قىزىقتى شارالار وتەدى

استانانىڭ 15 جىلدىعى – تەك باس قالا ءۇشىن ەمەس, بارلىق قازاقستان ءۇشىن ماڭىزدى وقيعا. بۇل كۇنى قا­لا­مىزدا كوپتەگەن مەرەكەلىك ءىس-شا­رالاردىڭ شىمىلدىعى تۇرىلمەك. بۇل جونىندە تولىعىراق, ەلوردانىڭ 15 جىلدىعىنا دايىندىق جانە ونى وتكىزۋ بويىنشا ۇيىمداستىرۋ كوميتەتى شتابى باسشىسىنىڭ ورىنباسارى تالعات كولباچاەۆ اڭگىمەلەپ بەردى. 

– استانانىڭ 15 جىلدىعىندا قانداي مەرەكەلىك شارالار ۇيىمداستىرىلادى؟
– شىلدە ايىنىڭ ءبىرىنشى ونكۇندىگىندە قالادا كوپتەگەن مەرەكەلىك ءىس-شارالار وتەدى. اتاپ ايتقاندا: «استانا توڭىرە­گىندەگى مىڭجىلدىق» كوشپەندىلەر وركەنيەتى فەستيۆالى, «استانا – ارقاۋ» تۇركى مۋزىكاسىنىڭ فەستيۆالى, «استاناعا تارتۋ» ءداستۇرلى مۋزىكا كونتسەرتى مەن «سەرپەر» حالىق اسپاپتار وركەسترى فەستيۆالى ۇيىمداستىرىلادى. بيىل 1 ميلليوننان استام ادام قاتىساتىن بارلىعى 50-گە تارتا جالپىقالالىق,
20-عا تارتا اۋداندىق ءىس-شارالار وتكىزۋ جوسپارلانعان.

– بيىل ەلوردا جۇرتشىلىعى كىمدەردىڭ ونەرىن تاماشالاي الادى؟
– جىل سايىن دەمەۋشىلەردىڭ قارجىسىنا وتكىزىلەتىن شەتەلدىك جۇلدىزداردىڭ كونتسەرتى بيىلعى جىلى ينۆەستورلار بولماۋى سەبەپتى توقتاتىلدى. سونداي-اق, شەتەلدىك جۇلدىزدار تاركان, پاتريسيا كااس, Il Divo كۆارتەتىنىڭ, لوندون كورولدىك سيمفونيالىق وركەسترى مەن رەسەيلىك جۇلدىزدارىنىڭ كونتسەرتتەرى قويىلمايدى. ولاردىڭ ورنىنا قالالىقتارعا ەلوردانىڭ الاڭدارى مەن گۇلباقتارىندا ۇلكەن كونتسەرتتەر بەرىلەدى. سونىمەن قاتار, استانا كۇنىندە:

«ايالاعان استانا» رەسپۋبليكالىق بالالار بايقاۋى, «شاتتىق» بالالار فەستيۆالى كونتسەرتتىك باعدارلامالارى مەن بالالار شىعارماشىلىق ۇجىمدارى ءوز ونەرلەرىن كورسەتەدى. ۆەلوسپورتتان استانا كۋبوگى, اسىق اتۋدان «التىن ساقا» ءتۋرنيرى سپورتتىق, ويىن-ساۋىق قويىلىمدارى كەلۋشىلەر نازارىنا ۇسىنىلادى. ازپازدىق كورمەلەر مەن بايقاۋلار, «قازاقستاننىڭ العاشقى ايەل سۋرەتشىسى» كورمەسى, «استانا – باعى بيىك اسقارىمسىڭ» كىتاپ فەستيۆالى, «ءمۇشايرا» ادەبيەت پەن ونەر فەستيۆالى – مادەني-اعارتۋشىلىق سيپاتتاعى كوركەم كورمەلەر مەن بايقاۋلار ۇيىمداستىرىلادى. «ەكستريم تولقىنى» سپورتتىق كوپشىلىك شارالارى, «اسقاقتاي بەر, استانا!» تۇنگى بي كەشى, «استانا كۋبوگى» كتك حالىقارالىق فەستيۆالى جاستاردىڭ كوڭىلىنەن شىعادى دەپ ويلايمىز. وعان قوسا, قالانىڭ ساۋدا ورتالىقتارىنداعى پرومو-اكتسيالار – تورت كەسۋ سالتاناتتى ءراسىمى, ۇتىس ويىندارى مەن اكتسيالار بار.

سونداي-اق, «ازيا جاڭعىرىعى» تسيرك فەستيۆالى, ايماقتىق تەاتر فەستيۆالى, «زامانداس» تەاترى قويىلىمى مەن تسيرك ويىندارى ۇسىنىلادى.

ەركەجان ساتىمبەك