نۇر-سۇلتان قالاسىندا ۆاكتسينا العاندار اراسىندا وتكەن ۇتىس ويىنىندا باعى جانعان ەلوردا تۇرعىنى اسەمگۇل ىسقاقوۆاعا ەكى بولمەلى پاتەرگە يەلىك ەتۋ سەرتيفيكاتى تاپسىرىلدى. ونى ۇتىس يەسىنە «GPark» قۇرىلىس كومپانيالار توبىنىڭ جەتەكشىسى عابيت ساتماعامبەتوۆ ءوز قولىمەن تاپسىردى.
بۇل سەرتيفيكات اسەمگۇلگە «GPark» قۇرىلىس كومپانيالار توبى قۇرىلىسىن جۇرگىزىپ جاتقان «Rio De Janeiro» تۇرعىن ءۇي كەشەنىنەن ءوز قالاعان كەز كەلگەن ەكى بولمەلى پاتەردى يەلەنۋگە مۇمكىندىك بەرەدى.
– كوروناۆيرۋستىق ينفەكتسياعا قارسى جاپپاي ۆاكتسينا سالۋدى ءبىزدىڭ كومپانيا ۇجىمى العاشقىلاردىڭ ءبىرى بولىپ قولدادى. قىزمەتكەرلەرگە ۇلگى بولۋ ماقساتىندا ءوزىم ۆاكتسينانىڭ ەكى كومپونەنتىن دە ناۋرىز ايىندا الدىم.
كەيىنىرەك اكىمدىك قالا تۇرعىندارىن ەكپە الۋعا ىنتالاندىرۋ ماقساتىندا ۇتىس ويىنىن وتكىزگەلى جاتقانىن ەستىگەندە دەمەۋشىلىك جاساۋعا قۋانا كەلىستىم.
جەڭىمپاز بۇگىن-اق ءبىزدىڭ ماركەتينگ ءبولىمىنىڭ ماماندارىمەن بىرگە ءوز پاتەرىن تاڭداي الادى. ول پاتەرىنىڭ قاي پودەزدە, قانداي قاباتتا بولاتىنىن دا ءوزى شەشەدى, – دەيدى «GPark» قۇرىلىس كومپانيالار توبىنىڭ جەتەكشىسى عابيت ساتماعامبەتوۆ.
ال ءوزىن جانە وتباسىن قاۋىپتى ىندەتتەن ساقتاۋ ماقساتىندا ەكپە الامىن دەپ, باسپاناعا قول جەتكىزگەن اسەمگۇلدىڭ قۋانىشىندا شەك جوق.
– شىنىمدى ايتسام, ۇتىس ويىنى بولعان كۇنگە دەيىن ەكپە العاندار اراسىندا پاتەر ويناتىلىپ جاتقانىن ەستىمەپپىن. سوندىقتان دا بولار, تۋعان اپكەم قۋانىشتى حاباردى جەتكىزگەن كەزدە سەنە قويمادىم. كەيىننەن اكىمدىكتەن حابارلاسىپ, ۇتىس يەسى ەكەنىمدى ايتقاندا عانا بارىپ سەندىم.
ۆاكتسينانى جولداسىم جانە ۇلكەن قىزىممەن بىرگە №7 قالالىق ەمحانادا سالدىردىم. ول كەزدە ۇتىس ويىنىنا قاتىسىپ, پاتەرگە يە بولۋ دەگەن وي بولمادى. بار بولعانى ءوزىمدى جانە وتباسىمدى ىندەتتەن ساقتاعىم كەلدى. بىلتىر ءدال وسى ينفەكتسيانى جۇقتىرىپ, ءبىر اۋىرىپ تۇردىم. سوندىقتان COVID-19-دىڭ قانشالىقتى قاۋىپتى اۋرۋ ەكەنىن جاقسى بىلەمىن.
ونىڭ ۇستىندە نۇرسۇلتان نازارباەۆ اۋەجايىندا قىزمەت ەتەمىن. قىزمەت بارىسىندا قالامىزعا ساپارلاپ كەلگەن ءتۇرلى ادامدارمەن ارالاسامىز. سول سەبەپتەن مەن ۆاكتسينانى ءوزىمدى قورعاۋ ءۇشىن الدىم, – دەيدى ءا.ىسقاقوۆا.
اسەمگۇل ىسقاقوۆا 3 بالاسى جانە جولداسىمەن بىرگە 1 بولمەلى پاتەردە تۇرادى. پاتەرىن كەڭەيتۋدى كوپتەن ارمانداپ جۇرگەن وتباسى مۇنداي توسىنسىيعا ءدان ريزا.
جالپى بۇگىندە نۇر-سۇلتان قالاسىندا ەكپەنىڭ العاشقى كومپەنەنتىن قالا تۇرعىندارىنىڭ 60 پايىزدان استامى الىپ ۇلگەردى. تۇرعىنداردى ىنتالاندىرۋ ماقساتىندا ۆاكتسينا العانداردىڭ اراسىندا 20 iPhوne ماركالى تەلەفون, تۇرمىستىق تەحنيكالاردىڭ ۇتىس ويىنى ۇيىمداستىرىلدى. ۆاكتسيناتسيا پۋنكتتەرى ورنالاسقان ساۋدا-ويىن ساۋىق ورتالىقتارى دا وزدەرىندە ەكپە العاندار اراسىندا كىشىگىرىم كونكۋرستار وتكىزىپ, جەڭىلدىگى بار سەرتيفيكاتتار تابىستادى. قالالىق قوعامدىق دەنساۋلىق ساقتاۋ باسقارماسىنىڭ مالىمەتىنشە, ۇتىس ويىنى # Birge پلاتفورماسىندا وتكەن. ءارى وعان ەكى كومپونەنتتى دە نۇر-سۇلتان قالاسىندا العاندار عانا قاتىسىپتى.
جەڭىمپازعا پاتەردى تارتۋ ەتكەن «GPark» قۇرىلىس كومپانيالار توبىنىڭ جەتەكشىسى عابيت ساتماعامبەتوۆتىڭ قايىرىمدىلىق قورى مۇنداي يگى شارالاردا ۇنەمى بوي كورسەتەدى. جىل باسىنان بەرى قور 17 وتباسىعا باسپانا تارتۋ ەتىپتى. نەگىزىنەن, پاتەر كوپبالالى جانە مۇمكىندىگى شەكتەۋلى بالالاردى تاربيەلەپ وتىرعان وتباسىلار مەن جالعىزباستى انالارعا بەرىلەدى ەكەن. سونداي-اق پاتەر الۋعا ەشقانداي مۇمكىندىگى جوق ازاماتتارعا دا عابيت ساتماعامبەتوۆتىڭ قايىرىمدىلىق قورى قامقورلىق تانىتادى.
قالالىق ءماسليحاتتىڭ دەپۋتاتى رەتىندە عابيت ساتماعامبەتوۆ Nur Otan پارتياسىنىڭ قالالىق فيليالىنداعى قوعامدىق قابىلداۋىنا كەلگەن 5 ازاماتقا پاتەر سىيلاپتى.
