بۇل شاڭىراقتىڭ شىرقى بۇزىلعان. جاقىن جاندار الدەقاشان جاتقا اينالعان, ءبىر-بىرىنەن جالىققان. وتباسىنداعى بەرەكەسىز تىرلىكتىڭ كۇناھارىن م.گوركي اتىنداعى مەملەكەتتىك اكادەميالىق ورىس دراما تەاترى «يازىچنيكي» دراماسى ارقىلى ىزدەتەدى.
قويىلىمعا نەگىز بولعان پەسا جاس ءارى تالانتتى اۆتور اننا يابلونسكايانىڭ سوڭعى تۋىندىسى ەدى. 29 جاستاعى جازۋشىنىڭ اتالمىش دراماسى «يسكۋسستۆو كينو» جۋرنالىنىڭ بەدەلدى پرەمياسىن يەلەنگەندە, اننا ودەسسادان ماسكەۋدەگى ماراپاتتاۋ راسىمىنە جول تارتادى. سول كۇن ونى اقتىق ساپارعا شىعارىپ سالارىن كىم بىلگەن… دومودەدوۆو اۋەجايىندا تەرروريستىك اكتىگە تاپ بولىپ, قازا بولادى. قايعىلى ولىمنەن كەيىن يابلونسكايانىڭ بۇل شىعارماسى كەڭگە تانىلدى. ودەسسادا «تەرروريستەر» دەگەن اتپەن ساحناعا شىقتى, رەسەي مەن بالتىق جاعالاۋىنداعى ەكسپەريمەنتالدى تەاترلاردا قويىلدى.
ال, قازاقستانعا بۇل سپەكتاكلدى ليتۆالىق تانىمال رەجيسسەر يوناس ۆايتكۋس الىپ كەلگەن بولاتىن. رەجيسسەر شەشىمىمەن دەكوراتسيا مەن ءىس-قيمىل ەكىنشى پلاندا قالادى. ەكى اكت بويى اكتەرلەر ورىندىقتا تاپجىلماي وتىرادى. ونىڭ ۇستىنە, كوزدەرى جۇمۋلى. اكتەرلەر تەك داۋىسپەن وينايدى. قوزعالىسسىز قويىلىم ءسوز قۇدىرەتىن ۇعىندىرادى.
پەسا سىرتى ءبۇتىن, ءىشى ءتۇتىن ءبىر ءۇيدىڭ مىسالى ارقىلى ومىرلىك سۇراقتاردى كوتەرەدى.
ادامدار ءبىرىن-ءبىرى ەستىمەيدى. اكە-شەشەنىڭ ۋايىمى – ماتەريالدىق جاعداي. تۇرمىستىق پروبلەمالاردان ءارى اسپايتىن اتا-انا قىزىنىڭ جان دۇنيەسىن تۇسىنۋدەن قالعان. كەزىندە وقۋدا وزات بولعان قىزىن بۇگىن ۋنيۆەرسيتەتتەن شىعارىپ جىبەردى. اكەسى – بوس جۇرگەن مۋزىكانت. اناسى – ەكى جۇمىستىڭ ورتاسىندا سابىلىپ ءجۇر. ويلاماعان جەردەن ۇيگە ەنەسى قوناقتاپ كەلەدى. وعان ەشكىم ءماز ەمەس. ۇلى دا, كەلىنى دە, ءتىپتى, نەمەرەسى دە جاقتىرمايدى.
بىراق, كۇتپەگەن وقيعا ورىلەدى. كريستينا وزىنە-ءوزى قول جۇمسايدى. ءۇي-ءىشى دۇعا جاساپ, قۇدايدان كومەك سۇرايدى. بىراق ءبىر مەزەتتە پۇتقا تابىنۋشىلاردان قالعان تۇمار – ماسكانى ءحال ۇستىندەگى قىزدىڭ بەتىنە كيگىزىپ, ونى ءولىم اۋزىنان امان الىپ قالادى.
كىم كومەكتەستى؟ جاراتۋشى ما؟ سيقىرشىلاردىڭ تىلسىم كۇشى مە؟ بەلگىسىز. پەسادا سۇراق كوپ. ال, جاۋاپتى اركىم وزىنشە پايىمدايدى.
ءمادينا جاقىپ
