استانا قالاسىنىڭ اكىمى يمانعالي تاسماعامبەتوۆ «مەرلەر بەيبىتشىلىك ءۇشىن» ۇيىمىنىڭ باس حاتشىسى ياسۋيوسي كوميدزومەن كەزدەستى. جۇزدەسۋ بارىسىندا قوس مەملەكەتتىڭ يادرولىق قارۋسىز الەم قۇرۋداعى ءوزارا ىقپالداستىعى مەن ەكىجاقتى ىنتىماقتاستىقتى نىعايتۋ ماسەلەلەرى تالقىلاندى.
ەلوردا اكىمى الدىمەن ەلدى يادرولىق قارۋسىز الەمگە ۇندەپ, بەيبىتشىلىك باستامالارىن ۇسىنا كەلگەن ياسۋيوسي كوميدزو مىرزاعا العىسىن ءبىلدىردى.
– قازاقستان ءوز تاۋەلسىزدىگىنىڭ العاشقى كۇنىنەن باستاپ بەيبىت ءومىردى قولداپ, كەڭەس وداعى ىدىراعاننان كەيىن قۋاتى جاعىنان الەمدە ءتورتىنشى يادرولىق ارسەنالدان باس تارتقانىن ءوزىڭىز جاقسى بىلەسىز. ەلىمىزدە 450-دەن استام يادرولىق جارىلىس بولدى. مۇنداي سىناقتاردىڭ ادام ايتقىسىز اۋىرتپالىعىن جاپونيا ەلى دە تارتتى. بۇل – ەكى ەلدى بىرىكتىرەتىن ورتاق ماسەلەلەردىڭ ءبىرى, – دەدى يمانعالي نۇرعاليۇلى.
قالا اكىمى «مەرلەر بەيبىتشىلىك ءۇشىن» دۇنيەجۇزىلىك ۇيىمىنا استانا 2012 جىلدىڭ تامىز ايىندا 110-شى استانا رەتىندە تىركەلگەنىن اتاپ ءوتتى. ۇيىمنىڭ قۇرامىنا
استانادان بولەك, قازاقستاننىڭ الماتى, قاراعاندى, پاۆلودار, كۋرچاتوۆ, سەمەي سىندى كوپتەگەن قالالارى دا كىرگەن.
ءوز كەزەگىندە جاپوندىق مەيمان يادرولىق قاۋىپتى جويۋ ماسەلەسى وزەكتى ەكەندىگىن, 1945 جىلعى تامىزدا حيروسيما مەن ناگاساكي قالالارىن جەرمەن-جەكسەن ەتكەن اتوم بومبالارىنىڭ زاردابىن جاپون حالقى ءالى دە تارتىپ كەلە جاتقانىن ءسوز ەتتى.
– اتوم بومبالارىنىڭ ادامزات ءۇشىن قانشالىقتى قاۋىپتى ەكەنىن جەر شارىنىڭ ءار تۇرعىنى ءتۇسىنۋى كەرەك. جاپپاي قىرىپ-جويۋ قارۋلارىن قولدانۋدان كۇللى الەم باس تارتۋى ءتيىس. سوندىقتان ءبىزدىڭ بەيبىتشىلىككە ۇندەگەن باعدارلامامىزدى باسقا قالالاردىڭ مەرلەرى دە قولداسا دەيمىن, – دەدى ياسۋيوسي كوميدزو.
«مەرلەر بەيبىتشىلىك ءۇشىن» ۇيىمى 1982 جىلى قۇرىلعان. وسى جىلى حيروسيما مەرى تاكەشي اراكي الەمدىك قالالارعا يادرولىق قارۋدان تۇبەگەيلى باس تارتۋ تۋرالى باعدارلاماسىن جاريا ەتكەن ەدى.
ەلوردا اكىمى بەيبىتشىلىككە ۇندەگەن قۇجاتتى استانا دا قولدايتىنىن ايتىپ, ەكىجاقتى ىنتىماقتاستىق ودان ءارى دامي بەرەتىنىنە سەنىم ءبىلدىردى.
قىمبات توقتامۇرات
