Maqsut Narikbayev University مەن وكسفورد ۋنيۆەرسيتەتى يسلامتانۋ ورتالىعى (Oxford Center for Islamic Studies, OXCIS) اراسىندا ىنتىماقتاستىق تۋرالى مەموراندۋمعا قول قويىلدى. بۇل ەكىجاقتى كەلىسىم 2023 جىلدىڭ اقپان ايىندا MNU دەلەگاتسياسى مەن وكسفورد ۋنيۆەرسيتەتى يسلامتانۋ ورتالىعىنىڭ ديرەكتورى فارحان نيزاميمەن كەزدەسۋ بارىسىندا كەلىسىلگەن.
مەموراندۋم وكسفورد يسلامدىق زەرتتەۋلەر ورتالىعىندا قازاقستاندىق زەرتتەۋشىلەردىڭ تاعىلىمدامادان وتۋىنە جول اشادى, اتالعان قۇجات ەكى ەل اراسىندا تاجىريبە مەن ءبىلىم الماسۋدىڭ قۇندى تەتىگى بولماق. مەموراندۋم – عىلىمي ىنتىماقتاستىقتى دامىتۋداعى جانە اكادەميالىق قاۋىمداستىقتار اراسىنداعى ءوزارا تۇسىنىستىكتى نىعايتۋداعى ماڭىزدى قادام. فارحان ءنيزاميدىڭ Maqsut Narikbayev University-گە ساپارى كەزىندە MIND عىلىمي-زەرتتەۋ ورتالىعىنىڭ قىزمەتى تانىستىرىلدى جانە ۋنيۆەرسيتەت بويىنشا ەكسكۋرسيا جۇرگىزىلدى. دوكتور فارحان نيزامي ۋنيۆەرسيتەتتىڭ ينفراقۇرىلىمىن, وقۋ جانە عىلىمي زەرتتەۋ مۇمكىندىگىن, كىتاپحانالاردىڭ قولجەتىمدىلىگىن, وقۋ ورنىنىڭ جالپى اتموسفەراسى مەن مادەنيەتىن جوعارى باعالادى. دوكتور فارحان نيزامي – مۇسىلمان الەۋمەتتىك جانە ينتەللەكتۋالدى تاريحىنىڭ كورنەكتى مامانى, وكسفورد يسلامتانۋ ورتالىعىنىڭ نەگىزىن قالاۋشى جانە ديرەكتورى, ونىڭ جۇمىسى يسلام الەمى مەن باتىس اراسىنداعى حالىقارالىق ديالوگقا ىقپال ەتەدى. سونداي-اق فارحان نيزامي قازاقستانعا ساپارى اياسىندا Maqsut Narikbayev University قابىرعاسىندا «ءبىزدىڭ زامانىمىزداعى ديالوگ پەن تولەرانتتىلىقتىڭ قاجەتتىلىگى» تاقىرىبىندا قوعامدىق ءدارىس وقىدى. Maqsut Narikbayev University باسقارما توراعاسى تالعات نارىكباەۆ ءوز سوزىندە كوپتەگەن جوو وكسفورد ۋنيۆەرسيتەتىنە قاراپ بوي تۇزەيتىنىن جانە قازىرگى ۋاقىتتا MNU ۇلىبريتانيانىڭ جەتەكشى جوعارى وقۋ ورىندارى سياقتى QAA اككرەديتاتسياسىنا يە ەكەنىن اتاپ ءوتتى.
«ءبىزدىڭ ۋنيۆەرسيتەتتە يسلام جانە قازاق قۇقىعى ورتالىعى اشىلعان بولاتىن. ورتالىقتىڭ اشىلۋ ماقساتى – وسى ۋاقىتقا دەيىن تولىق زەرتتەلمەگەن تاريحىمىزدى, ياعني قازاقستان تاريحىن, حالقىمىزدىڭ تاريحىن تەرەڭىرەك ءتۇسىنۋ», – دەدى ول.
دوكتور فارحان نيزامي ءوز دارىسىندە حالىقتار مەن مادەنيەتتەر اراسىنداعى ديالوگتىڭ جەتىسپەۋشىلىگى كۇننەن كۇنگە ارتىپ كەلە جاتقانىنا نازار اۋداردى. «ءبىر-ءبىرىن تىڭداپ, تۇسىنە ءبىلۋ – ماڭىزدى. تولەرانتتىلىق تەك ءسان قۇبىلىسى ەمەس, بۇل ديالوگتىڭ نەگىزگى اسپەكتىسى. ديالوگ ادىلدىك پەن قوعامنىڭ دامۋى ءۇشىن جۇمىس جاساپ, ەلدەر, حالىقتار مەن دىندەر اراسىنداعى قاتىناستاردى نىعايتادى. ساياساتكەرلەر, ەكونوميستەر جانە الەۋمەتتانۋشىلار بۇنى ءتۇسىنۋى كەرەك. ديالوگ ايىرماشىلىقتاردى ءتۇسىنۋ مەن قۇرمەتتەۋ, ەمپاتيا مەن دامۋ ءۇشىن قاجەت», – دەپ اتاپ ءوتتى دوكتور. قاتىسۋشىلار ءدارىس تاقىرىبىنا ۇلكەن قىزىعۋشىلىق تانىتىپ, پىكىرتالاسقا بەلسەنە قاتىستى. فارحان نيزامي ءوزىنىڭ كاسىبيلىگى مەن ءدارىستى قىزىقتى تۇسىندىرە ءبىلۋ قابىلەتىنىڭ ارقاسىندا اۋديتوريانىڭ قۇرمەتىنە يە بولدى.
