باس قالا تۇرعىندارى كوبەيگەن سايىن الدىمەن ينفراقۇرىلىمدى دامىتۋعا ءمان بەرىلۋگە ءتيىس. وسى ورايدا ەلوردادا مەملەكەت باسشىسىنىڭ تاپسىرماسى بويىنشا بىرقاتار ستراتەگيالىق نىسانداردىڭ قۇرىلىسى جۇرگىزىلىپ جاتىر. ءبىرىنشى كەزەكتە ەلەكتر, جول, سۋ جانە جىلۋ بەرۋ قۋاتىن ارتتىرۋ قاجەت. نۇر-سۇلتان قالاسىنىڭ اكىمى التاي كولگىنوۆ ءماسليحات وتىرىسىندا ينفراقۇرىلىمدى جۇيەلى دامىتۋ جانە ستراتەگيالىق نىساندار قۇرىلىسى تۋرالى ايتىپ بەردى.
«تۇرعىندار مەن قالانىڭ ءوسۋ ديناميكاسىن, ياعني جاڭا قۇرىلىس اۋداندارىنىڭ اشىلۋىن ەسكەرە وتىرىپ, الدىمەن جىلۋ, ەلەكتر, سۋ بەرۋ قۋاتىن ارتتىرۋ قاجەت. وسى فاكتورلارعا ءومىر ءسۇرۋ جايلىلىعى, قالانىڭ دامۋى, ينۆەستيتسيا تارتۋ جانە ت. ب. تىكەلەي بايلانىستى. مەملەكەت باسشىسىنىڭ تاپسىرماسى بويىنشا وسى ماسەلەنى شەشۋ ءۇشىن بىرقاتار ستراتەگيالىق نىسانداردىڭ قۇرىلىسىن جۇرگىزىپ جاتىرمىز. مىسالى, سۋعا قاتىستى ماسەلەلەردى شەشۋ ءۇشىن وتكەن جىلدان باستاپ سورعى-سۇزگى ستانساسىنىڭ (3-سسس) قۇرىلىسىنا كىرىستىك. نىسان وسى جىلدىڭ سوڭىنا قاراي ءىشىنارا پايدالانۋعا بەرىلەدى, ال 2023 جىلدان باستاپ جاڭا 3-سسس جۇمىسىنىڭ قۋاتىن ۇلعايتامىز. بۇل بولاشاق قۇرىلىس الاڭدارىن اۋىز سۋمەن قامتاماسىز ەتىپ قانا قويماي, قازىرگى سۋ بەرۋ قۋاتىن ارتتىرۋعا مۇمكىندىك بەرەدى. ماسەلەن, قازىر تاۋلىگىنە 300 مىڭ تەكشە مەتردى تۇتىناتىن بولساق, وندا 3-سسس قۋاتى تاۋلىگىنە قوسىمشا 100 مىڭ تەكشە مەتردەن استام قۋات بەرەدى. سونداي-اق 3-سسس-كە ۇزىندىعى 18 كم سۋ بۇرعىشتى سالامىز» دەدى التاي كولگىنوۆ.
ەلوردادا سوڭعى 3 جىلدا 8,5 ملن شارشى مەتر تۇرعىن ءۇي سالىنعانى سەبەپتى جىلۋمەن قامتۋ قۋاتىن ارتتىرۋ قاجەت. ول ءۇشىن قالا اكىمدىگى, 3-جەو قۇرىلىسىن جاڭعىرتۋدان بولەك, ءۇش جەرگىلىكتى گاز قازاندىعىن جوبالاۋ بويىنشا جۇمىستاردى باستادى. گاز قازاندىقتارىنىڭ قۋاتى ساعاتىنا 1 مىڭ گيگاكالوريادان اسادى, بۇل 3-جەو قۋاتىنان 3 ەسەدەن كوپ. بۇل قۇرىلىس جۇرەتىن پەرسپەكتيۆالى اۋدانداردى جىلۋمەن قامتۋعا مۇمكىندىك بەرەدى. سونداي-اق ەلوردادا قالانى گازداندىرۋ جۇمىسى ءجۇرىپ جاتىر. الماتى جانە سارىارقا اۋداندارى تولىعىمەن گازداندىرىلدى. ول ءۇشىن 680 كم-دەن استام گاز تاراتۋ جەلىسى سالىندى. سونداي-اق گاز تاراتۋ جەلىلەرى قالعان ەكى اۋداندا سالىنادى.
بۇدان بولەك, كارىز تازارتۋ قۇرىلىستارىن جوبالاۋ (2-كتق) بويىنشا جۇمىس جۇرگىزىلۋدە, سول سياقتى ەلەكتر جەلىلەرىن جاڭعىرتۋ, «اراي», «جۇلدىز» جانە ت. ب. قوسالقى ستانسالاردى جوبالاۋ جانە رەكونسترۋكتسيالاۋ بويىنشا جۇيەلى جۇمىس جۇرگىزىلەدى.
