تۇڭعىش پرەزيدەنت كۇنىنە وراي استانا تورىندەگى ۇلتتىق اكادەميالىق كىتاپحانادا «ەگەمەن قازاقستان» گازەتىنىڭ شىعارماشىلىق توبى جارىققا شىعارعان «ۇلت ۇياسىنداعى ۇلاعات» اتتى كىتاپتىڭ تۇساۋكەسەرى ءوتتى.
ەلباسىمىز نۇرسۇلتان نازارباەۆتىڭ بيىلعى تامىز ايىنداعى ۇلىتاۋ تورىندە بەرگەن سۇحباتى حالىقتىڭ بويىنا رۋحاني سەرپىلىس بەرگەنى ايقىن. ەرتەدەن ەلدىڭ بىرلىگىنە تۇتقا بولعان, ۇلتتىڭ ۇيىمداسۋىنا ۇيىتقى بولعان ۇلىتاۋداعى ۇلاعاتتى اڭگىمە جۇرتتىڭ كوكەيىندە جۇرگەن جايلاردىڭ ءتۇيىنىن تارقاتىپ, كوپشىلىكتىڭ كەلەشەككە دەگەن سەنىمىن سەرپىلتكەن ەدى.
وسى سۇحبات جارىققا شىققان كۇننەن باستاپ ەلىمىزدىڭ بارلىق وڭىرلەرىنەن وي-پىكىرلەرىن بىلدىرگەن حاتتار مەن تولعاقتى ماقالالار «ەگەمەن قازاقستان» گازەتىنە تۇيدەك-تۇيدەگىمەن تۇسكەنىن جانە ولاردىڭ لەك-لەگىمەن جارىققا شىققانىن كۇندە كورىپ جۇردىك. ەندى, مىنە, سول سانانى سىلكىندىرگەن سۇحباتقا بايلانىستى جاريالانعان ماتەريالدار جيناقتالىپ, ساليقالى باسىلىم بولىپ قالىڭ وقىرمانعا جول تارتتى.
جيناققا كىرگەن ءار ماقالادا ەلباسى سۇحباتىندا قوزعالعان ماسەلەلەردىڭ ماڭىزدىلىعى, مەملەكەت پەن ۇلتقا قاتىستى وزەكتىلىگى جونىندە شىنايى ءارى وتانشىلدىق كوزقاراس اڭعارىلادى. سوندىقتان دا وسىنداي ماقالالاردىڭ جيناق بولىپ شىققانى قالىڭ وقىرمانعا, ونىڭ ىشىندە جاستار ءۇشىن وتە قاجەتتى باسىلىم بولاتىنى ءسوزسىز.
«ۇلت ۇياسىنداعى ۇلاعات» جيناعىنىڭ جارىققا شىعۋىنا ارنالعان تۇساۋكەسەر ءراسىمىن جۇرگىزگەن «ەگەمەن قازاقستان» رەسپۋبليكالىق گازەتى» اكتسيونەرلىك قوعامىنىڭ پرەزيدەنتى ساۋىتبەك ابدراحمانوۆ ايتۋلى كىتاپتى شىعارۋعا دەمەۋشىلىك كورسەتكەن قاراعاندى وبلىسى ۇلىتاۋ اۋدانىنىڭ اكىمى حاميت وماروۆ پەن «قازاقمىس» كورپوراتسياسى» جشس باس ديرەكتورى باقتيار قىرىقپىشەۆ مىرزالارعا العىسىن ايتتى. جاڭا كىتاپتىڭ ماڭىزدىلىعى تۋرالى شارا بارىسىندا جۇرەكجاردى لەبىزدەرىن بىلدىرگەن سەرىك قيراباەۆ, عاريفوللا ەسىم, ءاسانالى ءاشىموۆ, ءادىل احمەتوۆ, ءۋاليحان بيشىمباەۆ, ديحان قامزابەكۇلى, ءجۇرسىن ەرمان سىندى زيالى ازاماتتارعا ريزاشىلىعىن ءبىلدىردى. سونىمەن قاتار, وسى كىتاپتى قىسقا مەرزىمدە باسپاعا ازىرلەگەن جۋرناليست جىلقىباي جاعىپارۇلىنىڭ جەتەكشىلىگىمەن تىنباي جۇمىس جۇرگىزگەن گازەت قىزمەتكەرلەرىنىڭ جەمىستى ەڭبەگىن دە اتاپ ءوتتى.
تۇڭعىش پرەزيدەنت كۇنى مەرەكەسىنە وراي وقىرماندار ءۇشىن رۋحاني سىيلىق بولعان كىتاپتىڭ تۇساۋكەسەر شاراسىنىڭ شابىت-شىرايىن ل.گۋميلەۆ اتىنداعى ەۋرازيا ۋنيۆەرسيتەتىنىڭ ونەرپازدارى اسەم انمەن, كوركەم كۇيمەن كەلتىرىپ وتىردى.
عالىم قوجابەكوۆ
