بۇگىندە ەلورداداعى تاۋەلسىزدىك سارايىندا قالالىق مادەنيەت باسقارماسى مەن «Aray Gallery» ۇيىمىنىڭ مۇرىندىق بولۋىمەن زاماناۋي ونەردىڭ ءبىرىنشى حالىقارالىق كورمەسى ءوتىپ جاتىر. «Astana Art Fair» دەپ اتالاتىن ايرىقشا شاراعا وتاندىق سۋرەتشىلەرمەن قاتار فرانتسيا جانە جاپونيا ەلدەرىنىڭ ونەرپازدارى قاتىسۋدا.
«Aray Gallery» – قازىرگى تاڭدا شىعارماشىلىققا بەت بۇرعان جاڭا ەسىمدەردى قولداۋدى ماقسات تۇتقان ونەر مەكتەبى. اتالمىش مەكەمەنىڭ وكىلدەرى ءارتۇرلى باعىتتاعى كورمەلەردى ۇيىمداستىرۋ ارقىلى استانانىڭ كرەاتيۆتى الاڭقايىنداعى تۇلعالاردىڭ باسىن ءبىر ورتاعا بىرىكتىرۋدى كوزدەيدى.
جوعارىداعى جوبا اياسىندا جۇزەگە اسىپ جاتقان سۇبەلى ىستەردىڭ ءبىرى رەتىندە «Astana. Evolution» فوتوكورمەسىن اتاۋعا ابدەن بولادى. وندا باس شاھاردىڭ ءارتۇرلى راكۋرستان تۇسىرىلگەن سۋرەتتەرى قويىلعان. تۋىندىلاردىڭ ادەمىلىگىنەن كوز سۇرىنەتىندەي. ولارعا قاراپ زاماناۋي تەحنيكا مەن الەمدىك قاۋىمداستىقتاردىڭ قازىرگى فوتوونەرگە ىقپالىن بىردەن بايقايسىز. ەلوردانى جاڭا ءارى كونە نۇسقادا, ءتورت مەزگىلدە, كۇندىز جانە تۇندە, كوپتەگەن ارحيتەكتۋرالىق ستيلدە «شىرت ەتكىزگەن» فوتوگرافتاردىڭ شەبەرلىگىنە شىنىمەن-اق ءتانتى بولاسىز.
بۇل شارا بارىنەن بۇرىن استانالىق جاس فوتوگرافتار ءۇشىن تاپتىرماس مۇمكىندىك بولعانى انىق. ويتكەنى, جۇرتشىلىق ەندىگى ۋاقىتتا فوتو اۆتورلارىن تانىپ قانا قويماي, الداعى جۇمىستارىن دا اسقان قىزىعۋشىلىقپەن كۇتەتىنى بەلگىلى.
– مەن ءۇشىن فوتوگرافيا – قورشاعان ورتادان وزگەشە دۇنيەنى تابۋعا كومەكتەسەتىن ۇلى ونەر. سوندىقتان ارقاشان ىزدەنىس ۇستىندە جۇرۋگە تىرىسامىن. جۇمىستارىم حالىققا ۇناپ, ەستەتيكالىق ءلاززات سىيلاپ جاتسا, ودان اسقان قانداي باقىت كەرەك؟! – دەيدى كورمەگە قويىلعان فوتو اۆتورلارىنىڭ ءبىرى ايبەك احانوۆ.
كورمە 2 قىركۇيەككە دەيىن جالعاسادى.
