جەمقورلىقتى جويۋدىڭ جولى قانداي؟
مەملەكەت باسشىسى «100 ناقتى قادام» ۇلت جوسپارىندا جەمقورلىقپەن كۇرەستى كۇشەيتۋ ماسەلەسىنە ايرىقشا ءمان بەرىپ, وسىعان بايلانىستى جاڭا زاڭنامالار ازىرلەۋ, جەمقورلىق قۇقىق بۇزۋشىلىقتىڭ الدىن الۋ جانە ساۋىقتىرۋ ءۇشىن ارنايى ءبولىم قۇرۋ جونىندە تاپسىرما بەرگەنى بەلگىلى.
وسىعان بايلانىستى بيىلعى جىلدىڭ 1 قاڭتارىنان باستاپ مەملەكەتتىك قىزمەت تۋرالى جاڭا زاڭ قابىلداندى. وندا سىبايلاس جەمقورلىقپەن كۇرەسۋدى كۇشەيتۋ باعىتىندا بىرقاتار تالاپتار قويىلعان. ايتالىق, مەملەكەتتىك قىزمەت تۋرالى زاڭنامادا سىبايلاس جەمقورلىققا قارسى مىنەز-قۇلىق نورمالارى قاراستىرىلعان. قانداي دا ءبىر سىبايلاستىق ارەكەتى ءۇشىن لاۋازىمدى تۇلعالارعا جاۋاپكەرشىلىك كۇشەيگەن. ءتىپتى, جوعارى ورگانداردىڭ باسشىلارى, اكىمدەر وزدەرى جەمقورلىق قىلمىسىن جاساماسا دا ولار تاعايىنداعان مەملەكەتتىك قىزمەتكەرلەردە مۇنداي ارەكەت بايقالسا, الگى باسشىنىڭ ءوزى وتستاۆكاعا كەتەدى.
سونىمەن قاتار, مەملەكەتتىك لاۋازىمدارعا زاڭسىز تاعايىنداۋلار, مەملەكەتتىك لاۋازىمدارعا ورنالاسۋعا ارنالعان كونكۋرستىڭ ءتارتىبىن بۇزعاندار, تارتىپتىك جازانى زاڭسىز بەرگەندەر دە قاتاڭ جاۋاپكەرشىلىككە تارتىلادى.
جوعارىدا اتالعان جۇمىستاردىڭ ءبارى سىبايلاس جەمقورلىقتى ازايتۋ مەن الدىن الۋعا نەگىزدەلگەن. پرەزيدەنت باس بولىپ, جەمقورلىقتى اۋىزدىقتاۋعا بايلانىستى كوپتەگەن شارالار جاسالىپ جاتىر. ءبىر عانا مىسال, وسىدان ەكى جىلداي بۇرىن ەلىمىزدە مەملەكەت باسشىسىنىڭ جارلىعىمەن قازاقستان رەسپۋبليكاسىنىڭ 2015-2025 جىلدارعا ارنالعان سىبايلاس جەمقورلىققا قارسى ستراتەگياسى بەكىتىلدى. بۇل باعدارلامالىق قۇجاتتا سىبايلاس جەمقورلىققا قارسى بارلىق ءىس-قيمىل تىزبەكتەلگەن. ونىڭ ماقساتى – جەمقورلىقتى تۇبىرىمەن قىسقارتۋ, جەمقورلىق تاۋەكەلدەرىن انىقتاۋ جانە جويۋ, وسىعان قاتىستى حالىققا كەڭىنەن مالىمەت بەرىپ, جۇرتشىلىقتىڭ جەمقورلىققا قارسى مادەنيەت دەڭگەيىن جوعارىلاتۋ.
قازاقستان رەسپۋبليكاسى مەملەكەتتىك قىزمەت ىستەرى مينيسترلىگىنىڭ استانا قالاسى بويىنشا دەپارتامەنتى – سىبايلاس جەمقورلىقپەن كۇرەسەتىن بىردەن-ءبىر مەكەمە. دەپارتامەنت سىبايلاس جەمقورلىقتىڭ الدىن الۋ ماقساتىندا مەملەكەتتىك ورگانداردىڭ قىزمەتىن باقىلاۋ, باعالاۋ, ساراپتاۋ باعىتىندا تۇراقتى تەكسەرۋلەر وتكىزىپ تۇرادى. بىلتىر ورتالىق مەملەكەتتىك ورگانداردىڭ 12 اۋماقتىق, جەرگىلىكتى اتقارۋ ورگاندارىنىڭ 16 قۇرىلىمدىق بولىمشەسىنىڭ قىزمەتىنە باقىلاۋ جۇرگىزىلىپتى. سونىڭ قورىتىندىسىندا جەمقورلىققا جول اشقان 170 جاعداي مەن 38 جاسىرىن مەملەكەتتىك قىزمەت كورسەتۋ انىقتالعان.
ال بيىلعى قاڭتار-ءساۋىر ايلارى ارالىعىندا جەمقورلىق تاۋەكەلدەرىن انىقتاۋ ساراپتاماسى بويىنشا كۆازيمەملەكەتتىك سەكتور سۋبەكتىلەرى مەن مەملەكەتتىك مەكەمەلەردە جەمقورلىققا ارەكەت ەتۋدىڭ 98 وقيعاسى انىقتالعان. ونىڭ 41-ءى – مەملەكەتتىك قىزمەت سالاسىندا بايقالعان. ال 21-ءى – جاسىرىن مەملەكەتتىك قىزمەت كورسەتۋ بولعان.
بۇعان قوسا, استانا قالاسى بويىنشا دەپارتامەنت جەمقورلىققا قارسى مادەنيەتتى قالىپتاستىرۋ ماقساتىندا 34 سەمينار, 8 ءدارىس, 6 دوڭگەلەك ۇستەل جيىنىن وتكىزىپتى.
مەملەكەتتىك قىزمەتتەردە جەمقورلىقتى ازايتۋ ماقساتىندا قر مەملەكەتتىك قىزمەت ىستەرى مينيسترلىگى ءاربىر مەملەكەتتىك ورگاننىڭ سايتىندا كەمشىلىكتەردى انىقتاۋ ءۇشىن جۇرتشىلىق اراسىندا ساۋالناما جۇرگىزۋ, جەمقورلىقتىڭ الدىن الۋعا بايلانىستى مەملەكەتتىك مەكەمەلەر قانداي شارالار جاساپ وتىرعانى جونىندە ەسەبىن ەنگىزۋ سىندى ۇسىنىستار قاراستىرعان. جەمقورلىققا قارسى مونيتورينگتى جەتىلدىرۋگە باعىتتالعان بۇل شارالار استانا قالاسىندا دا قولداۋعا يە بولدى.
جالپى سىبايلاس جەمقورلىقپەن تابىستى كۇرەسەتىن ەلدەردىڭ تاجىريبەسىن زەردەلەسەك, ولار ۇلكەن جەمقورلىققا جول ۇساق ادەپسىزدىكتەن, بىرەۋدىڭ قۇقىن بۇزۋدان باستالاتىنىن تۇسىنگەن. سوندىقتان بۇل ەلدەردە ونىڭ الدىن-الۋعا ەرەكشە ءمان بەرەدى. ءبىزدىڭ ەلىمىزدە دە «مۇلدەم توزبەۋشىلىك» قاعيداتى بار. قازاقستاندا پارا الۋشى عانا ەمەس, پارا بەرۋشى دە جاۋاپكەرشىلىككە تارتىلادى. سوندىقتان تەك مەملەكەتتىك قىزمەتكەر عانا ەمەس, ءار ازامات سىبايلاس جەمقورلىقتى بولدىرماۋ شارالارىن قاراستىرىپ, كىشكەنتاي ادەپسىزدىكتىڭ وزىنە نەمقۇرايلى قاراماۋ كەرەك. ۇساق بۇزاقىلىقتىڭ ءوزى ۇلكەن قىلمىسقا جەتەلەيتىنىن ەشكىم ەستەن شىعارماۋعا ءتيىس.
قىمبات توقتامۇرات