ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ 20 جىلدىق مەرەيتويىنا بايلانىستى ەلباسى نۇرسۇلتان نازارباەۆ قۇتتىقتاۋ حات جولدادى. ونىڭ ءماتىنىن سالتاناتتى جيىنعا قاتىسقان مەملەكەتتىك حاتشى گۇلشارا ءابدىقالىقوۆا وقىپ بەردى.
پرەزيدەنت ءوز سوزىندە استانالىق ءبىلىم ورداسىن بىلىكتى ماماندار دايارلاۋدا ءاردايىم العى شەپتەن كورۋگە ءۇمىتتى ەكەنىن ايتىپ, ۋنيۆەرسيتەتكە جارقىن بولاشاق تىلەگەن. سونداي-اق, استانا قالاسى اكىمىنىڭ ورىنباسارى ەرمەك امانشاەۆ قالىڭ قاۋىم الدىندا ەلوردا اكىمىنىڭ قۇتتىقتاۋىن جەتكىزدى. «العاش قۇرىلعاننان بەرى ەۋرازيا ۇلتتىق ۋنيۆەرسيتەتى ەلىمىزگە اسا قاجەتتى, پاراساتتى, كاسىبي مامانداردى دايارلاپ كەلەدى. ۋنيۆەرسيتەت ديپلومى بۇگىنگى تاڭدا جوعارى مارتەبەگە يە. ءبىتىرۋشى تۇلەكتەر وتاندىق جانە حالىقارالىق بيزنەس سالاسىندا, مەملەكەتتىك باسقارۋ مەكەمەلەرىندە, الەۋمەتتىك, مادەني, ساياسي ومىرىمىزدە جەمىستى ەڭبەك ەتىپ ءجۇر. ولار – قاشاندا جوعارى سۇرانىسقا يە ماماندار» دەلىنگەن اكىم قۇتتىقتاۋىندا.
بۇدان كەيىن ءبىلىم ورداسىنىڭ قازىرگى جانە بۇرىنعى رەكتورلارىنا مەرەيتويلىق ەسكەرتكىش مەدال تابىس ەتىلدى.
ۋنيۆەرسيتەتتىڭ تۋعان كۇنىنە ارنالعان مەرەكەلىك باعدارلاما «كۇلتەگىن اماناتىمەن» باستالدى. كۇلتەگىننىڭ وبرازىن قاللەكي تەاترىنىڭ اكتەرى قۋاندىق قىستىقباەۆ سومدادى. ءداستۇرلى ءانشى ەرلان رىسقالي, تانىمال وپەرا ءانشىسى مايرا مۇحامەدقىزى, «استانا وپەرا» بالەت تەاترىنىڭ ونەر ۇجىمى, سونداي-اق ۋنيۆەرسيتەتتىڭ تالانتتى ستۋدەنتتەرى مەرەكە كوركىن قىزدىردى. سالتاناتتى شارا وردالى وقۋ ورنىنىڭ الاڭىندا ۇيىمداستىرىلعان كونتسەرتكە ۇلاستى.
اتاپ وتەيىك, ل.گۋميلەۆ اتىنداعى ەۋرازيا ۇلتتىق ۋنيۆەرسيتەتى – ەلىمىزدەگى جوعارى وقۋ ورىندارى اراسىندا توپ باستاۋشىلاردىڭ ءبىرى عانا ەمەس, نەبارى 20 جىل ىشىندە تالاي حالىقارالىق, رەسپۋبليكالىق رەيتينگىلەر مەن ساراپتاۋلاردا لايىقتى ورىنداردان كورىنىپ, الەم ارەناسىندا وزىق وقۋ ورىندارىنىڭ قاتارىنان ورىن تەپكەن وقۋ ورداسى. ءبىلىم ۇيىمىندا بۇگىندە 13 فاكۋلتەت, 65 كافەدرا, ونداعان زەرتحانالار جۇمىس ىستەيدى. جىل سايىن مۇندا ءۇش جارىم مىڭداي جاس وقۋ ءبىتىرىپ شىعادى. ال, 2015 جىلعى تۇلەكتەردىڭ جۇمىسقا ورنالاسۋ كورسەتكىشى 87 پايىزدى قۇرايدى.
ءمادينا جاقىپ
