قازاقستان» ورتالىق كونتسەرت زالىندا «العىس ايتۋ» كۇنىنە وراي «مىڭ العىس» اتتى قايىرىمدىلىق كونتسەرتى ءوتتى. كەشتى «قازاق راديولارى» جشس ۇيىمداستىردى.
مەيىرىم شۋاعىنا شومىلعان كەش وتە اسەرلى بولدى. ومىردە ادامعا قايىرىمدى بولۋدان, قامقورلىق جاساۋدان ارتىق ىزگىلىكتى ءىس جوق. وعان تاعى ءبىر كوزىمىز جەتتى. شارا بارىسىندا ءتۇرلى تاعدىرلاردى باستان كەشكەن كەيىپكەرلەردىڭ ارماندارى جۇزەگە استى. ماسەلەن, ون ءتورت جىل سۋقاراڭعى قالىپ, اناسىنىڭ ءجۇزىن ءبىر كورسەم دەپ ارمانداعان ءدۇردانانىڭ ەمىنە قازاق راديوسىنىڭ ەفيرىنەن شىعاتىن «جان جىلۋى» باعدارلاماسى ارقىلى ەكى ميلليون تەڭگە قارجى جينالعان. سونىڭ كىشكەنتاي ارۋدىڭ ەمىنە شيپاسى ءتيىپ, ءدۇردانا دەرتىنەن ايىقتى. ونىڭ سول كۇنى ءانشى گۇلنۇر ورازىمبەتوۆامەن بىرگە ءان سالسام دەگەن ويى دا ورىندالدى. كوكشەتاۋداعى قوشقارباي اۋىلىندا تۇراتىن ءبىر وتباسى بالالار ۇيىنەن 11 جەتكىنشەكتى اسىراپ العان. وسىنداي ساۋاپتى ءدۇنيەگە قادام باسقان اتا-انانى ساحناعا شىعارىپ, قوشەمەت كورسەتتى. ودان كەيىن «بارمىسىڭ, باۋىرىم!» باعدارلاماسى ارقىلى سۇراۋ سالىپ, وتىز جىلدان بەرى كەزدەسپەگەن اسكەردەگى دوستار ساحنادا قاۋىشتى. اسىرەسە, جيىرما ەكى جىل بويى ءبىرىن-ءبىرى كورمەگەن انا مەن بالانىڭ كەزدەسۋى جينالعانداردى ەرەكشە تولقىتتى. زالدا كوزىنە جاس الماعان ادام قالمادى.
جالپى, كەشتىڭ ماقساتى تۋعاننان قوس جانارى سۋقاراڭعى ءبىر جاسار ارماننىڭ شەتەلدەگى ەمىنە ءۇش ميلليون تەڭگەدەي قارجى جيناپ بەرۋ بولاتىن. بىلتىر قىركۇيەك ايىندا «جان جىلۋى» باعدارلاماسىنا ارماننىڭ اناسى مەرۋەرت ايداراليەۆا حابارلاسىپ, كومەك سۇراعان ەكەن. ەندى, مىنە, وسى ماقسات ورىندالدى. بالدىرعاننىڭ دەرتىنە جۇمسالاتىن قارجى جينالدى. شاراعا قازاقتىڭ جۇرەگى كەڭ جومارت ازاماتتارى دا قاتىسىپ, ولار قايىرىمدىلىق شاراسىنا ءوز ۇلەستەرىن قوستى.
كەش بارىسىندا قاراقات ءابىلدينا, جۇبانىش جەكسەنۇلى, ەلەنا ابدىحالىقوۆا, مارجان اراپباەۆا, تامارا اسار, قۇرماش ماحان, روزا القوجا, مەدەت پەن كلارا سالىقوۆتار, سۇندەت بايعوجين سەكىلدى ونەر جۇلدىزدارى ءان شىرقاپ, جينالعانداردىڭ كوڭىلدەرىن كوتەردى.
ازامات ەسەنجول
