ءدال وسى كۇندەرى جاستاردىڭ ۇيلەنۋ تويىن وتكىزۋ, قۇدالىق, سۇندەت توي, مەرەي توي ءتىپتى ولىك جونەلتۋدىڭ دە جولى قيىنداپ كەتتى. ەلوردانىڭ مونيتورينگ توپتارى كارىنە ءمىنىپ تۇرسا دا قالانىڭ كەيبىر تويحانالارى تەرەزەسىن قىمتاپ, ەسىگىن تارس جاۋىپ جۇمىسىن توقتاتار ەمەس.
جاسىراتىن نەسى بار, ءوزىمىز دە شاقىرىلعان جەردەن قالعان ەمەسپىز. راس, جۇرتتى جيناپ نەسى بار ەكەن دەسەك تە, «قىرىق جىل قىرعىن بولسا دا, اجالدى ولەر» دەگەندەي, ءوزىمىزدى باسىپ, كىسىنىڭ جاقسىلىعىنا بارۋعا اسىعامىز. «توي وتپەسىن» دەگەن بوس ءسوزدى وزىمىزدىكى بولماعان سوڭ عانا ايتامىز. ەندى وسى قۋانىشتىڭ يەسى ءوزىڭىز بولساڭىز نە جاقىنىڭىزدى اقىرعى ساپارعا اتتاندىرۋ قاجەت بولسا, «مۇلدەم بولماسىن, تىيىم سالىنسىن» دەپ ءدۇيىم جۇرتقا توپىراق شاشار ما ەدىڭىز؟ كۇمانىم بار. ويتكەنى بۇدان دا جامان كەزدە تويعا بارعان حالىقپىز. قازاقتىڭ تويى توقتاماسىن دەگەننىڭ ءبىرىمىز. دەمەك, وسى جاعدايدى بىلە تۇرا, حالىقتى بىلتىردان, ىندەت باستالعاننان بەرى توقتاتا المايتىنىمىزعا كوز جەتكەن سوڭ نەگە توي وتكىزۋدىڭ ءتيىمدى فورماتىن قالىپتاستىرماسقا؟ بەس جۇزدەپ, ەكى جۇزدەپ جيىلسىن دەۋدەن اۋلاقپىز. بىراق شاقىرىلاتىن ادامداردىڭ سانىنا شەكتەۋ قويىپ, تويدى نەگە Ashyq-پەن وتكىزبەسكە؟! جاقسىلىقتى قىلمىس جاساعانداي ەتىپ, تويحانانىڭ ارتقى ەسىگىنەن بۇقپانتايلاپ كىرىپ, كىسىگە بىلدىرمەي شىعىپ بەرەكەمىز كەتتى عوي. ودان قالدى, قازاقتىڭ جالعىز قۋانىشىنىڭ شىرقىن بۇزۋ كىمگە كەرەك؟ ونى وتكىزۋدىڭ جولىن قيىنداتپاي نەگە ءجونىن, دۇرىس جولىن كورسەتپەيدى؟
بۇل سۇراقتى قويىپ وتىرعان سەبەبىمىز, بۇگىندە بارلىق قوعامدىق ورىندار تۇنگى 10-عا دەيىن جۇمىس ىستەپ تۇر. «Ashyq كوشباسشىسى» مارتەبەسى بار نىساندارعا ساعات 00.00-گە دەيىن, Ashyq جۇيەسىندەگى باسقا نىساندارعا ساعات 22.00-گە دەيىن جۇمىس جاساۋعا رۇقسات بەرىلدى. قالالىق مونشالاردا ادامدار جەتكىلىكتى, كينوتەاترلار ىسكە قوسىلدى. بازاردان باسقا, ساۋدا, ويىن-ساۋىق ورىندارى ادەتتەگى رەجيمدە جۇمىس ىستەۋدە. دەمالىس ورىندارىنا بارساڭىز ىعى-جىعى حالىق. قوعامدىق كولىكتەر سىرەسكەن جولاۋشىعا تولى. حالىقتىڭ قامىن ويلاپ ەشكىم قوعامدىق كولىكتەردىڭ سانىن كوبەيتكەن جوق, قان بازاردى تارقاتقان جوق, اينالىپ كەلگەندە قازاقتىڭ تويىنا عانا «الىمجەتتىك» جاساپ وتىرعان جوق پا دەگەن سۇراق ويعا كەلەدى.
راس, تەك ەلىمىزدە ەمەس, بۇكىل الەمدە احۋال جاقسى ەمەس. بىراق تىرلىك توقتاعان جوق. لايىم توقتاماسىن. جيىن-توي قوناعىنىڭ سانىن جوعارىدا ايتتىق. قاتەرلى توپقا جاتاتىن جاسى الپىستان اسقانداردى شاقىرماي, بۇرىنعىداي ۇزىلىسپەن ەكى ىستىق تاماق ۇسىنباي, وعان كەتەتىن ۋاقىتتى قىسقارتىپ, ىقشامداپ نەگە وتكىزبەسكە؟! سابىلتىپ, ەت جاقىنى
بولسا دا باسقا وڭىرلەردەن كەلەتىن قوناقتارعا شەكتەۋ قويۋ كەرەك. ويتكەنى تويدا ەمەس, ەمىن-ەركىن ۇشىپ جۇرگەن ۇشاقتار مەن پويىزداردا دا ۆيرۋس جۇقتىرۋدىڭ قاۋپى باسىمىراق. وسىلايشا كوپتەن كۇتكەن تويدى ۇرلىق جاساعانداي تىعىلىپ ەمەس, ۇيرەنگەن ورتادا كىشىگىرىم
توپپەن اتاپ وتۋگە رەسمي ورىنداردان رۇقسات بولۋى ءتيىس. سوندا تويحانالار دا جۇمىسىن باستاپ,
ونىڭ اينالاسىندا ناپاقاسىن تاۋىپ جۇرگەندەردىڭ ەسەسى تۇگەندەلەر ەدى. ماسەلە ىندەتكە قارسى
شارالاردى ساقتاپ, تۇرمىستىق سالتىن جاناشىرلىقپەن رەتتەپ, ەلدىڭ قۋانىشىنىڭ شىرقىن بۇزباي, قازاقتىڭ كۇندەلىكتى ادەتىنەن دە قالدىرماۋدىڭ امالىن تابۋ كەرەك.
ءبىرى دۇنيە ەسىگىن اشسا, ەندى ءبىرى كەلمەستىڭ كەمەسىنە ءمىنىپ كەتىپ جاتسا, ەندى ءبىر ەرجەتىپ وتاۋ تىگىپ, يگىلىكتەرگە جەتىپ قۋانىشىن جاناشىرلارىمەن بولىسكىسى كەلسە – ونىڭ اتىن ءومىر دەيدى. ءومىر ءبىر ىندەتپەن توقتامايتىنىن ءوزىڭىز دە بىلەسىز!
