ونەر كەڭىستىگىندە دارا جولىمەن تانىلىپ, حالىقارالىق, رەسپۋبليكالىق تەاتر فەستيۆالدەرىندە ۇزدىكتەر قاتارىنان كورىنگەن جاستار تەاترىنىڭ تالانتتى ۇجىمى 2024 جىلدىڭ 19-24 ءساۋىر ارالىعىندا شىمكەنت قالاسىنا گاسترولدىك ءىس-ساپارمەن بارادى.
19 ساۋىردە ت.احمەتجاننىڭ «تاپتىم. عاشىق بولدىم. جوعالتتىم» ميۋزيكلى شىمكەنت قالالىق ورىس دراما تەاترىندا قويىلسا, 20 ساۋىردە ن.جاقىپبايدىڭ «جانارىمداعى جالعىز اۋەن» سپەكتاكلى ادام ءومىرىنىڭ ەڭ ءبىر اياۋلى شاقتارى مەن كوركەم كەزدەرىنىڭ ءتاتتى ەستەلىكتەرى ساعىنىش بولىپ جۇرەگىمىزدىڭ تۇكپىرىنە جاسىرىنعان بالالىق كەزگە, وسكەن ورتاعا ساعىنىش, جاستىق شاققا, ستۋدەنتتىك ومىرگە ساعىنىش, عاشىق جانعا ساعىنىش, الىستاعى تۋعاندارعا ساعىنىش, ءتىپتى ءوزىڭ بىلمەيتىن, تۇسىنبەيتىن بەيمالىم كۇيگە, سۇلۋلىققا ساعىنىشتى جەتكىزەدى. سەزىمدى جەتكىزەر ءسوز تاۋسىلعان ساتتەگى ساعىنىش كۇيىن مۋزىكادان ىزدەگەن تەاتر تۋپپاسىنىڭ كورەرمەنىن قۋانتار جاڭالىعى كوپ. شىم قالانىڭ تۇرعىندارى جۇرەك پەرنەسىن ءدوپ باسىپ, سەزىمدى قوزعار سىرلاسۋ – نوستالگيا جانرىنداعى عالامات كەشتىڭ كۋاسى بولعالى تۇر.
21 ساۋىردە ۋ.شەكسپيردىڭ «اساۋعا تۇساۋ» كومەدياسى كورەرمەن نازارىنا ۇسىنىلادى. «اساۋعا تۇساۋ» – اساۋ قىزدى اۋىزدىقتاۋ ەمەس, كىرشىكسىز ماحابباتتى شىنايى تۇسىنۋدەن تۇراتىن ەرلى-زايىپتىلار اراسىنداعى ادال دوستىقتى جىر ەتەدى. سپەكتاكلدەردىڭ قويۋشى رەجيسسەرى – قازاقستاننىڭ ەڭبەك سىڭىرگەن قايراتكەرى, مەملەكەتتىك سىيلىعىنىڭ لاۋرەاتى نۇرقانات جاقىپباي.
22 ءساۋىر كۇنى كوپتەگەن رەجيسسەر مەن اكتەر شىعارماشىلىعىنىڭ قيالىنا ەرىك بەرگەن ن.گوگولدىڭ «رەۆيزورى» جاستار تەاترىنىڭ ساحناسىندا وزگەشە ەكپىنمەن, ەرەكشە شابىتپەن, ايرىقشا باعىتپەن وڭتۇستىك مەگاپوليس تۇرعىندارى ءۇشىن ج.شانين اتىنداعى اكادەميالىق قازاق دراما تەاترىندا ارنايى قويىلادى.
23 ساۋىردە ت.ءميڭنۋلليننىڭ «ماحاببات مينياتيۋرالارى» سپەكتاكلى كورسەتىلسە, 24 ساۋىردە قازاقستاننىڭ ەڭبەك سىڭىرگەن قايراتكەرى داۋرەن سەرعازين ساحنالاعان ق.ءجۇنىسوۆتىڭ «پرانك-ماحاببات» كومەدياسى كورەرمەنگە جول تارتادى. ستۋدەنتتىك شاقتىڭ قىزىعى مەن شىجىعى مول شىتىرمان وقيعالارىنىڭ كۋاسى بارعان ادامدى تارتا تۇسەدى. ۇتقىر ءازىل, ادەمى اۋەن, شىتىرمان وقيعاعا قۇرىلعان كومەديا ستۋدەنتتەر ءومىرىنىڭ بوياماسىز بولمىسىن پاش ەتەدى.
استانالىق جاستار تەاترىنىڭ شىعارماشىلىق ۇجىمىنا گاسترولدىك ساپاردا ساتتىلىكتەر تىلەيمىز!
