وتكەن اپتادان بەرى ەلوردادا كۇننىڭ رايى مىڭ قۇبىلىپ تۇر. جەكسەنبىدە قالىڭ قار جاۋىپ, ونىڭ سوڭى جاياۋ بۇرقاسىنعا ۇلاستى. قالانىڭ ىشىندەگى جولدىڭ بويى سىرەسكەن قارعا تولدى. سونىڭ اسەرىنەن دۇيسەنبىدە كولىكتەرگە كەپتەلىس تۋىپ, ءبىراز قىزمەتكەرلەر جۇمىستان كەشىككەن ەدى.
الايدا, ەلوردانىڭ كوممۋنالدىق كاسىپورىننىڭ قىزمەتكەتكەرلەرى وتكەن اپتادان بەرى كۇشەيتىلگەن تارتىپكە كوشكەن. كەشە تۇندە استانا قالاسىنىڭ اكىمى اسەت يسەكەشەۆتىڭ ءوزى رەيدكە شىعىپ, قالانى قاردان تازالاۋ جۇمىستارىن ارالادى. جۋرناليستەرگە وسى باعىتتا اتقارىلىپ جاتقان شارالار جايىندا اقپارات بەردى.
– بىزدە جەدەل شتاب توبى قۇرىلدى, – دەپ باستادى ءسوزىن استانا اكىمى. – بۇگىندە ولار تاۋلىك بويى جۇمىس ىستەۋدە. ماسەلەن, «استانا تازالىق» كاسىپورنى جولدارعا, جاياۋ جۇرگىنشىلەر وتكەلى مەن الەۋمەتتىك نىساندارعا جاۋاپ بەرەدى. ال ءاربىر اۋلانى پاتەر يەلەرى كووپەراتيۆتەرىنىڭ ادامدارى تازالايدى. ەكى كۇن بويى قالىڭ قار جاۋعانىن كورىپ وتىرسىزدار. سوندىقتان, قازىر باستى مىندەتىمىز قوعامدىق كولىكتەر جۇرەتىن جولداعى قارداعى تازارتىپ, ولارعا ەشقانداي قيىندىق تۋعىزباۋ قاجەت, – دەدى ول. سونداي-اق, قالا باسشىسى: «ءبىز قىسقى مەزگىلگە مۇقيات دايىندالدىق. اكىم بولىپ كەلگەلى العاشقى قىس بولسا دا, مەن بۇعان سابىرمەن قارايمىن» دەپ رياسىز جاۋاپ بەردى. سونىمەن بىرگە رەيد كەزىندە ەلوردا اكىمى رەسپۋبليكا داڭعىلىنىڭ بويىنداعى قاردى تازالاپ جاتقان تەحنيكالاردىڭ جۇمىسىن كوردى. قالا باسشىسىنا سارىارقا جانە الماتى اۋداندارىنىڭ اكىمدەرى وزدەرىنىڭ اۋماقتارىنا قاراستى قار تازالاۋ شارالارى بويىنشا قىسقاشا ماعلۇمات بەردى.
«بۇگىنگى تۇنگى اۋىسىمدا كوپتەگەن ارناۋلى تەحنيكا جۇمىس ىستەپ جاتىر. بيىل قار قالىڭ ءتۇستى. مەن 2000 جىلدان بەرى ەلوردانىڭ كوممۋنالدىق شارۋاشىلىق سالاسىندا قىزمەت ىستەپ كەلەمىن. ءدال وسىنداي قار 2003 جىلى جاۋعان ەدى. ەندى, مىنە, سول جاعداي بيىل قايتالانىپ وتىر» دەيدى قالا اكىمىنىڭ ورىنباسارى قوسمان ايتمۇحامەتوۆ
