2022 جىلدىڭ قازان ايىندا ەلوردادا حالىقارالىق ستاندارتتارعا تولىقتاي ساي كەلەتىن «ارعىماق» ات سپورتى كەشەنى اشىلدى. ەلوردانىڭ كوممۋنيكاتسيالار قىزمەتىندە وتكەن بريفينگتە استانا قالاسى دەنە شىنىقتىرۋ جانە سپورت باسقارماسى باسشىسىنىڭ ورىنباسارى م.ا. ازامات اعزاموۆ كەشەننىڭ جۇمىسى تۋرالى ايتتى, دەپ حابارلايدى astana-akshamy.kz
«ارعىماق» كەشەنى استانانىڭ ورتالىعىنان 15-20 مينۋتتىق جەردە ورنالاسقان. بۇل ورىن وتە ىڭعايلى, جىلقىلاردىڭ تىنىشتىعى ءۇشىن دە ماڭىزدى. ونىڭ قالاعا جاقىن بولۋى دا كەلۋشىلەرگە ىڭعايلى. «كەشەن اۋماعىندا ءۇش ات قوراسى بار, وندا جىلقى ۇستاۋعا قاجەت بارلىق جاعداي جاسالعان.
«ارعىماق» كەشەنىنىڭ ەرەكشەلىگى – كەز كەلگەن دەڭگەيدە ات سپورتى جارىستارىن وتكىزۋگە مۇمكىندىك بەرەتىن سپورت نىساندارىنىڭ بولۋى. سونداي-اق, سپورتتىق-ساۋىقتىرۋ شارالارىن, ونىڭ ىشىندە مۇمكىندىگى شەكتەۋلى جاندارعا ارنالعان يپپوتەراپيانى ۇيىمداستىرۋ جانە وتكىزۋ بويىنشا كەشەننىڭ رەسپۋبليكادا تەڭدەسى جوق. ءبىر سوزبەن ايتقاندا, «ارعىماق» – قازاقستانداعى ەڭ ءىرى كوپسالالى ات سپورتى كەشەنى», – دەدى اعزاموۆ.
نىسان ەمدەۋ-ساۋىقتىرۋ جۇمىىن (يپپوتەراپيا) جۇرگىزۋگە ارنالعان, سونىمەن قاتار بالالار مەن ەرەسەكتەرگە اتقا ءمىنۋدى ۇيرەتەدى, سپورتتىق, بۇقارالىق سپورتتىق جانە ويىن-ساۋىق شارالارىن ۇيىمداستىرادى. مۇندا 20 جىلقى بار, ونىڭ 10-ى ساۋىقتىرۋ شارالارىنا بەلسەنە قاتىسادى. ءار جىلقى كۇنىنە ەكى ساعات يپپوتەراپيامەن اينالىسادى.
ايتا كەتەيىك, وتكەن جىلى استانادا يپپوتەراپيالىق وڭالتۋ قولعا الىنعان بولاتىن. پيلوتتىق جوبانىڭ ءۇش ايىندا 72 بالا ەمدەلدى. قازىر مۇندا 40-تان استام بالا تۇراقتى كەلەدى.
ەرەكشە قاجەتتىلىكتەرى بار بالالارعا ارنالعان وڭالتۋ ساباقتارىن سەيسەنبى جانە بەيسەنبى كۇندەرى اككرەديتتەلگەن ۇيىمداردا ءبىلىم العان رەابيليتولوگ دارىگەرلەر, سونداي-اق يپپوتەراپيا سالاسىنداعى بىلىكتى ماماندار جۇرگىزەدى.
«ارعىماق» ات سپورتى كەشەنىنىڭ قالا تۇرعىندارى مەن قوناقتارىنا قولجەتىمدىلىگىن قامتاماسىز ەتۋ ماقساتىندا ارنايى پلاتفورما ەنگىزىلدى.
