ونەر ۋنيۆەرسيتەتى ەلوردامەن بىرگە كوركەيدى
ايمان مۇساقوجاەۆا, قازاق ۇلتتىق ونەر ۋنيۆەرسيتەتىنىڭ رەكتورى:
قازاق ۇلتتىق ونەر ۋنيۆەرسيتەتى – استانامەن بىرگە ءوسىپ-وركەندەپ كەلە جاتقان وقۋ ورداسى. وسىنداي ونەر جانە ءبىلىم ورداسىن قۇرۋ – كوكەيىمدە كوپتەن جۇرگەن جوبام بولاتىن. بىراق, بۇل ويىم استانادا جۇزەگە اسادى دەپ استە ويلاماپپىن. ەلباسى بولاشاق ونەر شاڭىراعى مەن ويلاعانداي الماتىدا ەمەس, جاڭا استانادا اشىلۋ قاجەتتىگىن ايتقان ەدى. مىنە, وسىلايشا, مەملەكەت باسشىسىنىڭ قولداۋىمەن ۋنيۆەرسيتەتىمىزدىڭ ىرگەتاسى ەلوردادا قالانعان بولاتىن.
بۇرىنعى قازاق ۇلتتىق مۋزىكا اكادەمياسى, قازىرگى ونەر ۋنيۆەرسيتەتى ەلوردامىز ەندى عانا قۇرىلا باستاعان 1998 جىلى دۇنيەگە كەلدى.
قازاق ۇلتتىق ونەر ۋنيۆەرسيتەتى – بۇرىنعى چايكوۆسكي اتىنداعى №1 مۋزىكا مەكتەبi مەن اقمولانىڭ مۋزىكا كوللەدجiنiڭ بازاسىندا قۇرىلدى. ۇلت ونەرىنىڭ ۇلكەن شاڭىراعىن كوتەرۋ العاشىندا جەڭىل تيمەگەنى راس. بىلىكتى مامانداردىڭ تاپشىلىعىن بىلاي قويعاندا, ولاردىڭ الەۋمەتتىك ماسەلەلەرىن شەشۋ, ورنالاستىرۋ وڭايعا سوقپادى. مۇنىڭ سىرتىندا ءبىلىم ورداسىنا كەرەكتى قۇرال-جابدىقتار مەن مۋزىكالىق اسپاپتاردىڭ جەتىسپەۋشىلىگى, وقۋ اۋديتوريالارىنىڭ ازدىعى, قاراجات تاپشىلىعى ءبىراز قيىندىقتار تۋعىزدى. تاجىريبە الماسۋ ءۇشىن شەتەلدىك مۋزىكانتتاردى شاقىرۋ مىندەتى دە الدىمىزدا تۇردى. وسىنداي كۇردەلى كەزەڭدەردە ەلباسىنىڭ سەنىمى مەن قامقورلىعى جانىمىزعا دەمەۋ بولدى. قاشان دا ونەرگە قولداۋىن اياماعان پرەزيدەنتكە العىسىمىز شەكسىز. 1998 جىلى استانانىڭ حالىقارالىق تۇساۋكەسەرىمەن بىرگە, ءبىزدىڭ ونەر ۋنيۆەرسيتەتىنىڭ دە تۇساۋى كەسىلدى. وعان ەلباسى نۇرسۇلتان نازارباەۆتىڭ ءوزى قاتىسىپ, ءبىلىم جانە ونەر شاڭىراعىنىڭ العاشقى قادامىنا اقجول تىلەدى.
العاشىندا مۋزىكالىق اكادەميا رەتىندە ەلگە تانىلعان شاڭىراق كەيىن ءمادەنيەتتانۋ, ونەرتانۋ, حورەوگرافيا, كەسكiندەمە, ءمۇسiن, رەجيسسۋرا, تەاتر ونەرى سىندى جاڭا ماماندىقتار قوسىلۋىنا بايلانىستى, ونەر ۋنيۆەرسيتەتى بولىپ قايتادان قۇرىلدى.
بىزگە وقۋعا تۇسكەن ادام العاشقى ءبىلىمىن مەكتەپتەن الىپ, سودان كەيىن كوللەدجدە شىڭداپ, ءارى قاراي باكالاۆرياتتا جالعاستىرادى. مۇنداعى ماقساتىمىز – ورىنداۋشىلىق ونەر مەن عىلىمي-اعارتۋشىلىق سالاسىن قاتار وقىتۋ, ياعني جان-جاقتى, ءبىلىمدى جاستاردى دايارلاۋ. بۇل شاكىرتتەر اراسىندا ءباسەكەلەستىكتى تۋعىزىپ, ونەر جولىندا بيىك تابىستارعا جەتۋگە جەتەلەيدى. ونىڭ ناتيجەسىن كورىپ تە ءجۇرمىز. وقۋ ورنىمىزدان قانات قاققان تالاي شاكىرتىمىز سەنىمىمىزدى اقتادى. جىل سايىن اۆستريادا, ۆاتيكاندا, سان-بارتولومەودا وتەتiن حالىقارالىق كونكۋرستاردا توپ جارىپ, جۇلدەگەر اتانعان دارىندى جاستارىمىزدىڭ كوبەيگەنى – ماقساتىمىزدىڭ ورىندالىپ, ءۇمىتىمىزدىڭ اقتالعانى دەپ بىلەمىن. ونەر ۋنيۆەرسيتەتىن قۇرعان كەزدە قازاقستاننىڭ ورتالىق, سولتۇستىك وڭىرلەرىن, سونىڭ ىشىندە جاڭا استانادا ۇيىمداستىرىلىپ جاتقان شىعارماشىلىق ۇجىمداردى جوعارى ءبىلىمدى كاسىبي ماماندارمەن قامتاماسىز ەتۋدى دە مىندەتىمىزگە العان ەدىك. بۇل ويىمىزدى دا تولىعىمەن جۇزەگە اسىردىق دەپ ويلايمىن. قازىر تۇلەكتەرىمىز استانادا عانا ەمەس, رەسپۋبليكانىڭ تۇپكىر-تۇپكىرىندە جۇمىس ىستەيدى, كەيبىرەۋلەرى شەتەلدەردە وقۋىن جالعاستىرىپ جاتىر.
كەزىندە ءوزىم باسقارىپ وتىرعان ۋنيۆەرسيتەتتى الماتىدان باسقا جەردە ەلەستەتە المايتىن ەدىم. ال قازىر كەرىسىنشە. ونەر ۋنيۆەرسيتەتىن استانادان وزگە وڭىردە ەلەستەتە المايمىن. ءبىلىم ورداسى استانامەن بىرگە كوركەيىپ, دامىپ كەلەدى. قايناعان تىنىس-تىرشىلىكتىڭ ورتالىعىنا اينالعان باس شاھار ءبىزدىڭ دە قۇتتى مەكەنىمىز بولدى. قازىرگى تاڭدا ونەر ۋنيۆەرسيتەتىنىڭ الەمدىك دەڭگەيدە ازدى-كوپتى بەدەلى بار. شاكىرتتەرىمىز تالاي حالىقارالىق بايقاۋلاردا توپ جارىپ, مەرەيىمىزدى ءوسىرىپ ءجۇر.
ارينە, بۇل توقمەيىلسىگەندىك ەمەس. ءبىز الدا ءالى تالاي بيىكتەردى باعىندىرۋعا تالپىناتىن بولامىز. ەڭ باستىسى, قازاق ۇلتتىق ونەر ۋنيۆەرسيتەتى قاي جاعىنان دا استانانىڭ مارتەبەسىنە ساي بولۋى كەرەك. مىنە, باستى ماقساتىمىز دا وسى.
قىمبات توقتامۇرات