استانادا ەرلى-زايىپتىلار الاياقتىق جولمەن ەر ادامعا پاتەردى جالعا بەرمەك بولعان, – دەپ حابارلايدى astana-akshamy.kz
الماتى اۋدانىنىڭ پوليتسيا بولىمىنە 32 جاستاعى ەر ادام جۇگىنىپ, پاتەر جالداۋ كەزىندە الدانعانىن حابارلادى.
جالعا الۋشى ناجيمەدەنوۆ كوشەسىندەگى پاتەردە جالعا بەرۋشىمەن كەزدەسكەن. قىز تۇرعىن ءۇيدى كورسەتىپ, ودان ءبىر اي بۇرىن 130 مىڭ تەڭگە كولەمىندە الدىن الا تولەم العان. ناتيجەسىندە جالعا الۋشى اقشاسىز جانە پاتەرسىز قالعان.
جەدەل-ىزدەستىرۋ ءىس-شارالارىن جۇرگىزۋ كەزىندە پوليتسەيلەر الاياقتىققا پاتەردى تاۋلىك بويى جالعا العان ەرلى-زايىپتىلاردىڭ قاتىسى بار ەكەنىن انىقتادى. الاياقتىق فاكتىسى بويىنشا قىلمىستىق ءىس قوزعالدى. قازىرگى ۋاقىتتا ەلوردا اۋماعىندا جاسالعان وسىعان ۇقساس قىلمىستارعا قاتىسى بار-جوعى تەكسەرىلىپ جاتىر.
– پوليتسەيلەر ازاماتتارعا الاياقتاردان ساق بولۋدىڭ نەگىزگى ءادىسى, قۇجاتتاردى مۇقيات تەكسەرۋ جانە رەسمي جالداۋ شارتىن جاساۋ ەكەنىن ەسكەرتەدى. الدىن الا تولەم تەك قونىستانعان كەزدە جانە شارتقا قول قويىلعاننان كەيىن جاسالۋى كەرەك. بىرنەشە اي بۇرىن الدىن الا تولەم جاساماڭىز, – دەيدى پوليتسيا قىزمەتكەرلەرى.
