باس شاھارىمىزدا ءسانى مەن ساۋلەتى كەلىسكەن كوپ قاباتتى ۇيلەر از ەمەس. ولاردىڭ وزىندىك ءتۇيىندى ماسەلەلەرى دە بارشىلىق. سولاردىڭ ءبىرى – تۇرعىندار مەن پيك باسشىلارى اراسىندا بولاتىن كەلىسپەۋشىلىكتەر. مىنە, وسىنداي كيكىلجىڭدەر تۋىنداسا, ونى قالاي شەشۋگە بولاتىنى جونىندە ەلوردا پيك-تەرى قاۋىمداستىعىنىڭ توراعاسى ميزامبەك كەنجەباەۆ اڭگىمەلەيدى.
– اتالعان قاۋىمداستىقتى قۇرعانداعى ماقساتتارىڭىز نە؟
– ءبىزدىڭ پيك قاۋىمداستىعىن قۇرۋداعى باستى ماقساتىمىز – پيك توراعالارى اراسىندا قر «تۇرعىن ءۇي قاتىناستارى» زاڭىنا بايلانىستى, ونىمەن جان-جاقتى تانىسۋ جونىندە تۇسىنىك جۇمىستارىن جۇرگىزۋ. سونىمەن قاتار, پاتەر يەلەرى مەن پيك توراعالارىنىڭ اراسىندا بولاتىن داۋ-دامايلاردى رەتتەۋگە تىرىسامىز. ولارعا زاڭدىق تۇرعىدا كومەكتەر كورسەتەمىز. اتاپ ايتقاندا, كوندومينيۋمدى تىركەتۋ ءۇشىن قىرۋار قارجى كەرەك بولىپ, قينالاتىن جاعدايدا ءبىز ونداي كوپ شىعىن شىعارماي-اق تىركەتۋگە قول ۇشىن سوزامىز. بۇدان بولەك, پيك-تەرگە زاڭدىق كومەك رەتىندە شاعىن كىتاپشالار باسىپ شىعارامىز. مۇگەدەكتەردىڭ وتىنىشتەرىن دە جەردە قالدىرماي, قۇلاق اسىپ وتىرامىز.
– پيك-تەردىڭ جۇمىسىنا باقىلاۋ جاسايسىزدار ما؟
– ءبىز ولارعا باقىلاۋ جاساۋ ءۇشىن ەمەس, قول ۇشىن بەرۋ ءۇشىن قۇرىلعانبىز. نەگىزى, پيك توراعالارىن تۇرعىنداردىڭ ءوزى جالپى جينالىستارىندا سايلايدى. مەنىڭشە, توراعا وتە ىسكەر, قۇرىلىس پەن ينجەنەرلىك سالانى جاقسى بىلەتىن ادام بولعانى دۇرىس. سوندا عانا پيك-ءتىڭ جۇمىسى تەز جاندانادى. راسى كەرەك, بىزدە پيك توراعالارى تۇرعىنداردىڭ پاتەرلەرىنىڭ ءار شارشى مەترى ءۇشىن تولەنەتىن جارنالارىن جىلدار بويى تولەمەي, زارەزاپ ەتەتىندەرىن ايتىپ, ءجيى شاعىمدانادى. ال, اقشا تولەمەگەن جەردە جۇمىس قالىپتى جۇرگىزىلمەيتىنى بەلگىلى. ويتكەنى, سانتەحنيك, اۋلا سىپىرۋشى, ەدەن جۋشى سياقتى جۇمىسشىلاردى ۇستاۋ ءۇشىن دە ولارعا ۋاقىتىندا ەڭبەكاقىسىن بەرىپ تۇرۋ كەرەك. ونى توراعا تەك سول تۇرعىنداردان تۇسكەن اقشادان بەرەدى.
– تۇرعىن ءۇيدىڭ كىرەبەرىسىن, توبەسىن, جەرتولەسىن كىم جوندەيدى؟
– ەگەر تۇرعىنداردىڭ بارلىعى جارنالارىن ۋاقىتىندا تولەپ تۇرسا, پيك-تەردەگى كاسىبي ماماندار جوندەۋى ءتيىس. قازىر تۇرعىن ءۇي-كوممۋنالدىق شارۋاشىلىعىن جاڭعىرتۋ باعدارلاماسى بويىنشا بۇل ماسەلە كوپشىلىك جەردە وڭ شەشىمىن تاۋىپ تا ءجۇر. ال جالپى
ءۇي قاجەتتىلىگىنە جۇمسالاتىن ەلەكتر قۋاتىن پيك تولەي مە, الدە تۇرعىندار «استاناەنەرگوسبىتقا» تىكەلەي تولەي مە دەگەن ماسەلەگە كەلەتىن بولساق, قالاي تولەسەڭىز دە ءسىز ۇتىلمايسىز. ءويتكەنى, ۇكىمەتتىڭ 2000 جىلعى №1822 قاۋلىسىندا پيك تولەۋى ءتيىس دەپ كورسەتىلگەنىمەن, قر «تۇرىن ءۇي قاتىناستارى تۋرالى» زاڭدا جالپى ءۇي مۇقتاجدىعىنا قاجەتتى شىعىنداردى تۇرعىنداردىڭ ءوزى تولەيدى دەپ كورسەتىلگەن. سوندىقتان, قالاي تولەنسە دە, ول دالاعا كەتپەيدى. ءوز ءۇيىڭىزدىڭ مۇددەسى ءۇشىن جۇمسالادى.
