل ىشىندە 1400 گرانت بەرىلگەن بولسا, بيىل 1 مىڭنان استام ءبىلىم گرانتىن بولدىك. سول سياقتى جەكە ينۆەستوردىڭ ەسەبىنەن پەداگوگيكالىق ينستيتۋت سالۋدى جوسپارلاپ وتىرمىز. ءبىلىم بەرۋ سالاسىنىڭ قىزمەتكەرلەرىنە ارنالعان بىرقاتار تۇرعىن ءۇي باعدارلاماسى بار. ەكىنشى ماسەلە – الەۋمەتتىك نىساندار سالۋ. بۇل – جۇيەلى جۇمىسىمىزدىڭ ماڭىزدى باعىتىنىڭ ءبىرى. وسى ماقساتتا 420-دان استام جەر ۋچاسكەسى بەلگىلەندى: مەكتەپ سالۋ ءۇشىن – 158 ۋچاسكە, بالاباقشا ءۇشىن – 185, مەديتسينالىق ورتالىق ءۇشىن (ەمحانا, پەرزەنتحانا, وڭالتۋ ورتالىعى) – تاعى 78 ۋچاسكە. الەۋمەتتىك نىسانداردى سالۋ ءۇشىن جەر ۋچاسكەلەرىنىڭ سانىن جىل سايىن ۇلعايتامىز» دەدى قالا باسشىسى.
اكىم 2019 جىلدان باستاپ 93 مىڭ وقۋشىعا ارنالعان (2 اۋىسىمدا) 45 مەكتەپ سالىنعانىن ايتتى. ونىڭ 9-ى بيىلعى وقۋ جىلىندا اشىلادى.
«جايلى مەكتەپ» ۇلتتىق جوباسى اياسىندا 84 مىڭنان استام وقۋشىعا ارنالعان (2 اۋىسىمدا) 23 اسا ءىرى مەكتەپتى جوبالاۋ جۇمىسى باستالدى. ولاردىڭ قۇرىلىسىن كەلەسى جىلى باستايمىز. سول سياقتى 40-قا جۋىق وقۋ ورنىندا (مەكتەپ, بالاباقشا, كوللەدج) كۇردەلى جانە اعىمداعى جوندەۋ جۇمىسى جۇرگىزىلدى, مەكتەپ كىتاپحانالارىنىڭ 38 پايىزى جاڭعىرتىلدى, بىرقاتار قوسىمشا ءبىلىم بەرۋ ورتالىعى, ونىڭ ىشىندە شاحمات ۇيىرمەلەرى اشىلدى» دەدى ول.
ەرەكشە قاجەتتىلىگى بار جانداردىڭ كەدەرگىسىز ءومىر ءسۇرۋى ءۇشىن جايلى ورتا قۇرۋ جۇمىسى جالعاسادى.
«بيىل قىركۇيەك ايىنان باستاپ كورۋ قابىلەتى بۇزىلعان بالالارعا ارنالعان 4 ارنايى سىنىپ اشتىق. ال جەلتوقسان ايىندا اۋتيزممەن اۋىراتىن بالالاردى قولداۋ ورتالىعىن اشۋدى جوسپارلاپ وتىرمىز. جوعارىدا اتالعان ءىس-شارانىڭ ءبارىن ءارى قاراي دامىتۋدى جالعاستىرامىز. ءبىلىم بەرۋ سالاسىنىڭ ماماندارىمەن وتەتىن تۇراقتى كەزدەسۋلەر پروبلەمالاردى جىلدام شەشۋگە, سول سياقتى جوسپارىمىزعا مىندەتتەر ەنگىزۋگە مۇمكىندىك بەرەدى» دەپ ءسوزىن تۇيىندەدى التاي كولگىنوۆ.
