استانادا ۇلى جەڭىستىڭ 70 جىلدىعىنا ارنالعان تمد پارلامەنتارالىق اسسامبلەياسىنىڭ «ەستەلىك ەستافەتاسى» اتتى حالىقارالىق اكتسياسى ءوتتى. تمد-عا مۇشە مەملەكەتتەردىڭ پارلامەنتشىلەرى «وتان قورعاۋشىلار» مونۋمەنتىنە گۇل شوقتارىن قويدى.
قر پارلامەنتى سەناتى توراعاسىنىڭ ورىنباسارى قايرات يششانوۆتىڭ ايتۋىنشا, اكتسيا مينسك قالاسىندا باستالىپ, وسىعان دەيىن تمد-نىڭ 8 استاناسىندا وتكىزىلدى. بۇل شارا – سوعىستا قازا تاپقان ميلليونداعان مايدانگەرگە, تىل ەڭبەككەرلەرىنە قۇرمەتتىڭ بەلگىسى.
ازەربايجان پارلامەنتىنىڭ وكىلى رۋفات كۋليەۆ «ءبىز ارداقتى ارداگەرلەرگە قاراعاندا ءوزىمىزدى باقىتتى ۇرپاق سانايمىز. وكىنىشكە قاراي, قارتتاردىڭ سانى كۇن سايىن ازايا تۇسۋدە. جاستار بۇگىنگى بەيبىت كۇن ءۇشىن كىمگە قارىزدار ەكەندەرىن ءبىلۋ كەرەك. مايدانعا 1 ميلليون 200 مىڭ جاۋىنگەر جىبەرگەن قازاق ەلى ۇلى حالىق ەكەنىن ايتقىم كەلەدى. سول جاۋىنگەرلەردىڭ جارتىسى سوعىستان قايتپادى» دەدى.
اكتسيا 16 ءساۋىر كۇنى سانكت-پەتەربۋرگتە اياقتالادى.
