استانا قالالىق اكىمدىگىندە «سۋ تارتۋدىڭ وزەكتى ماسەلەلەرى: اعىندى سۋلاردى تازارتۋ. جاڭبىر سۋى جانە سۋ ءسىڭىرۋ كارىزدەرى» تاقىرىبىندا حالىقارالىق كونفەرەنتسيا ءوتتى. بۇعان استانا قالاسىنىڭ اكىمى اسەت يسەكەشەۆ قاتىستى.
سونداي-اق, جيىنعا بۇۇ دامۋ باعدارلاماسىنىڭ قازاقستانداعى تۇراقتى وكىلى نوريماسا شيمومۋرا, دۇنيەجۇزىلىك دامۋ بانكىنىڭ كەڭەسشىسى ميناحەم ليبحابەر, ەۋروپالىق قايتا قۇرۋ جانە دامۋ بانكىنىڭ وكىلى كريس رودجەرس, قالالىق كوممۋنالدىق شارۋاشىلىق باسقارماسىنىڭ باسشىسى تولەگەن زاكاريانوۆ كەلدى.
الدىمەن ءسوز العان قالا اكىمى جينالعاندارعا استاناداعى سۋ تارتۋ, اعىن سۋلاردى تازارتۋ سالاسىنداعى جالپى جاعدايدى بايانداپ شىقتى. سودان سوڭ سالانىڭ الدا تۇرعان مىندەتتەرىنە توقتالدى.
– قازىر ءبىزدىڭ الدىمىزدا تۇرعان ماقسات – ەلوردانى قاي جاعىنان دا جايلى قالاعا اينالدىرۋ. اسىرەسە, جاۋىن كەزىندە تۋىندايتىن ماسەلەلەر وزەكتى بولىپ وتىر. وسى ورايدا ۇزدىك تەحنولوگيالىق شەشىمدەر ازىرلەۋ وتە ماڭىزدى. بۇل باعىتتا الەمنىڭ الدىڭعى قاتارلى تاجىريبەسىن زەردەلەۋدى ماقسات ەتىپ وتىرمىز. سول ءۇشىن تاقىرىپتىق جوسپارلار ازىرلەنەدى. وسى باعىتتا حالىقارالىق بايقاۋلار ۇيىمداستىرعاندا, وعان مىندەتتى تۇردە ۇزدىك كومپانيالار تارتىلادى. بۇعان, ارينە, وتاندىق تا, شەتەلدىك كومپانيالار دا قاتىسا الادى. كوپتەگەن جوبالار مەملەكەتتىك-جەكەمەنشىك سەرىكتەستىك نەگىزىندە جۇزەگە اسىرىلاتىن بولادى. قازىردىڭ وزىندە شامامەن 100-دەن استام كومپانيا ءوز تەحنولوگياسىن تانىستىرۋعا ىنتا تانىتىپ وتىر, – دەدى اسەت يسەكەشەۆ.
بۇگىندە استانا اكىمدىگىندە سۋ تارتۋ ماسەلەسىن كەشەندى تۇردە شەشۋ ءۇشىن جاڭبىر سۋىن اعىزاتىن كارىز جۇيەسىن ودان ءارى دامىتۋ باعدارلاماسى جاسالىپ جاتقان كورىنەدى. بۇل باعدارلامانى جاساقتاۋعا حالىقارالىق ينستيتۋتتار, بىلىكتى ينجەنەرلەر تارتىلعان. قالالىق كوممۋنالدىق شارۋاشىلىق باسقارماسىنىڭ باسشىسى تولەگەن زاكاريانوۆ كونفەرەنتسيا بارىسىندا كەڭىنەن توقتالدى.
– بۇگىن عانا ۇكىمەت وتىرىسىندا جاڭبىر سۋىن اعىزاتىن كارىزدەر نىساندارىنىڭ قۇرىلىسىن قارجىلاندىرۋ ماسەلەسى قارالدى. سونىڭ ناتيجەسىندە ەلوردانىڭ كارىز كوللەكتورلارى قۇرىلىسىنا 6,75 ملرد تەڭگە ءبولىندى. ءبىز قازىرگى ۋاقىتتا قالادا نوسەر جاۋىندارعا بايلانىستى ورىن الىپ وتىرعان ماسەلەلەردى تولىق شەشۋگە قاجەتتى قارجىمەن قامتاماسىز ەتۋگە مۇمكىندىك بار, – دەدى ت.زاكاريانوۆ.
ونىڭ ايتۋىنشا, قازىرگى ۋاقىتتا قالانىڭ بارلىق اۋماعىنان سۋدى ايدايتىن نىسانداردىڭ ءتىزىمى ازىرلەنگەن. سوعان قاتىستى وسى جىلدان باستاپ ىسكە قوسىلاتىن باعدارلاما دا دايىندالعان. جالپى 2020 جىلعا ارنالعان باعدارلاما اياسىندا 2017-2018 جىلدارى كەشەندى جۇمىستار اتقارىلۋ كوزدەلىپ وتىر. سونىڭ ناتيجەسىندە نوسەر جاڭبىرعا بايلانىستى تۋىندايتىن ماسەلەلەر 2018 جىلدىڭ سوڭىندا تولىق جويىلادى.
كوممۋنالدىق شارۋاشىلىق باسقارماسىنىڭ باسشىسى, سونداي-اق , تالدىكول ماسەلەسىن دە تىلگە تيەك ەتتى. قازىرگى ۋاقىتتا كول تۇبىندەگى تۇنبانىڭ 60 پايىزى تازارتىلعان. سونىڭ ناتيجەسىندە جاعىمسىز ءيىس ءبىرشاما ازايعان. جالپى, كولدى قالپىنا كەلتىرۋ جۇمىستارى جىل اياعىنا دەيىن تولىق اياقتالماق.
ءوز كەزەگىندە ءسوز العان شەتەلدىك ماماندار سۋ تارتۋ, سۋدى تازالاۋ ماسەلەلەرىنە قاتىستى ەۋروپانىڭ وزىق تاجىريبەلەرىن ورتاعا سالدى. وسى باعىتتاعى ءوز ۇسىنىستارىن جەتكىزدى. كونفەرەنتسيا سوڭىندا بارلىق ۇسىنىس-پىكىرلەر ساراپقا سالىندى. ولاردىڭ كوپشىلىگى بۇيىرسا, بولاشاقتا ەلورداداعى سۋ تارتۋ, سۋدى تازالاۋ جۇمىستارىنا قولدانىلاتىن بولادى.
مەڭدوللا شامۇراتوۆ
