يگىلىك جالبىروۆ, استانا قالالىق سايلاۋ كوميسسياسىنىڭ توراعاسى: ازاماتتىق بەلسەندىلىگىڭ بارىنەن قىمبات
ەلىمىز بويىنشا 5 ساۋىردە سايلاۋ ۋچاسكەلەرى ءوز جۇمىسىن باستادى. وسىعان وراي, ەلەكتورالدى كامپانيا عانا ەمەس, سايلاۋشىلار دا بەلسەندىلىك تانىتۋدا. كەزەكتەن تىس پرەزيدەنت سايلاۋىندا داۋىس بەرەتىن ازاماتتاردىڭ قۇقى تۋرالى دۇيسەنبى كۇنى وتكەن تىكەلەي تىلدەسۋ بارىسىندا قالالىق سايلاۋ كوميسسياسىنىڭ توراعاسى يگىلىك جالبىروۆ ءتۇسىندىردى.
ءانۋار سىرعابەكوۆ:
– باسقا قالادا ۇزاق مەرزىمدى ءىسساپاردا جۇرۋىمە بايلانىستى سايلاۋعا قاتىسا الامىن با؟
– سايلاۋعا وتىز كۇن قالعانعا دەيىن سايلاۋشىنىڭ تۇرعىلىقتى مەكەنجايى بويىنشا سايلاۋعا قاتىسا المايتىنى بەلگىلى بولعان جاعدايدا, ول ءوزىنىڭ اتى-ءجونىن سايلاۋشىلاردىڭ سايكەس تىزىمىنە ەنگىزۋ جونىندە ءىسساپاردا جۇرگەن ەلدىمەكەندەگى جەرگىلىكتى اتقارۋشى ورگانعا جازباشا تۇردە ءوتىنىش بەرىپ, حابارلاسۋعا قۇقىلى. سودان كەيىن جەرگىلىكتى اتقارۋشى ورگان ءسىزدى تۇرعىلىقتى مەكەنجاي بويىنشا سايلاۋشىلار تىزىمىنەن الىپ تاستايدى. ەگەر ءسىز بۇل مۇمكىندىكتى پايدالانباساڭىز, وندا 10 ساۋىردەن باستاپ ءسىز سول ۋچاسكەدەدەن شىعۋ كۋالىگىن الىپ, سول ارقىلى ءوزىڭىز ءىسساپاردا جۇرگەن ەلدىمەكەندە داۋىس بەرۋ قۇقىعىنا يە بولاسىز.
لاريسا پەتروۆنا:
– جولداسىم مۇگەدەك, دەنساۋلىق جاعدايىنا بايلانىستى سايلاۋ ۋچاسكەسىنە كەلە المايدى. ول قالاي داۋىس بەرەدى؟
– دەنساۋلىق جاعدايىنا بايلانىستى سايلاۋ ورنىنا كەلە المايتىن ازاماتتاردىڭ ۇيدە داۋىس بەرۋى دە قاراستىرىلعان. ەگەر ازامات دەنساۋلىق جاعدايىنا بايلانىستى نەمەسە اسا اۋىر حالدەگى ناۋقاسقا كۇتىم جاساۋىنا بايلانىستى سايلاۋ ۋچاسكەسىنە كەلە المايتىن بولسا, وندا ول الدىن الا ۋچاسكەلىك سايلاۋ كوميسسياسىنا, ءۇي جاعدايىندا داۋىس بەرۋ جونىندە ءوتىنىش قالدىرۋعا قۇقىلى. ءوتىنىش 26 ءساۋىر كۇنى ساعات 12-دەن كەشىكتىرىلمەي بەرىلۋى كەرەك. ءوتىنىش جازىلعاننان كەيىن جولداسىڭىز ۇيدە داۋىس بەرە الادى. ۋچاسكەلىك كوميسسيادا ءوتىنىشتىڭ ۇلگىلەرى كورسەتىلگەن. قاجەت بولعان جاعدايدا سايلاۋ كۇنى كوميسسيا مۇشەسى بيۋللەتەن تاستايتىن كوشپەلى جاشىكتى ۇيىڭىزگە الىپ كەلۋ دە قاراستىرىلعان.
ءاليا:
– يگىلىك يمانبايۇلى, ايتىڭىزشى, سايلاۋشىلار تىزىمىنەن ءوز اتى-ءجونىمدى الدىن الا كورۋىمە بولا ما؟
– بۇگىنگى تاڭدا ۋچاسكەلىك سايلاۋ كوميسسيالارىندا سايلاۋشىلار ءتىزىمى جاسالۋدا. ول ازاماتتاردىڭ تانىسۋى ءۇشىن 10 ساۋىردەن كەشىكتىرىلمەي بارلىق ۋچاسكەلەرگە بەرىلەدى. سوندىقتان, ءسىز سايلاۋشى رەتىندە كورسەتىلگەن مەرزىمنەن كەيىن ۋچاسكەلىك سايلاۋ كوميسسياسىنا بارىپ, ءوز اتى-ءجونىڭىزدى سول جەردەن الدىن الا كورە الاسىز. سونىمەن بىرگە ۋچاسكەلىك سايلاۋ كوميسسياسى سايلاۋشىلار ءتىزىمىن ناقتىلايدى. سايلاۋشىلار ءتىزىمىن تولىق قۇرۋ ماقساتىندا ۋچاسكەلىك سايلاۋ كوميسسيالارى حالىققا قىزمەت كورسەتۋ ورتالىقتارىمەن بىرلەسە جۇمىس ىستەۋدە. ەسكەرتەتىن ءبىر ءجايت, سايلاۋ كۇنى سايلاۋ كوميسسياسىنىڭ مۇشەلەرى ءار سايلاۋشىعا جەكە باسىن راستايتىن كۋالىگىن, ۋاقىتشا كۋالىگىن, پاسپورتىن نەمەسە اسكەري بيلەتىن كورسەتكەن جاعدايدا تەك ءبىر عانا بيۋللەتەن بەرەدى.
دميتري سۋحارەۆ:
– باسقا قالادا تىركەۋدەمىن. بىراق, استاناداعى جوعارى وقۋ ورنىندا وقىپ ءجۇرمىن. مەن سايلاۋعا قاتىسا الامىن با؟
– جالپى 10 ساۋىردەن باستاپ ازاماتتاردىڭ تانىسۋى ءۇشىن بارلىق سايلاۋ ۋچاسكەلەرىنە سايلاۋشىلاردىڭ تىزىمدەرى بەرىلەدى. وسى ۋاقىتتان باستاپ 25 ساۋىرگە دەيىنگى مەرزىمدە ءسىز وقىپ جۇرگەن ءبىلىم ورداسىنىڭ مەكەنجايى بويىنشا ەسەپتەن شىعارۋ كۋالىگىن الۋىڭىزعا بولادى. سايلاۋ وتەتىن كۇنى سول كۋالىك ارقىلى داۋىس بەرۋىڭىزگە ابدەن بولادى. ال, ەگەر ءسىز جاتاقحانادا تۇراتىن, كۇندىزگى وقۋ ءبولىمىنىڭ ستۋدەنتى بولساڭىز, ءسىزدىڭ اتى-ءجونىڭىز سول جاتاقحانا ورنالاسقان مەكەنجايداعى سايلاۋشىلار تىزىمىنە ەنگىزىلەدى.
ۆالەنتينا پەتروۆا:
– اجەم اۋرۋحانادا جاتىر. بىراق ول الەۋمەتتىك جاعىنان وتە بەلسەندى ادام. سوندىقتان سايلاۋعا بارا الام با, قاتىسا الماي قالام با دەپ الدەن ۋايىمداپ ءجۇر. ول كىسى قالاي داۋىس بەرەدى؟
– قالاداعى ەمدەۋ مەكەمەلەرىندە دە سايلاۋ ۋچاسكەلەرى ۇيىمداستىرىلعان. سايلاۋ قارساڭىندا سايلاۋشىلاردىڭ ءتىزىمى ەمدەۋ مەكەمەسىنىڭ باس دارىگەرىمەن كەلىسىلە وتىرىپ بەكىتىلەدى. سوندىقتان ەمدەلۋشىلەر دە سايلاۋعا قاتىسا الادى. تەك, ولاردىڭ داۋىس بەرۋى ءۇشىن وزدەرىمەن بىرگە جەكە باستارىن راستايتىن كۋالىكتەرىنىڭ بولۋى شارت.
رامازان:
– وتكەن سايلاۋدا مەنىڭ اتى-ءجونىم سايلاۋشىلار تىزىمىندە بولماي شىقتى. بيىل دا داۋىس بەرۋگە بارعاندا ءدال وسىنداي جاعداي ورىن السا نە ىستەۋىم كەرەك؟
– ازاماتتار تىركەۋدە تۇرعان مەكەنجايى بويىنشا داۋىس بەرە الادى. ەگەر ءسىزدىڭ اتى-ءجونىڭىز سايلاۋشىلاردىڭ تىزىمىندە بولماي شىقسا, وندا ءسىز استانادا تىركەلگەندىگىڭىزدى راستايتىن ءتيىستى قۇجاتىڭىزدى كورسەتۋ ارقىلى داۋىس بەرە الاسىز. سونىمەن بىرگە سايلاۋ كوميسسياسىنىڭ مۇشەلەرى ءسىزدىڭ كەلىسىمىڭىزبەن حالىققا قىزمەت كورسەتۋ ورتالىقتارىنان استانادا تىركەلگەندىگىڭىزدى راستايتىن قۇجاتتى الدىرۋعا قۇقىلى. حالىققا قىزمەت كورسەتۋ ورتالىعىنداعىلار تىركەۋ تۋرالى قۇجاتىڭىزدى راستاسا, سول ساتتە-اق كوميسسيا مۇشەلەرى ءسىزدى سايلاۋشىلار تىزىمىنە ەنگىزەدى.
دايىنداعان:
گۇلبارشىن وكەشقىزى
