ەكسپوعا بايلانىستى كەيبىر زاڭدارعا وزگەرىستەر ەنگىزىلەدى
ەكسپو مامانداندىرىلعان كورمەسىن وتكىزۋ جانە ۇيىمداستىرۋ بارىسىندا ەلىمىزدىڭ بىرقاتار زاڭدارىنا وزگەرىستەر مەن تولىقتىرۋلار ەنگىزىلمەك. بۇل تۋرالى ورتالىق كوممۋنيكاتسيالار قىزمەتىندە وتكەن بريفينگتە «استانا EXPO-2017» ۇك» اق زاڭ دەپارتامەنتىنىڭ ديرەكتورى مايا ەگىمباەۆا مەن اتالمىش ۇلتتىق كومپانيانىڭ باسقارما توراعاسىنىڭ قۇرىلىس جونىندەگى كەڭەسشىسى قاناعات تىلەمىسوۆ حابارلادى.
3 جەلتوقسان كۇنى ەلباسى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە استانادا ەكسپو-2017 حالىقارالىق مامانداندىرىلعان كورمەسىن ۇيىمداستىرۋ جانە وتكىزۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭىنا قول قويعانى بەلگىلى. وسىعان بايلانىستى قولدانىستاعى 8 زاڭنامالىق اكتىگە جانە بيۋدجەت جانە سالىق كودەكستەرىنە تۇزەتۋلەر قاراستىرىلىپ وتىر. اتاپ ايتقاندا, وسى وزگەرىستەرگە سايكەس, ەكسپو كورمەسىن ۇيىمداستىرۋدى جانە وتكىزۋدى قولعا الاتىن ۇيىمداردى كورپوراتيۆتى كىرىس سالىعى, جەر, مۇلىك سالىقتارىنان جارتىلاي بوساتۋ قاراستىرىلعان.
«ەكسپو سياقتى اۋقىمدى شارانى وتكىزۋ ەلوردامىزبەن قاتار, تۇتاس ەلىمىزدىڭ ەكونوميكالىق جانە ينفراقۇرىلىمدىق دامۋىنا قوسىمشا سەرپىن بەرەدى» دەپ اتاپ وتكەن مايا ەگىمباەۆا «استانا ەكسپو-2017» ۇلتتىق كومپانياسىن مەملەكەتتىك بيۋدجەتتەن جەدەل ماقساتتى سالىم تۇرىندە قارجىلاندىرۋ مۇمكىندىگى دە ەسكەرىلگەنىن جەتكىزدى.
«تەحنيكالىق رەتتەۋ تۋرالى» زاڭىنا ەنگىزىلگەن تولىقتىرۋلار ارقىلى كورمەگە دايىندالۋ جانە ونى وتكىزۋ اياسىندا قىزمەت, جۇمىس جانە تاۋارلارعا قاتىستى شەتەل سەرتيفيكاتتارىن قولدانۋ, ەكسپو وبەكتىلەرىن جوبالاۋ جانە قۇرىلىس جۇرگىزۋ كەزىندە حالىقارالىق ستاندارتتاردى پايدالانۋ ماسەلەلەرى قاراستىرىلىپ وتىر.
ال «حالىقتىڭ كوشى-قونى تۋرالى» زاڭىنداعى وزگەرىستەر ەلىمىزدەگى كورمەگە قاتىسقىسى كەلەتىن شەتەلدىك ازاماتتاردىڭ ۆيزا راسىمدەۋىن جەڭىلدەتەتىن بولادى.
سونىمەن قاتار مايا ەگىمباەۆا «حالىقتى جۇمىسپەن قامتۋ تۋرالى» زاڭنىڭ شەتەلدىك مامانداردى تارتۋ ءراسىمدەرىن جەڭىلدەتۋ بولىگىنە وزگەرتۋلەر ەنگىزىلەتىنىن مالىمدەدى. ءويتكەنى, جاسىل ەكونوميكانى دامىتۋدى نىساناسىنا العان ەكسپو ءۇشىن ەنەرگيا ۇنەمدەۋشى تەحنولوگيالاردى بارىنشا پايدالانۋ اسا ماڭىزدى. ال الەمدە بۇل سالانى تەرەڭ مەڭگەرگەن شەتەلدىك ماماندار بارشىلىق. باستى ماقسات تا سول, بولاشاق ەنەرگياسىن ەنگىزۋگە ماماندانعان شەبەرلەردى ەلىمىزگە تارتۋ, سولاردىڭ تاجىريبەسىمەن ءبولىسۋ.
كورمەنى وتكىزۋ كەزىندە ءوز ماماندارىمىزعا دەگەن سۇرانىس تا ارتپاق. قازىرگى جوبا بويىنشا تەك ۇيىمداستىرۋ جۇمىستارىنىڭ وزىنە 10 مىڭعا جۋىق مامان كەرەك ەكەن.
ءسوز سوڭىندا مايا ەربولاتقىزى اتالعان زاڭدار رەسمي تۇردە جاريالانعاننان سوڭ 10 كۇننەن كەيىن كۇشىنە ەنەتىنىن ايتا كەتتى.
قىمبات نۇرعالي