ەلباسى «نۇرلى جول – بولاشاققا باستار جول» جولداۋىندا ەلىمىزدىڭ ەكونوميكالىق-الەۋمەتتىك احۋالىن ءارى قاراي دامىتۋعا, ىسكەرلىك بەلسەندىلىك پەن جۇمىسپەن قامتۋدى ىنتىلاندىرۋعا بايلانىستى جاڭا مىندەتتەر جۇكتەدى. كەزەكتى ەلدىك قۇجات – ەكونوميكانىڭ قوزعالتقىش كۇشى ىسپەتتى. ال شاعىن جانە ورتا بيزنەستى دامىتۋعا, قوسىمشا ينۆەستيتسيالار تارتۋعا, جۇمىس ورىندارىن قۇرۋعا ەلوردادا 2001 جىلدان بەرى جۇمىسىن جۇرگىزىپ كەلە جاتقان «استانا – جاڭا قالا» ارنايى ەكونوميكالىق اكىمشىلەندىرۋ ايماعىنىڭ قوسار ۇلەسى ۇلكەن.
جولداۋدا جۇكتەگەن مىندەتتەردى ورىنداۋ يننوۆاتسيالىق يندۋستريالاندىرۋ مەن ورتا جانە شاعىن كاسىپكەرلىكتى دامىتۋعا تىكەلەي بايلانىستى ەكەندىگى بەلگىلى. استانا بولاشاقتا الەمدەگى ءىرى مەگاپوليستەردىڭ قاتارىنا قوسىلۋعا تالپىنىپ وتىر. ول ءۇشىن باس شاھار قاي جاعىنان دا وزىق, زاماناۋي سۇرانىستارعا لايىقتى شاھار بولۋى كەرەك. ەلوردانى قالاي كوركەيتۋ كەرەك, قانداي جوبالاردى ىسكە اسىرۋ قاجەتتىگى «استانا – جاڭا قالا» ارنايى ەكونوميكالىق ايماعى اياسىندا ويلاستىرىلىپ, جۇزەگە اسىرىلادى. 2005 جىلى قۇرىلعان يندۋستريالدىق پارك 2007 جىلدان باستاپ وسى اەا-نىڭ اۋماعىنا ەنگىزىلدى. ەل ەكونوميكاسىن العا ءسۇيرەيتىن سەرپىندى جوبالار وسى ونەركاسىپ ايماعىندا ىسكە اسىرىلىپ جاتىر. بۇگىندە №1 يندۋستريالدىق پارك اۋماعىندا جالپى كولەمى 173,6 ملرد تەڭگە ينۆەستيتسيانى قۇرايتىن 50 جوبا جۇزەگە اسىرىلۋدا. ونىڭ 21 نىسانى 2009-2014 جىلدار ارالىعىندا پايدالانۋعا بەرىلدى. ال 15 نىساندا قۇرىلىس-مونتاج جۇمىستارى جۇرگىزىلىپ جاتسا, 14 جوبا بويىنشا جوبالىق-سمەتالىق قۇجاتتاندىرۋ پروتسەسى جۇرگىزىلۋدە. بۇل جوبالار پارك اۋماعىنىڭ 90 پايىزىن الىپ جاتىر. وسىندا اشىلعان نىسانداردىڭ ارقاسىندا 2 مىڭنان اسا جۇمىس ورنى قۇرىلدى. ال 2015 جىلى تاعى 300 جاڭا جۇمىس ورنىن اشۋ كوزدەلۋدە.
ەلورداداعى ونەركاسىپتىك جوبالار, نەگىزىنەن, وسى №1 يندۋستريالدىق پاركتە شوعىرلانعان. مۇنداعى كاسىپورىنداردىڭ بارلىعى تىڭ تەحنولوگيالارمەن جۇمىس ىستەيدى. ولار وندىرگەن جوبالاردىڭ ساپاسى دا جوعارى. كاسىپورىنداردان بيۋدجەتكە كەلەتىن پايدا دا ايتارلىقتاي. مىسالى, بيىلدىڭ وزىندە №1 يپ اۋماعىنداعى ءوندىرىس ورىندارىنان بيۋدجەت قورجىنىنا 3,3 ملرد تەڭگە كولەمىندە سالىق تولەندى. وسى جىلى ەكى نىسان پايدالانۋعا بەرىلدى. سونىڭ ءبىرى – «كاما-قازاقستان» ساۋدا ءۇيى» جشس شيننو-لوگيستيكالىق كەشەن.
مۇنداعى قويمانىڭ وتكىزگىشتىگى 1,5 ملن اۆتودوڭگەلەكتى قۇرايدى. ەكىنشىسى – «كازگلاۆپرودۋكت» جشس بولشەكتەپ ولشەيتىن جەلىسى بار كولىكتىك-لوگيستيكالىق ورتالىق. ءوندىرىستىڭ قۋاتتىلىعى, شامامەن, ايىنا 90 توننا ءونىم.
زاماناۋي تەحنولوگيالارمەن جۇمىس ىستەپ جاتقان جوبالاردىڭ ءبىر لەگى رەتىندە ەلەكتروندىق-وپتيكالىق قۇرىلعىلار مەن تەپلوۆيزورلار شىعاراتىن «قازاقستان ASELSAN ينجينيرينگ» جشس مەن «تاۋ-كەن التىن» اففيناج زاۋىتىن اتاپ وتۋگە بولادى. الدىڭعى كاسىپورىن بىلتىر قۇرىلعان, جوبانىڭ قۇنى 7,8 ملرد تەڭگەنى قۇرايدى. وسى وندىرىستە 83 جاڭا جۇمىس ورنى اشىلدى. ءوندىرىس ورىندارىنىڭ جوعارى تەحنولوگيالىق قۇرىلعىلارى, نەگىزىنەن, قورعانىس ونەركاسىبىندە پايدالانۋعا ارنالعان.
ال بىلتىر تۇساۋى كەسىلگەن اففيناج زاۋىتىندا 72 جۇمىس ورنى قۇرىلدى. جوبا قۇنى – 5,4 ملرد تەڭگە. ءوندىرىس ورنى التىن, كۇمىس جانە باسقا دا باعالى مەتالداردى يتاليالىق تەحنولوگيامەن وڭدەۋمەن اينالىسادى. بۇل كاسىپورىن – ەلىمىز بويىنشا جالعىز ءوندىرىس ورنى.
ەلباسىنىڭ جولداۋىندا جۇمىس ىستەپ تۇرعان ارنايى ەكونوميكالىق ايماقتاردا ينفراقۇرىلىمداردى قالىپتاستىرۋ جۇمىستارىن اياقتاۋ ماسەلەسى كەڭىنەن ايتىلدى. استاناداعى №1 يندۋستريالدىق پارك باستان-اياق ينجەنەرلىك جەلىلەرمەن قامتاماسىز ەتىلگەن. جولدارى توسەلگەن. ماگيسترالدىق جىلۋ تراسسالارى, سۋ, كارىزدىك جۇيەلەرى جۇرگىزىلگەن.
ەندى «استانا – جاڭا قالا» ارنايى ەكونوميكالىق ايماعى جالپى اۋماعى 433 گەكتاردى قۇرايتىن №2 يندۋستريالدىق پارك قۇرىلىسىن دا قولعا الدى. بۇگىندە ونىڭ تەحنيكالىق-ەكونوميكالىق نەگىزدەمەسىن ازىرلەۋ بويىنشا جۇمىستار جۇرگىزىلىپ جاتىر. نەگىزدەمەسى قولعا ءتيىپ, مەملەكەتتىك ساراپتاما قورىتىندىسى شىعارىلعاننان كەيىن №2 يندۋستريالدىق پاركتىڭ جوبالىق-سمەتالىق قۇجاتتاماسى ازىرلەنىپ, ءارى قاراي ينفراقۇرىلىمىن سالۋ شارۋالارى قولعا الىناتىن بولادى.
مەدەر ماسەلوۆ,
«استانا – جاڭا قالا» اەا اكىمشىلەندىرۋ باسقارماسىنىڭ باسشىسى