ەلوردا اكىمى جەڭىس قاسىمبەك قۇرىلىسى ۇزاققا سوزىلعان بىرقاتار عيماراتقا بارىپ, 30-دان استام تۇرعىن ءۇي كەشەنىن بيىل اياقتاۋدى تاپسىردى.
«تۇرعىندارمەن, ونىڭ ىشىندە ۇلەسكەرلەرمەن تۇراقتى تۇردە كەزدەسىپ تۇرامىن. قۇرىلىسى ۇزاققا سوزىلعان بىرقاتار عيماراتقا باردىم. وزدەرىڭىزگە ءمالىم, ءار نىساننىڭ وتكەن تاريحى ءارتۇرلى, ولاردىڭ قۇرىلىسى بىرنەشە جىلدان بەرى بىتپەي كەلەدى. ماسەلەن «اقەركە-2» تۇرعىن ءۇي كەشەنىنىڭ ءتىپتى ىرگەتاسى دا بولماعان ەدى, ال «پانا» تۇرعىن ءۇي كەشەنىنىڭ قۇرىلىسى 8 جىل بۇرىن باستالعان» دەدى قالا اكىمى ج.قاسىمبەك.
وسىعان دەيىن اكىمدىك قۇرىلىسى ۇزاققا سوزىلعان نىسانداردى اياقتاۋ بويىنشا جۇيەلى جۇمىس جۇرگىزگەنى بەلگىلى. دەگەنمەن قالعان نىسانداردى اياقتاۋ مىندەتى تۇر. بۇل – 30-دان استام تۇرعىن ءۇي كەشەنى, وندا مىڭداعان وتباسى جىلدار بويى باسپاناسىن كۇتىپ ءجۇر. قۇرىلىسى ۇزاققا سوزىلعان ءاربىر نىساندى اياقتاۋ بويىنشا ارنايى جوسپار بار. سوندىقتان اكىم بيىل وسى نىسانداردى اياقتاۋدى تاپسىردى.
قالانى ارالاۋ بارىسىندا ج.قاسىمبەك دونور-نىسانداردىڭ قۇرىلىسىمەن تانىستى. ولار ۇزاققا سوزىلعان نىسانداردىڭ قۇرىلىسىن اياقتاۋ ءۇشىن سالىنعان قاراجاتتىڭ قايتارىمىن قامتاماسىز ەتەدى.
«جالپى قۇرىلىسى ۇزاققا سوزىلعان نىسانداردىڭ اياقتالۋى مەملەكەت باسشىسىنىڭ باقىلاۋىندا. ۇلەسكەرلەردىڭ پروبلەمالارىن شەشۋ – بۇل ءبىزدىڭ مىندەتىمىز» دەدى ەلوردا اكىمى.
