گازەتتىڭ تاعى ءبىر ماڭىزدى ەرەكشەلىگى – ول ۇلت ءتىلىن ناسيحاتتايتىن ەڭ ماڭىزدى قۇرال. وكىنەرلىگى, جۇرتتىڭ كوبى گازەتتىڭ وسى ەرەكشەلىگىن ەسكەرە بەرمەيدى. اسىرەسە قازاقستان سىندى ورىس ءتىلى ءالى دە ۇستەمدىك قۇرىپ تۇرعان ەلدە «گازەتتى, سونىڭ ىشىندە قازاقشا گازەتتى كىم وقيدى؟» دەۋدىڭ ءوزى – ۇلت مۇددەسىن ەسكەرمەگەندىك, انا ءتىلىمىزدى قۇرمەتتەمەگەندىك.
انا ءتىلدى قۇرمەتتەۋ دەسە مىنا ءبىر جاعداي ەسىمە تۇسەدى. قىتايدا شاپشال سىبە اۆتونوميالى اۋدانى دەگەن اۋدان بار. 20 مىڭعا جەتپەيتىن سىبە ۇلتى قونىستانعان سول اۋداندا سىبە تىلىندە جالعىز گازەت شىعادى. تارالىمى 4000 دانادان اسادى. اتالعان اۋداندا تۇراتىن ەكى كوزى كورمەيتىن سۋ قاراڭعى سىبە اقساقالى سول گازەتكە ۇزبەي جازىلاتىن. بىردە ارىپتەستەرىمىزدىڭ ءبىرى ودان «اقساقال, ءوزىڭىز گازەت وقي المايسىز, نەگە وقىمايتىن گازەتكە اقشا شىعىنداپ ءجۇرسىز؟» دەپ سۇراعانى بار. سوندا الگى اقساقالدىڭ «مەنىڭ كوزىم كورمەگەنمەن, قۇلاعىم ساۋ عوي. نەمەرەم وقىپ بەرەدى. كۇندە گازەت وقىعاننان كەيىن نەمەرەم دە سىبە ءتىلىن ۇمىتپايدى. سىبە تىلىندە شىعاتىن جالعىز گازەتكە سىبەلەر ءوزى جازىلماسا, وعان كىم جازىلادى؟! مەن بۇگىن گازەتكە جازىلعان بەس-ون تيىندى شىعىنسىنعانمەن, ەرتەڭ ۇرپاعىم انا ءتىلىن ۇمىتسا, مەن قانشا اقشا جۇمساسام دا ورنىنا كەلتىرە المايمىن عوي» دەپ جاۋاپ بەرەدى. الەۋمەتتىك جەلىدە ءوز قانداستارىمىز «گازەتكە كىم جازىلادى؟» دەپ كەكەتىپ وتىرعانىن كورگەندە وسى زاعيپ شالدىڭ ءسوزى ويىما ورالادى دا تۇرادى. امال نە, «ۇعاتۇعىن ادام جوق ءسوز باعاسىن, كوزىن ەمەس, شەل باسقان كوزقاراسىن» دەپ اقىن ۇلىقبەك ەسداۋلەت ايتقانداي, «گازەتتى كىم وقيدى؟» دەپ شالقاياتىن ازاماتتاردا سىبەنىڭ سوقىر شالى قۇرلى ويلام جوق بولعانى دا…
