استانا قالاسىنىڭ مەكتەپتەرى جانىندا اشىلعان بالالار لاگەرلەرى العاشقى ماۋسىمىن اياقتادى.
م.وتەمىسۇلى اتىنداعى وقۋشىلار سارايىنداعى «جازعى شىعارماشىلىق مەكتەبى» قالا بالالارىن ءجۇزۋ, مۇزدا سىرعاناۋ, لينگۆيستيكا, شاحمات ويناۋ سەكىلدى پايدالى ساباقتارعا باۋلىعان. مۇنداعى ءبىر اۋىسىمنىڭ (12 كۇن) قۇنى 15 000 تەڭگەنى قۇرايدى. وقۋشىلار سارايىنىڭ ديرەكتورى قۇرالاي مۇقىشەۆانىڭ ايتۋىنشا, ءبىرىنشى اۋىسىمدا اتالمىش لاگەرگە 80 وقۋشى قاتىسقان. ولاردىڭ دەنى – 1-4 سىنىپ وقۋشىلارى. وقۋشىلار اراسىندا سالاۋاتتى ءومىر سالتىن ناسيحاتتاپ, ولارعا بوس ۋاقىتتى ءتيىمدى وتكىزۋدى ۇيرەتۋ ماقساتىندا قۇرىلعان جازعى مەكتەپتەردە ەكىنشى ماۋسىم كەزىندە بۇدان دا كوپ وقۋشى دەمالادى دەپ جوسپارلانۋدا.
جالپى, جازعى لاگەرلەردە ءۇش اۋىسىم ۇيىمداستىرىلماق. استانا قالاسى ءبىلىم باسقارماسىنىڭ حابارلاۋىنشا, 73 ورتا مەكتەپتىڭ جانىنان اشىلعان لاگەرلەر 1 ماۋسىم مەن 10 شىلدە ارالىعىندا 1-4 سىنىپتاردا 45 000 وقيتىن جەتكىنشەكتى قامتىماق.
