ەلباسىنىڭ سىندارلى ساياساتى ەلدىڭ جارقىن بولاشاعى مەن كەمەل كەلەشەگىنە باستايتىنى بارشاعا ءمالىم. ۇلت كوشباسشىسىنىڭ ءاربىر يدەياسى, ۇسىنىستارى, تەرەڭ ويلارى, ماڭىزدى شەشىمدەرى حالىقتىڭ قامى مەن ەلدەگى الەۋمەتتىك حال-احۋالدى جاقسارتۋعا باعىتتالادى. پرەزيدەنتتىڭ «قازاقستاننىڭ الەۋمەتتىك جاڭعىرتىلۋى: جالپىعا ورتاق ەڭبەك قوعامىنا قاراي 20 قادام» باعدارلاماسى دا سودان تۋىنداپ وتىر.
بۇگىنگى الەمدەگى جاھاندىق داعدارىسپەن كۇرەسۋ, ونىڭ سەبەبىن انىقتاۋ, داعدارىستان شىعۋ جولدارىن قاراستىرۋ – مەملەكەتىمىز ءۇشىن باستى ماسەلەلەردىڭ ءبىرى. ەكونوميكالىق تۇراقسىزدىق ورىن العان ۋاقىتتا ەلدىڭ حال-احۋالىن تۇسىرمەي, تۇراقتى ۇستاۋ وتە ماڭىزدى. سوندىقتان ەلباسىنىڭ «قازاقستاننىڭ الەۋمەتتىك جاڭعىرتىلۋى: جالپىعا ورتاق ەڭبەك قوعامىنا قاراي 20 قادام» باعدارلاماسىنداعى الەۋمەتتىك جاڭعىرتۋ يدەياسى ارقىلى ەڭبەك ادامىن العا شىعارۋ كوزدەلدى. بۇل بۇكىل قازاقستاندىق قوعامعا تاستالعان ۇندەۋ بولدى.
وسى رەتتە اتالعان يدەيانى ىلگەرىلەتۋ ماقساتىندا ۇجىمىمىزدا جاسالىپ جاتقان شارالاردى ءسوز ەتسەك. ەڭبەك ادامى – مەملەكەت دامۋىنىڭ قوزعاۋشى كۇشى, تىرەگى دەسەك, ارتىق ايتپاعان بولارمىز. بۇگىنگى تاڭدا تەك ەڭبەكتەنگەن ادام عانا جەمىستى ناتيجەگە جەتە الادى. ال ول ءۇشىن نە ىستەۋ كەرەك؟ ەڭ الدىمەن, ءتيىستى ءبىلىم الۋ قاجەت. ساعات سايىن, كۇن سايىن قارقىندى دامىپ بارا جاتقان زاماندا باستاپقى العان بىلىممەن قالۋ – كوشتەن كەيىن قالۋمەن تەڭ. سوندىقتان ءبىز ۇجىمداعى قىزمەتكەرلەردىڭ, ەڭبەك ادامدارىنىڭ ءبىلىمىن ودان ءارى شىڭداپ, بىلىكتىلىگىن ارتتىرىپ, كاسىبي جوعارىلاۋىنا بارىنشا قولداۋ جاساۋدامىز.
اتاپ ايتساق, كونتسەرت زالىمىزداعى تەحنيكالىق ماماندىقتاردىڭ بىلىكتىلىگىن ارتتىرۋ ماقساتىندا قىزمەتكەرلەرىمىز ارنايى وقۋ ورىندارىنىڭ پراكتيكالىق سەمينارلارى مەن شەبەرلىك ساباقتارىنا قاتىستى. سونداي-اق, ءبىلىم ورتالىقتارى وتكىزىپ تۇراتىن كۋرستاردان قالعان ەمەس. كونتسەرت زالى اشىلعاننان بەرى, التى جىل ىشىندە قىزمەتكەرلەردىڭ بارلىعى ءارتۇرلى ترەنينگ, شەبەرلىك ساباقتارى, سەمينارلار, بىلىكتىلىكتى ارتتىرۋ كۋرستارىنىڭ سەرتيفيكاتتارىنا يە بولدى. دەمەك, ۇجىمدا جەمىستى جۇمىس ىستەپ, مامانداردىڭ كاسىبي وسۋىنە بارلىق العىشارتتار جاسالۋدا.
بولاشاقتا اتالعان جۇمىستى ودان ءارى جانداندىرۋ بويىنشا جۇمىستار جالعاساتىن بولادى. سەبەبى ماماننىڭ بىلىكتىلىگىن ارتتىرۋ, ونىڭ الەۋەتىن كوتەرۋ, كاسىبي تۇرعىدان وسۋىنە جاعداي جاساۋ قوعامنىڭ دامۋىنا دا اكەلەدى. العا قويعان ماقساتتارعا ەش قيىندىقسىز جەتۋىنە, مەملەكەتتىڭ العا قاراي قارىشتاپ دامۋىنا ءبىز وسىلاي ۇلەس قوسامىز. ويتكەنى ءار قىزمەتكەردىڭ ەڭبەككە قابىلەتتىلىگى مەن ەڭبەك ونىمدىلىگى كاسىبي وسۋىنە بايلاۋلى. ءار ادام مەملەكەت تەتىگىندەگى اسا ماڭىزدى فاكتور بولىپ سانالاتىنى ءسوزسىز.
ءاسيا مۇستافينا,
«قازاقكونتسەرت» مەملەكەتتىك كونتسەرتتىك ۇيىمى»
رمقك ءبولىم باسشىسى
