ساتباەۆ پەن زابيكۋلين ەسكەرتكىشتەرىن 100-دەن استام ادام تازارتتى, دەپ حابارلايدى astana-akshamy.kz
ەلوردادا «تازا قازاقستان: استانا – تازالىق پەن ءتارتىپتىڭ ۇلگىسى» اتتى اۋقىمدى ەكولوگيالىق اكتسياسى ءوتىپ جاتىر. بۇل اپتا «كيەلى مەكەن» ۇرانىمەن ءوتىپ, تاريح جانە مادەنيەت ەسكەرتكىشتەرىنىڭ اۋماعىن اباتتاندىرۋعا ارنالعان. قالانىڭ كورىكتى نىساندارىن اباتتاندىرۋعا تۇرعىندار, ءماسليحات دەپۋتاتتارى, وقۋشىلار مەن ستۋدەنتتەر, مادەنيەت ۇيىمدارىنىڭ قىزمەتكەرلەرى جانە ت.ب. اتسالىسۋدا.
وسىلايشا, قانىش ساتباەۆتىڭ ەسكەرتكىشىن تازارتۋ جانە ونىڭ ماڭىنداعى قوقىستاردى شىعارۋ ءۇشىن اكتسياعا 100-دەن استام ادام شىقتى.
«بۇگىن قالا جاستارىمەن بىرگە قانىش ساتباەۆتىڭ ەسكەرتكىشىن تازارتتىق. اركىم ءوزىنىڭ ارتىنان جيناۋى كەرەك. سەبەبى, قوقىس تاستامايتىن جەر قاشاندا تازا بولادى. ەكولوگيالىق اكتسيالاردىڭ بارىنە اتسالىسىپ, جاستاردى ەكولوگيالىق مادەنيەتكە دەگەن سۇيىسپەنشىلىككە تاربيەلەۋ ماڭىزدى», – دەدى استانا قالاسى ءماسليحاتىنىڭ دەپۋتاتى ارسلانبەك ماعزۇم.
ايتا كەتەرلىك تاعى ءبىر جايت, اكتسياعا مادەنيەت باسقارماسىنا قاراستى مەكەمەلەر نەمەسە قۇرمەتىنە ەسكەرتكىش ورناتىلعان بەلگىلى تۇلعانىڭ سالاسىمەن باعىتتاس مەكەمەلەر جۇمىلدىرىلىپ وتىر. سوعان سايكەس, اسقار زابيكۋليننىڭ ەسكەرتكىشى اۋماعىنا «ءازىربايجان مامبەتوۆ اتىنداعى مەملەكەتتىك دراما جانە كومەديا تەاترى» ۇجىمى مەن №6 مامانداندىرىلعان ءورت ءسوندىرۋ ءبولىمى قىزمەتكەرلەرى تازالىق جۇرگىزدى.
«وسى بولىمدە 12 جىلدان بەرى قىزمەت ەتەمىن. اسقار مارقۇممەن 5 جىل بىرگە قىزمەتتەس بولدىق. ول – ءبىز ءۇشىن ناعىز باتىر, ەرجۇرەك ازامات. ءوز ىسىنە ادال قىزمەتكەر وزگەلەردىڭ ءومىرىن قۇتقارۋ ءۇشىن ءوز ءومىرىن تارك ەتتى. ارىپتەسىمىزدىڭ جارقىن بەينەسى ءبىزدىڭ ماڭگى ەسىمىزدە جانە ونىڭ ەرلىك ءىسىن جاس ۇرپاق دارىپتەيتىن بولادى», – دەدى № 6 مامانداندىرىلعان ءورت ءسوندىرۋ ءبولىمىنىڭ بولىمشە كومانديرى سايات اشيروۆ.
ەلوردادا بارلىعى 100-دەن استام ەسكەرتكىش بار. ونىڭ 46-سى مەملەكەت قورعاۋىندا.
«ەل بويىنشا ۇلكەن ەكولوگيالىق ناۋقان باستالدى. بۇگىنگى تاڭدا تازالىق ونكۇندىگى اياسىندا كوشەلەر, جاياۋ جۇرگىنشىلەر جولى, قوعامدىق ورىندار مەن ەسكەرتكىشتەر تازارتىلۋدا. قالادا 60-قا جۋىق ەسكەرتكىش بار, ولاردى دا تازا ۇستاۋ ماڭىزدى. بەلسەندى تۇرعىندار باس قوسىپ, قالانى اباتتاندىرۋعا اتسالىستى. ەلوردانىڭ عانا ەمەس, بۇكىل ەلىمىزدىڭ تازالىعىن قاداعالاۋ كەرەك», – دەدى استانا اكىمدىگىنىڭ «بىرىككەن مۇراجايلار ديرەكتسياسى» مەملەكەتتىك قازىنالىق كاسىپورنىنىڭ ديرەكتورى سەرگەي سولودوۆنيكوۆ. ەستەرىڭىزگە سالا كەتەيىك, ەلىمىزدە «تازا قازاقستان» رەسپۋبليكالىق ەكولوگيالىق اكتسياسى باستالدى. ول بەس اپتاعا سوزىلادى, ولاردىڭ ارقايسىسى بەلگىلى ءبىر تاقىرىپقا ارنالعان.
بۇل اپتا «كيەلى مەكەن» دەپ اتالادى.
