كەشە استانا قالاسى قوعامدىق كەڭەسىنىڭ وتىرىسىندا ەلوردانىڭ 2023-2025 جىلدارعا ارنالعان بيۋدجەتىنىڭ جوباسى تالقىلاندى. ءتيىستى باياندامانى قالالىق ەكونوميكا جانە بيۋدجەتتىك جوسپارلاۋ باسقارماسى باسشىسىنىڭ ورىنباسارى ايجان تۇگەلباەۆا جاسادى.
ونىڭ ايتۋىنشا, وسى جىلدىڭ 9 ايىنىڭ قورىتىندىسى قالانىڭ الەۋمەتتىك-ەكونوميكالىق دامۋىندا تۇراقتى ەكونوميكالىق ءوسىم بايقالدى. سونىڭ نەگىزگى كورسەتكىشى – وڭىرلىك ىشكى ءونىم بيىلعى العاشقى جارتىجىلدىعىندا 3 600,0 ملرد تەڭگەنى قۇراپ, وتكەن جىلدىڭ سايكەس كەزەڭىمەن سالىستىرعاندا 3,1 پايىزعا ارتتى. قالا ەكونوميكاسىنا 863,5 ملرد تەنگە قۇيىلدى. بۇل دا بىلتىرعى سايكەس كەزەڭنەن 11,7 پايىزعا كوپ.
قۇرىلىس جۇمىستارىنىڭ كولەمى 439,4 ملرد تەڭگەنى قۇراپ, 1 827,5 مىڭ شارشى مەتر پايدالانۋعا بەرىلدى. شاعىن جانە ورتا بيزنەس سۋبەكتىلەرىنىڭ سانى دا كوبەيدى. ماسەلەن, بيىلعى قاڭتار-قىركۇيەك ايلارىنىڭ ارالىعىندا
186,1 مىڭ جۇمىس ىستەپ جاتقان سۋبەكت تىركەلدى. بۇل دا بىلتىرعى سايكەس كەزەڭمەن سالىستىرعاندا 19,6 پايىزعا كوپ. بيىلعى ءبىرىنشى توقساندا شاعىن جانە ورتا بيزنەس سالاسىندا جۇمىس ىستەپ جاتقان ادامداردىڭ سانى 441,3 مىڭ ادامدى قۇراپ, وتكەن جىلعا قاراعاندا 15,3 پايىزعا كوبەيدى. وسى سالادا وندىرىلگەن ءونىم كولەمى 12,7 پايىزدى قۇراپ, 2 302,9 ملرد تەڭگە بولدى.
ەكونوميكانىڭ تۇراقتى ءوسىمى تۇرعىندار تابىسىنىڭ ارتۋىنا سەپتەسىپ, 2022 جىلدىڭ قاڭتار-ماۋسىمىندا ورتاشا جالاقى 378,1 مىڭ تەڭگەنى قۇرادى. جۇمىسسىزدىق دەڭگەيى بيىلعى ەكىنشى توقساندا 4,7 پايىز شەگىندە. اعىمداعى كەزەڭدە 31 326 جاڭا جۇمىس ورىنى قۇرىلدى. سونىڭ ىشىندە تۇراقتى – 27 527, ۋاقىتشا – 3 799. سونىڭ باسىم كوپشىلىگى شاعىن جانە ورتا بيزنەس سالاسىندا جۇمىس تاپقان. مۇندا 26 097 ورىن قۇرىلدى. 2026 جىلعا دەيىن 10 ملرد تەڭگەگە 12 ينۆەستيتسيالىق جوبانى ىسكە اسىرۋ جوسپارلانعان. وندا يندۋستريالدى پارك اۋماعىندا 900 جۇمىس ورنى قۇرىلادى.
2023-2025 جىلدارى جەكە تابىس كولەمى جالپى 1 688 783,2 ملن تەڭگەنى قۇراماق. ونىڭ باسىم بولىگىن سالىقتىق تۇسىمدەر قۇرايدى. ءۇش جىلدىق بيۋدجەتتىڭ شىعىندارى دا 1 688 783,2 ملن تەڭگەنى قۇراماق.
بايانداماشىنىڭ ايتۋىنشا, رەسپۋبليكالىق بيۋدجەتتەن دامۋعا ارنالعان ماقساتتى ترانسفەرتتەر – 139 ملرد تەڭگە. سونىڭ ىشىندە 2023 جىلعا 102,3 ملرد تەڭگە قالاعا كەلمەك. ال استانا رەسپۋبليكالىق بيۋدجەتكە 70 ملرد تەڭگە مولشەرىندە الىم تولەۋى قاجەت.
ايجان تۇگەلباەۆا قالالىق ءماسليحاتتان باستاپ قالا اكىمدىگىنە, باسقارمالار مەن دەپارتامەنتتەرگە, اۋداندارعا الداعى ءۇش جىلدا بولىنەتىن قارجىنىڭ جوسپارىمەن تانىستىردى.
ونىڭ سوزىنشە, 2023 جىلى ءتورت اۋدانعا بولىنەتىن قارجى 44 ملرد 262,6 ملن تەڭگەنى قۇرايدى. سونىڭ ىشىندە الماتى اۋدانىنىڭ اپپاراتىنا – 10 ملرد 914,9 ملن تەڭگە, بايقوڭىر – 8 ملرد 288,5 ملن تەڭگە, ەسىل – 15 ملرد 272,1 ملن تەڭگە, سارىارقا – 9 ملرد 887,1 ملن تەڭگە.
بايانداماشى وسىلايشا ءار باعدارلاما اكىمشىسىنە بولىنەتىن قارجى كولەمىنە توقتالىپ ءوتتى. ول باياندامانى اياقتاعاننان كەيىن قوعامدىق كەڭەس مۇشەلەرى قالانىڭ ءۇش جىلدىق بيۋدجەتىنىڭ جوباسى بويىنشا ءوز ۇسىنىستارى مەن ويلارىن ايتتى.
