حالىقارالىق وليمپيادادا ءتورت مەدال جەڭىپ الدى
قازاقستاندىق وقۋشىلار EGMO-2024 قىزدارعا ارنالعان حالىقارالىق ماتەماتيكالىق وليمپيادادا ءتورت مەدال جەڭىپ الدى, دەپ حابارلايدى astana-akshamy.kz
تسحالتۋبو قالاسىندا (گرۋزيا) EGMO-2024 قىزدارعا ارنالعان حالىقارالىق ماتەماتيكالىق وليمپيادا ءوز مارەسىنە جەتتى. جارىسقا 54 ەلدەن 212 وقۋشى قاتىستى. قازاقستان قۇراما كومانداسىندا ءتورت وقۋشى مەن ەكى جەتەكشى بار.
وليمپيادا قورىتىندىسى بويىنشا قازاقستان كومانداسىنىڭ قورجىنى 4 مەدالعا تولىقتى:
كۇمىس مەدال – اناستاسيا ودينتسوۆا – پاۆلودار قالاسىنداعى دارىندى بالالارعا ارنالعان №8 مەكتەپ-ليتسەيىنىڭ 11 سىنىپ وقۋشىسى;
كۇمىس مەدال – اميرا كەنباەۆا – الماتى قالاسىنداعى فيزيكا-ماتەماتيكا باعىتىنداعى نازارباەۆ زياتكەرلىك مەكتەبىنىڭ 11 سىنىپ وقۋشىسى;
قولا مەدال – اراي قاسەنوۆا – الماتى قالاسىنداعى Haileybury Almaty حالىقارالىق مەكتەبىنىڭ 11 سىنىپ وقۋشىسى;
قولا مەدال – ارۋجان باتىرحان – الماتى قالاسىنداعى رەسپۋبليكالىق فيزيكا-ماتەماتيكا مەكتەبىنىڭ 9 سىنىپ وقۋشىسى.
ايتا كەتۋ كەرەك, EGMO العاش رەت 2012 جىلى كەمبريدجدە ۇيىمداستىرىلدى. قازاقستان وليمپياداعا 2017 جىلدان بەرى قاتىسىپ كەلەدى. وسى جىلداردا قازاقستان قۇراماسى 3 التىن, 11 كۇمىس, 12 قولا مەدال جانە 4 قۇرمەت گراموتاسىن يەلەندى.