ەلوردادا ءالى دە پاتەرلەرىنىڭ ىشىندە پەش جاعىپ وتىرعان كوپقاباتتى ەسكى ۇيلەر بار. دارەتحانالارى كوشەدە ورنالاسقان مۇنداي توزىعى جەتكەن ۇيلەردىڭ تۇرعىندارى قالا, اۋدان باسشىلارىمەن كەزدەسكەن سايىن بۇل باسپانالاردىڭ قاشان سۇرىلەتىنىن سۇراۋمەن الەك.
استانا اكىمىنىڭ مالىمدەۋىنشە, بيىل وسىنداي 300 وتباسى ەسكىرگەن جانە اپاتتى ۇيلەردەن كوشىرىلەدى.
– ءبىز قالا تۇرعىندارىنىڭ تۇرعىن ءۇي جاعدايىن جاقسارتۋ ءۇشىن جۇمىس ىستەپ جاتىرمىز. بۇل – الەۋمەتتىك پاتەرلەردىڭ قۇرىلىسى, قولجەتىمدى جەڭىلدىكتى تۇرعىن ءۇي باعدارلامالارىنىڭ ىسكە قوسىلۋى, تۇرعىن ءۇي كەشەندەرىن جوندەۋ جانە قۇرىلىسى ۇزاققا سوزىلعان نىسانداردىڭ جۇمىسىن اياقتاۋ. بىراق جۇمىستىڭ تاعى ءبىر بولىگى بار – توزىعى جەتكەن اپاتتى ۇيلەردى بۇزۋ. پەش پاتەرلەردىڭ ىشىندە, ال دارەتحانا كوشەدە ورنالاسقان كوپقاباتتى مۇنداي ۇيلەردىڭ فيزيكالىق توزۋىنا بايلانىستى شاتىر اعىپ, ىرگەتاس سوگىلە باستايدى, ەلەكتر سىمدارى, كارىز پروبلەمالارى تۋىندايدى, – دەدى التاي كولگىنوۆ.
قالا باسشىسى ەكى اپاتتى ءۇيدىڭ تۇرعىندارىمەن كەزدەستى. ايتۋىنشا, ولاردىڭ ءبىرى – سارىارقا اۋدانىنداعى دۇكەنۇلى, 21 مەكەنجايىندا ورنالاسقان بەس قاباتتى جاتاقحانا. بۇل جاتاقحانا بيىل بۇزىلادى.
– ۋگولنايا كوشەسى, 12 ا, بايقوڭىر اۋدانىنداعى قازىرگى ءال-فارابي داڭعىلى, 27-ءۇيدىڭ بويىندا ورنالاسقان اپاتتى ءۇي تۇرعىندارىمەن كەزدەستىم. ءۇيدىڭ توزۋى 75 پايىزدى قۇرايدى. ءۇي اپاتتى دەپ تانىلدى, سونىمەن قاتار بۇزۋ تىزىمىنە ەنگىزىلگەن. تۇرعىندارعا بارلىق قۇجاتتاردى رەتكە كەلتىرۋ قاجەت, – دەدى ەلوردا اكىمى.
سوڭعى ءۇش جىلدا اپاتتى ۇيلەردەن 700-گە جۋىق وتباسى قونىس اۋدارعان. سوڭعى كەزدەرى جەڭىلدىكپەن بەرىلەتىن قولجەتىمدى تۇرعىن ءۇي قۇرىلىسىنىڭ كولەمى ايتارلىقتاي ءوستى.
