ەلوردادا «G-Global – جاھاندىق كوممۋنيكاتسيالاردىڭ جاڭا فورماتى» اتتى ساراپتامالىق فورۋم ءوتتى. ەلباسىنىڭ تىڭ باستاماسىن نەگىزگە العان شارادا سەرپىندى ويلار ايتىلىپ, ماڭىزدى ماسەلەلەر كوتەرىلدى. جيىن سوڭىندا «ەكونوميكالىق زەرتتەۋ ينستيتۋتى» اق-نىڭ پرەزيدەنتى, «ۇلتتىق تالداما ورتالىعى» اق ديرەكتورلار كەڭەسىنىڭ مۇشەسى, پروفەسسور ارىستان ەسەنتۇگەلوۆتى اڭگىمەگە تارتىپ, تىلدەسكەن بولاتىنبىز.
– ارىستان ەسەنتۇگەلۇلى, پرەزيدەنتىمىزدىڭ G-Global باعدارلاماسى ءبىزدىڭ قوعامدا كەڭىنەن تالقىلانىپ, قولداۋ تابۋدا. باستامانىڭ ماڭىزدىلىعىنا توقتالىپ وتسەڭىز.
– الەمدىك ەكونوميكا تۇبەگەيلى وزگەردى. ال, وعان قاتىستى ينستيتۋتتار وزگەرمەي قالدى. قازىرگى ۋاقىتتا ەڭ باستى ماقسات وسى ينستيتۋتتاردى وزگەرىستەرگە ساي بەيىمدەپ, ينفراقۇرىلىمداردى وزگەرتۋ كەرەك. سوندىقتان, وسى تۇرعىدا G-Global وتە باتىل شەشىمدەر ۇسىنىپ, دەر ۋاقىتىندا كوتەرىلىپ وتىر. ويتكەنى, بۇنى الى ەشكىم دە كوتەرگەن جوق.
– داعدارىس الەمنىڭ الپاۋىت ەلدەرىن القىمنان الۋدا. وسى فورۋمنىڭ نەگىزگى تاقىرىبىنا اينالعان باستامانى نەگە وزىمىزدەن تاجىريبەدەن وتكىزبەسكە؟..
– قازىر كەز كەلگەن مەملەكەت جاھاننان تىس ءوز كۇشىمەن داعدارىستان شىعا المايدى. داعدارىستان شىققانمەنەن قايتادان كىرە بەرەدى. سوندىقتان كوپ ماسەلەلەر الەمدىك دەڭگەيدە شەشىلۋى كەرەك. مىنە, قازاقستان مەملەكەتى, ەلباسىمىز جاھاندىق باستاما كوتەردى. قازىرگى ۋاقىتتا الەمنىڭ تۇكپىر-تۇكپىرىندە بۇل ۇسىنىس تالقىلانا باستادى. بۇل ونىڭ پايدالىلىعىن, دەر كەزىندە قوزعالعاندىعىن كورسەتەدى. ەگەر الەمدىك ينستيتۋتتاردى وزگەرىسكە ۇشىراتپاساق, ينفراقۇرىلىمدارىمىزدى بەيىمدەمەسەك, ءبىز ەش ۋاقىتتا دا داعدارىستى ەڭسەرە المايمىز.
– شارا بارىسىندا باسقا دا يگى, ماقساتتى, ماڭىزدى ويلار, ۇسىنىستار ايتىلعان بولار؟
– قازاقستاننىڭ الەم قاۋىمداستىعىنا ۇسىنا الار تاجىريبەلەرى جەتەرلىك. سونىڭ ءبىرى – جاڭا يندۋستريالاندىرۋ پرەزيدەنتتىك باعدارلاماسى. قازاقستاننىڭ يندۋستريالاندىرۋ تاجىريبەسى وتە ۇلگى تۇتارلىق دۇنيە. ويتكەنى, مۇنايعا سەنە بەرۋگە بولمايدى. سوندىقتان, ەكونوميكانى ءارتاراپتاندىرۋ – قازىرگى ۋاقىتتىڭ تالابى. ونىڭ بەر جاعىندا ەڭ ماڭىزدىسى – قازىر العا تۇسىپ وتىرعان قارجىلىق سەكتور. داعدارىس تا سودان باستالادى, دامۋ دا سودان باستالادى. ۇكىمەتتىڭ قولعا الىپ وتىرعان باستى ماسەلەسى – قارجىلىق سالانى قالاي رەفورمالاۋ قاجەت, قالاي وزگەرىستەرگە بەيىمدەۋ كەرەك, قالاي جولعا قويۋ كەرەك. بۇل ۇزاق جۇرەتىن ۇدەرىس, قىسقا ۋاقىتتا شەشىلەتىن ءىس ەمەس. بۇگىن سونى كوتەرۋدەمىز.
اسحات رايقۇل
