2017 جىلدىڭ 1 قاڭتارىنان باستاپ ەل تۇرعىندارى تاپقان تابىسىنىڭ بەلگىلى ءبىر بولىگىن مىندەتتى الەۋمەتتىك مەديتسينالىق ساقتاندىرۋ ء(مامس) قورىنا اۋدارۋدى باستايدى. مامانداردىڭ ايتۋىنشا, اتالمىش جۇيە ەلىمىزدە كەزەڭ-كەزەڭمەن ىسكە اسىرىلادى.
«گەرمانيالىق ساقتاندىرۋ جۇيەسى نەگىزىندە دايىندالعان بۇل قۇجات مەملەكەت باسشىسىنىڭ تاپسىرماسىمەن ازىرلەندى. ياعني, بەس ينستيتۋتسيونالدىق رەفورماعا سايكەس قولعا الىنعان «100 ناقتى قادام» ۇلت جوسپارى اياسىندا قولعا الىنىپ وتىر. جوبانىڭ باستى ماقساتى – 2050 جىلعا دەيىن دامىعان 30 ەلدىڭ قاتارىنا كىرىپ, حالىق دەنساۋلىعىن جاقسارتۋ. جۇمىس بەرۋشىلەر كەلەر جىلدان باستاپ ءار قىزمەتكەرىنىڭ اي سايىنعى كىرىسىنىڭ 2 پايىزىن قورعا اۋدارادى. ونىڭ كولەمى جىل سايىن ءبىر پايىزعا ارتىپ, 2020 جىلى 5 پايىز بولادى. ال قىزمەتكەرلەر تەك 2019 جىلدان باستاپ قانا كىرىسىنىڭ ءبىر پايىزىن, 2020 جىلى 2 پايىزىن قورعا اۋدارادى. ءوزىن-ءوزى جۇمىسپەن قامتىعان ازاماتتاردىڭ جارنا كولەمى 2017 جىلى – 2, 2018 جىلى – 3, 2019 جىلى – 5, 2020 جىلدان باستاپ 7 پايىزعا جەتىپ بارىپ تۇراقتايدى. جوبا كوممەرتسيالىق ماقساتتى كوزدەمەيدى ءارى تولىقتاي مەملەكەت باقىلاۋىندا بولادى» دەيدى دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا.
جاڭا جۇيە ءۇش پاكەتتەن تۇرادى. ونىڭ العاشقىسى بويىنشا جارنا اۋدارعاندارعا مەملەكەت تاراپىنان مەديتسينالىق كومەك تەگىن كورسەتىلمەك. ال ەكىنشىسى جۇيەگە قاتىسۋشى ازاماتتارعا جينالعان قارجىنىڭ ەسەبىنەن كومەك بەرىلەدى. سوڭعىسى بويىنشا مەديتسينالىق ساقتاندىرۋ جۇيەسىنە ازاماتتار قالاۋىنا قاراي مۇشە بولا الادى. سونداي-اق, 15 ءتۇرلى كاتەگورياعا جاتاتىن حالىقتىڭ ءالجۋاز توبىنا مەملەكەتتىڭ ءوزى تولەم جاسايدى.
بۇل جارنالار ناتيجەسىندە وتانداستارىمىزعا مەديتسينالىق قىزمەتتىڭ ەكى پاكەتى ۇسىنىلماق. العاشقىسىنا جەدەل-جاردەم, سانيتارلىق اۆياتسيا, الەۋمەتتىك ماڭىزدى اۋرۋلار, ەكپە جانە شۇعىل جاعدايلاردا كورسەتىلەتىن قىزمەتتەر كىرەدى. ال كەلەسى پاكەت بويىنشا ستاتسيونارلىق ەم, رەابيليتاتسيا, ەمدىك شارالار جانە جوعارعى تەحنولوگيالىق كومەكتەر قاراستىرىلادى.
دەگەنمەن بۇل جۇيە قازاقستان ازاماتتارىنىڭ ەڭبەكاقىسىنا قوسىمشا اۋىرتپالىق جۇكتەمەيدى. قورعا بولىنەتىن جارنالار حالىقتىڭ تابىس سالىعى ەسەبىنەن تولەنەدى. ماسەلەن, 100 مىڭ تەڭگە جالاقى الاتىن قىزمەتكەردىڭ 10 مىڭ تەڭگەسى, ياعني 10 پايىزى تابىس سالىعىنا ۇستالسا, ەندى ول ءۇشىن تەك 8 مىڭ الىنادى. ال قالعان 2 مىڭ تەڭگە مىندەتتى ساقتاندىرۋ قورىنا اۋدارىلاتىن بولادى.
ەسكەرەتىن تاعى ءبىر جايت, ازامات قايتىس بولسا, جينالعان جارنالار تۋىستارىنا بەرىلمەيدى. ال شەتەلگە كوشەتىندەر ءۇشىن ساقتاندىرۋ جيناعى سول ەلدىڭ قورىنا اۋدارىلادى. الايدا, مۇنىڭ بارلىعى تۇرعىنداردىڭ تاڭداۋىنداعى ەلدەرمەن جاسالاتىن كەلىسىمگە بايلانىستى بولماق.
جالپى ەلىمىز بويىنشا مەديتسينالىق كومەك كورسەتۋ ماقساتىندا جىل سايىن 700 ملرد تەڭگە جۇمسالادى ەكەن. ال ەگەر مىندەتتى الەۋمەتتىك مەديتسينالىق ساقتاندىرۋ جۇيەسى ىسكە قوسىلسا, بۇل قارجىنىڭ كولەمى كەمىندە تاعى 350 ملرد تەڭگەگە ارتپاق. ياعني, مەديتسينالىق قىزمەت ساپاسى مەن جۇمسالاتىن قارجى كولەمى ارتادى دەگەن ءسوز. «كەلەر جىلدان باستاپ ەنگىزىلەتىن جاڭا جۇيەنىڭ ءتيىمدى تۇستارى جەتەرلىك. ەڭ باستىسى, مەديتسينالىق قىزمەت ساپاسى ارتىپ, حالىقتىڭ دەنساۋلىعى جاقسارادى. قورعا جۇمىسشىلار عانا ەمەس, جۇمىس بەرۋشىلەر, سونىمەن قاتار, ەل ۇكىمەتى بىرلەسە قارجى اۋدارىپ وتىرادى. الايدا بۇل مىندەتتەردەن الەۋمەتتىك قورعالماعان ءالسىز توپتار بوساتىلادى. قور قۇرىلتايشىسى مەملەكەت بولعاندىقتان, جۇمسالعان ءار تيىننىڭ ەسەبى جاسالادى. سونداي-اق, جەدەل جاردەم قىزمەتى, سانيتارلىق اۆياتسيا, ەكپە ەگۋ ءتارىزدى قىزمەتتەر بۇرىنعىشا ۇكىمەت تاراپىنان قارجىلاندىرىلاتىن بولادى» دەيدى ۇلتتىق عىلىمي مەديتسينالىق ورتالىعى باسقارماسىنىڭ باسشىسى اباي بايگەنجين.
بۇركىت نۇراسىل
