15-16 ءساۋىر ارالىعىندا استانادا «TRAVEL Hack: Transformative Routes, Adventure, Vision, Exploration, and Legacy» اتتى رەسپۋبليكالىق حاكاتونى ءوتتى, دەپ حابارلايدى astana-akshamy.kz
شارانى «Kazakh Tourism» ۇلتتىق كومپانياسى» اق قولداۋىمەن Maqsut Narikbayev University ۇيىمداستىردى.
بۇل حاكاتوننىڭ ماقساتى – ستۋدەنتتەردىڭ ستارتاپ جوبالارى مەن تۋريزم سالاسىنداعى كاسىپكەرلىكتى قولداۋ. حاكاتونعا ەلىمىزدىڭ جەتەكشى ۋنيۆەرسيتەتتەرىنەن 100-دەن استام ستۋدەنت قاتىستى. ءىس-شارانىڭ جالپى جۇلدە قورى 1 600 000 تەڭگەنى قۇرادى.
«بۇل حاكاتوننىڭ قاتىسۋشىلارى بولاشاقتا Nasdaq جانە باسقا دا بيرجالاردا ساتىلاتىن جوبالاردى ىسكە قوساتىنىنا سەنەمىن. ستۋدەنتتەر جاھاندىق دەڭگەيدەگى تسيفرلىق شەشىمدەردى جاسايتىن پروۆايدەرلەرگە اينالادى دەگەن ويدامىن. «Kazakh Tourism» ۇلتتىق كومپانياسى رەتىندە بۇل شاراعا قولداۋ كورسەتۋدى جالعاستىرامىز», – دەدى «Kazakh Tourism» باسقارما توراعاسى قايرات سادۋاقاسوۆ.
«بۇل شارا ستۋدەنتتەرگە وزدەرىنىڭ ەڭ جاقسى قاسيەتتەرىن كورسەتۋگە جانە كوماندا قۇرۋعا مۇمكىندىك بەرەدى. ەكى كۇن بويى ولار تەك يدەيامەن عانا ەمەس, ونى جۇزەگە اسىرۋمەن دە اينالىسادى», – دەدى MNU پروۆوستى سەرگەي پەن.
حاكاتوندا ەكوتۋريزم, ينكليۋزيۆتى تۋريزم, كولىك كومپانيالارىنا ارنالعان شەشىمدەر, اعىلشىن تىلىندەگى ونلاين گيدتەر, قوناقۇيلەرگە ارنالعان B2B شەشىمدەرى, تۋريستىك اۆتوبۋستار نارىعى سياقتى ءتۇرلى باعىتتاعى جوبالار ۇسىنىلدى.
ءبىرىنشى ورىندى تۋراگەنتتەردىڭ سەنىمدىلىگىن تەكسەرەتىن جوبانى ازىرلەگەن «Dataflow» كومانداسى الدى. «Sanatopia» توبى ەكىنشى ورىنعا يە بولدى, ولاردىڭ جوباسى قوناقۇيلەردەن كورپوراتيۆتىك باعالاردى الۋ پروتسەسىن تسيفرلاندىرۋعا ارنالدى. «Take over Blur» كومانداسى حاكاتوننىڭ ەكى كۇن بويىنشا تۋريستىك اۆتوبۋستارعا ارنالعان قوسىمشا ازىرلەدى. ال, «Fighting» كومانداسى كورەرمەن كوزايىمى جۇلدەسىن الدى.
بۇل شارا تۋريزم سالاسىنداعى يننوۆاتسيالار مەن يننوۆاتسيالىق شەشىمدەردىڭ ماڭىزدى الاڭىنا اينالدى. جۇلدە قورىنىڭ دەمەۋشىلەرى – «تۋريستىك قامكور» كق, «Caspian Center» جشس جانە «Qazaq Gourmet» مەيرامحاناسى.
