كەشە قازاقستان پرەزيدەنتىنىڭ باستاماسىمەن قۇرىلعان نازارباەۆ ۋنيۆەرسيتەتى العاشقى 446 تۇلەگىن ۇشىرىپ, قولدارىنا ديپلوم ۇستاتتى. بۇل سالتاناتتى راسىمگە ەلباسى قاتىسىپ, وقۋ ورىندارىن تامامداعان كۇللى قازاقستاندىق جاستاردى قۇتتىقتادى.
– وسى كۇندەرى مىڭداعان قازاقستاندىق ستۋدەنت ەلىمىزدىڭ ۋنيۆەرسيتەتتەرىن ءبىتىرىپ, ديپلوم الىپ جاتىر. مەن وسى مىنبەردەن ەلىمىزدىڭ بارلىق تۇلەكتەرىن قۇتتىقتاعىم كەلەدى. بارشا جاس ماماندارعا ومىردە لايىقتى ورىندارىن تابۋىنا تىلەكتەسپىن, – دەدى مەملەكەت باسشىسى.
قازاق ەلىندە جاستارعا ارنالعان مەملەكەتتىك قولداۋلار بارشىلىق. ەكى قولعا ءبىر جۇمىس تابامىن دەيتىندەرگە دە كومەكتەر كوپ. ەلىمىزدىڭ ەرتەڭگى تىزگىنىن قولىنا الار جاستارعا دەگەن مۇنداي قامقورلىق يۋنيسەف تاراپىنان دا نازاردان تىس قالماپتى. بۇل قوردىڭ باعالاۋى بويىنشا قازاقستان جاستاردى دامىتۋدىڭ جاھاندىق يندەكسىندە 27 ورىندى يەلەنىپتى. ەلباسىنىڭ ايتۋىنشا, جاس مەملەكەت ءۇشىن بۇل جوعارى كورسەتكىش.
– قازاقستاندا ەلىمىزدى الەۋمەتتىك-ەكونوميكالىق دامىتۋ باعىتىندا اتقارىلىپ جاتقان اۋقىمدى شارۋالاردىڭ بارلىعى سىزدەر ءۇشىن جاسالىپ جاتىر. يندۋستريالاندىرۋ, «نۇرلى جول» باعدارلامالارىنىڭ جۇزەگە اسىرىلۋى, زاۋىتتار مەن فابريكالاردىڭ, الەۋمەتتىك نىساندار مەن ينفراقۇرىلىمدار, باسپانالاردىڭ سالىنۋىنىڭ ءبارى – بولاشاق ءۇشىن قولعا الىنعان جۇمىستار, – دەدى پرەزيدەنت.
2010 جىلى العاشقى ستۋدەنتتەرىنە ەسىگىن اشقان نازارباەۆ ۋنيۆەرسيتەتى دە – جاستاردىڭ الەمدىك دەڭگەيدە ءبىلىم الۋىنا جاسالعان قامقورلىقتىڭ ءبىر كورىنىسى. حالىقارالىق ءبىلىم بەرۋ مودەلىنە نەگىزدەلە قۇرىلعان ۋنيۆەرسيتەت ەلىمىزدىڭ عىلىمي-تەحنيكالىق جانە ينجەنەرلىك ەليتاسىن جاساقتايتىن ۇلتتىق برەند رەتىندە قالىپتاسىپ كەلەدى. ءبىلىم بەرۋمەن بىرگە, يننوۆاتسيالىق زەرتتەۋلەردى دە قاتار جۇرگىزەتىن, قىسقا مەرزىم ىشىندە الەمدىك ايتۋلى وقۋ وردالارىمەن يىق تىرەسە العان ۋنيۆەرسيتەتتە وقۋ – ءار جاستىڭ ارمانى.
بيولوگيا, حيميا, فيزيكا, كومپيۋتەر عىلىمدارى, روبوتتىق تەحنيكا مەن مەحانوترونيكا سىندى ماماندىقتار بويىنشا كادرلار دايارلايتىن ءبىلىم ورداسىندا وقۋ اعىلشىن تىلىندە جۇرگىزىلەدى جانە جىل سايىن 500 ادام وقۋ گرانتىنا يە بولادى ەكەن. وقۋ ورنى اشىلعاننان بەرى ونداعى جەتى مەكتەپتە وقيتىن ستۋدەنتتەردىڭ سانى 2800-گە جەتكەن.
ەلباسى نۇرسۇلتان نازارباەۆ ءبىلىم ورداسىنىڭ العاشقى تۇلەگى بولۋ باقىتى بۇيىرعان جاستاردان ۇلكەن ءۇمىت كۇتەتىنىن جەتكىزدى. جاستارى ءۇشىن وتانى قول ۇشىن بەرىپ, ولاردىڭ مىقتى مامان بولىپ شىعۋىنا مۇمكىندىك جاسادى. ەندى جاستار دا سونىڭ قارىمتاسى رەتىندە ەلىنە, حالقىنا قىزمەت ەتۋى ءتيىس ەكەندىگىن ەلباسى ەرەكشە ەسكەرتتى:
– سىزدەرگە ومىرگە جولداما بەرە وتىرىپ, ءبىز ءوزىمىزدىڭ اسقاق ماقساتىمىزعا ءبىرشاما جاقىنداي تۇستىك. بۇل – ءبىزدىڭ سىزدەرمەن بىرلەسكەن ورتاق جەڭىسىمىز. مەنىڭ استانادا عىلىم-ءبىلىم ورتالىعىن قۇرۋ ارمانىم ورىندالدى. ەندى سەندەرگە ايتارىم, ەڭ الدىمەن وتانعا قىزمەت ەتىڭدەر. ەلىمىزدىڭ يگىلىگى ءۇشىن, قازاقستاننىڭ وركەندەۋ ءۇشىن جۇمىس ىستەۋلەرىڭ كەرەك, – دەدى.
بيىل بىتىرگەن ستۋدەنتتەردىڭ كوپشىلىگى گۋمانيتارلىق جانە الەۋمەتتىك عىلىمدار مەكتەبىندە, عىلىم جانە تەحنولوگيالار مەكتەبىندە, ينجەنەريا, جوعارى بيزنەس, جوعارى مەملەكەتتىك ساياسات جانە جوعارى ءبىلىم بەرۋ مەكتەپتەرىندە ءبىلىم العان ەكەن. ەندى ولاردىڭ قانشالىقتى ءبىلىم العانى مامان رەتىندە جۇمىسقا ورنالاسقاندا سىنالاتىنى انىق.
وسىناۋ سالتاناتتى ءراسىم كەزىندە نازارباەۆ ۋنيۆەرسيتەتىنىڭ جاڭا بەس قاباتتى عيماراتى دا اشىلدى. بۇل نىسان ەلوردانىڭ تۇران كوشەسى بويىندا ورنالاسقان.
قىمبات نۇرعالي
