تۇرمەدە وتىرسا دا, ەركىندىكتەگى كولەڭكەلى بيزنەسىن باسقارىپ, قىلمىسىن جالعاستىرا بەرەتىندەر تەك فيلمدەردە عانا ەمەس, ومىردە دە بارشىلىق. مۇنداي مافيالار قۇددى ساعىم سياقتى. جەمە-جەمگە كەلگەندە قولدان سۋسىپ شىعىپ كەتەدى. ەلوردانىڭ جەرگىلىكتى تۇرعىنى م. دەگەن ازاماتى دا سىبايلاستارىن پايدالانىپ, ەسىرتكى ساتىپ ەسىرىپ كەلگەن.
ول تەمىر توردىڭ ار جاعىندا وتىرىپ-اق استىرتىن بيزنەسىن سىبايلاستارى ارقىلى جالعاستىرا بەرگەن.
«استانادا اسا ءىرى مولشەردەگى ەسىرتكىمەن اينالىساتىن ۇيىمداسقان توپ بار» دەگەن شۇعىل اقپارات استانا قالاسى ىشكى ىستەر دەپارتامەنتىنە بىلتىر تامىز ايىندا تۇسكەن. پوليتسەيلەر بىردەن ىسكە كىرىسەدى. ءىىد تەرگەۋ ءبولىمى ۇيىمداسقان قىلمىسپەن كۇرەس ءبولىمىنىڭ باسشىسى, پوليتسيا مايورى سەرىك ىبراەۆتىڭ ايتۋىنشا, ۇيىمداسقان قىلمىستىق توپ, سونىڭ ىشىندە ەسىرتكى بيزنەسىمەن اينالىساتىندار وتە ساق ءارى اككى كەلەدى. ولاردىڭ تۇرعىلىقتى مەكەن-جايى بولمايدى. ءسال سەكەم السا بولدى, ۇيدەن ۇيگە كوشىپ جۇرە بەرەدى. تەلەفون ءنومىرىن دە ءجيى اۋىستىرادى. لاقاپ اتتارى دا كوپ. بۇلاردى سوزدەن ۇستاۋ دا مۇمكىن ەمەس ەكەن. «ەسىرتكىمەن اينالىساتىندار ناشا زاتتارىن ەشقاشان ءوز اتىمەن اتامايدى. ولار «ساڭىراۋقۇلاق», «ءدارى» دەگەن سەكىلدى كۇدىك تۋدىرمايتىن سوزدەردى پايدالانادى» دەيدى سەرىك راحىمعاليۇلى.
ەسىرتكى ساتۋ ارقىلى وڭاي ولجاعا كەنەلىپ, كول-كوسىر اقشانىڭ ءدامىن تاتقاندار نەبىر قيتۇرقى ءىس-ارەكەتتەرگە بارادى. جولدارىنا كەدەرگى بولعان نەمەسە كۇدىك تۋعىزعان ادامداردى دا ايامايدى. سوعان قاراماستان ەلوردا پوليتسەيلەرى ۇيىمداسقان توپتى قولعا ءتۇسىرۋ ءۇشىن جەدەل شارالار تىزبەگىن قۇرادى. ءتىپتى, ءبىر پوليتسەيدى ناشاقورلاردىڭ ورتاسىنا «ءسىڭىرىپ» جىبەرەدى. تاۋەكەلگە بەل بۋعان قۇقىق قورعاۋشى باسىن قاتەرگە تىگە ءجۇرىپ, وزىنە جۇكتەلگەن مىندەتتى ابىرويمەن الىپ شىعادى.
تەرگەۋشىلەردىڭ كاسىبي بىلىكتىلىكپەن جان-جاقتى ويلاستىرىلعان جوسپارى ويداعىداي جۇزەگە اسىپ, بۇلىڭعىر بولعان ايعاقتار انىقتالا باستايدى. بەلگىلى بولعانىنداي, م. دەگەن ازامات تۇرمەدە وتىرىپ-اق, تەلەفون ارقىلى ەسىرتكى بيزنەسىن جۇرگىزىپ وتىرعان. ەسىرتكى جەتكىزۋشىلەرمەن بايلانىسۋ, ساتاتىن ادامداردى تابۋ, ۇساق ديلەرلەر اراسىنداعى ءرولدى بەلگىلەۋ, تابىستى ءبولۋدىڭ ءبارىن وسىنىڭ موينىندا بولعان. ال ونىڭ بوستاندىقتاعى ايەلى ەسىرتكىنى گرامداپ ولشەۋ, الۋشىلارعا اپارىپ بەرۋ شارۋالارىمەن اينالىسقان. ەرلى-زايىپتىلاردىڭ وزدەرىنەن باسقا ەكى سەنىمدى ادامى بولعان.
پوليتسەيلەر اسا ەپتىلىكپەن جۇمىس ىستەپ, التى ايدىڭ ىشىندە بۇلتارتپاس دالەلدەرمەن الگى كۇدىكتىلەردى قولعا تۇسىرەدى.
استانا قالالىق ءىىد باسقارماسىنىڭ اسا ماڭىزدى ىستەر جونىندەگى اعا تەرگەۋشىسى, پوليتسيا پودپولكوۆنيگى رۇستەم مالكەنوۆتىڭ ايتۋىنشا, كۇدىكتى م. دەگەن ازاماتتى ءتىنتۋ كەزىندە ودان 1 كگ استام ەش قوسپاسىز تازا ەسىرتكى تابىلعان. قازاقستاننىڭ زاڭى بويىنشا 1 گرامنان اساتىن ەسىرتكىنىڭ ءوزى اسا ءىرى مولشەر بولىپ ەسەپتەلەدى. ال 1 كگ دەگەنىمىز – تىم كوپ. ولار ەسىرتكىنىڭ ءبىر گرامىن 4 مىڭ تەڭگەدەن ساتىپ كەلىپتى.
ءىستىڭ ءمان-جايىن پروكۋراتۋرا دا قاداعالاپ, پوليتسەيلەردىڭ ارەكەتىندە ەشقانداي دا زاڭ بۇزۋشىلىق جوق دەپ تانىعان. قازىر ءىس سوتقا جولدانعان.
ايتپاقشى, الگى ۇيىمداسقان قىلمىستىق توپتىڭ باسشىسى تۇرمەگە ەسىرتكى بيزنەسىمەن اينالىسقانى ءۇشىن ءتۇسىپتى. ون جىلعا باس بوستاندىعىنان ايىرىلعان ول جازاسىن وتەپ, بىلتىر جەلتوقسان ايىندا عانا اباقتىدان بوساعان ەكەن. ەندى, مىنە, تۇرمەدەن شىقپاي جاتىپ, تاعى دا قىلمىسىن قايتالاپ, تەمىر تورعا قامالىپ وتىر.
مۇنداي ۇيىمداسقان توپ سوڭعى بەس جىلدا استانادا بولماعان ەكەن. دەمەك, بۇل ىشكى ىستەر ورگانى قىزمەتكەرلەرىنىڭ ماڭداي تەرى, ەرەن ەڭبەگى دەپ باعالاۋعا بولادى. اسىرەسە, ءبولىم باستىعى, پوليتسيا مايورى سەرىك ىبراەۆ پەن پودپولكوۆنيك رۇستەم مالكەنوۆتىڭ ەڭبەگىن ەرەكشە اتاۋعا بولادى.
قىمبات نۇرعالي
